Diema 15:1-33
15 Karabo e boleta e fokotša kgalefo,Eupša lentšu la go hlaba le baka kgalefo.
2 Motho yo bohlale o bolela dilo tše dibotse tšeo a di tsebago,Eupša setlaela se bolela dilo tša bošilo.
3 Mahlo a Jehofa a bona dilo ka moka tšeo di diregago.O bona batho ba babe le bao ba lokilego.
4 Leleme le boleta le a phediša,Eupša polelo ya maaka e kweša bohloko.
5 Motho wa setlaela o nyatša tayo ya tatagwe,Eupša yo bohlale o a theetša ge a kgalemelwa.
6 Ntlong ya moloki go na le mahumo a mantšhi,Eupša tšeo di dirwago* ke motho yo mobe di mo tlišetša mathata.
7 Motho yo bohlale o phatlalatša tsebo ka dilo tšeo a di bolelago,Eupša setlaela ga se dire bjalo.
8 Jehofa o šišimišwa ke sehlabelo sa batho ba babe,Eupša o kgahlwa ke thapelo ya baloki.
9 Jehofa o šišimišwa ke boitshwaro bja motho yo mobe,Eupša o rata yo a lekago ka thata go dira dilo tša go loka.
10 Motho yo a tlogetšego go dira dilo tša go loka o hloile tayo,Eupša yo a ganago tayo o tla hwa.
11 Ge e ba Jehofa a kgona go bona Lebitla* le lefelo leo batho ba bolago go lona,
Gona o kgona go bona le dipelo tša batho!
12 Motho yo a ikgantšhago ga a rate go phošollwa,
E bile ga a nyake go kwa keletšo ya batho ba bohlale.
13 Ge pelo e thabile le sefahlego se a thaba,Eupša ge motho a nyamile a ka gateletšega.
14 Batho* ba bohlale ba tsoma tsebo,Eupša lešilo le rata go bolela tša bošilo.
15 Motho yo a dulago a tshwenyegile ka mathata a gagwe* o tla dula a nyamile,Eupša wa pelo e thabilego o dula a le monyanyeng.
16 Go kaone gore motho a diile eupša a boifa Jehofa,Go e na le gore a hume eupša a na le dipelaelo.
17 Go kaone go ja morogo lapeng leo go nago le leratoGo e na le go ja nama ya poo yeo e nonnego lapeng leo go nago le lehloyo.
18 Motho wa go kwata ka pela o baka ditshele,Eupša yo a sa kwatego ka pela o fediša ditshele.
19 Tsela ya sebodu e tletše meetlwa,Eupša baloki ba sepela tseleng yeo e se nago ditšhitišo.
20 Morwa yo bohlale o thabiša tatagwe,Eupša wa setlaela o nyatša mmagwe.
21 Setlaela se rata go dira dilo tša bošilo,Eupša motho yo bohlale o sepela tseleng e botse.
22 Maano a a pala ge batho ba sa rerišane,*Eupša ge go na le baeletši ba bantšhi dilo di tla sepela gabotse.
23 Motho yo a fago karabo e botse o a thabaGomme lentšu leo le bolelwago ka nako e swanetšego ke le lebotse kudu!
24 Motho yo a nago le temogo o sepela tseleng e išago bophelong,O phema tsela yeo e išago Lebitleng.*
25 Jehofa o tla phušola ntlo ya bao ba ikgogomošago,Eupša o tla šireletša mollwane wa tšhemo ya mohlologadi.
26 Jehofa o šišimišwa ke maano a motho yo mobe,Eupša o rata dipolelo tše di kgahlišago.
27 Yo a hwetšago dilo ka boradia o tlišetša lapa la gagwe mathata,Eupša yo a hloilego pipamolomo o tla dula a phela.
28 Moloki o naganišiša pele a ka araba,Eupša motho yo mobe o bolela dilo tše mpe.
29 Jehofa ga a kwe thapelo ya motho yo mobe,Eupša o kwa thapelo ya moloki.
30 Sefahlego se se thabilego se thabiša pelo,Le gona pego e botse e a kgothatša.
31 Tayo e ka phološa bophelo,Gomme yo a theetšago tayo o tla hlalefa.
32 Yo a ganago tayo o hloile bophelo bja gagwe,Eupša yo a theetšago ge a kgalemelwa o tla hlalefa.
33 Go boifa Jehofa go thuša motho gore a be bohlale.Le gona, yo a ikokobetšago gomme a amogela tayo o tla godišwa.
Mengwalo ya tlase
^ Phetolelo ya lentšu ka lentšu e re, “dienywa tša.”
^ Bona Tlhaloso ya Mantšu.
^ Phetolelo ya lentšu ka lentšu e re, “Pelo.”
^ Phetolelo ya lentšu ka lentšu e re, “mohlaki.”
^ Goba, “ntšhetšane sa mafahleng.”
^ Bona Tlhaloso ya Mantšu.
