Daniele 11:1-45
11 “Ge e le nna, ngwageng wa mathomo wa ge Dario wa Momede a buša, ke ile ka matlafatša Mikaele le go mo šireletša.
2 Taba ye yeo ke tlago go go botša yona ke nnete:
“Bona! Nageng ya Peresia go sa tlo ema dikgoši tše dingwe tše tharo, gomme ya bone e tlo ikgobokeletša mahumo a mantšhi go feta dikgoši tše dingwe ka moka. Ke moka ge e thoma go ba le matla ka baka la mahumo a yona, e tla diriša se sengwe le se sengwe go lwantšha mmušo wa Gerika.
3 “Le gona go tla ema kgoši e matla gomme ya buša ka matla a magolo, ya ba ya itirela boithatelo.
4 Eupša ge e šetše e buša, mmušo wa yona o tla pšhatlaganywa gomme wa gašanyetšwa dikhoneng tše nne tša lefase.* Eupša o ka se fetišetšwe go ditlogolo tša yona, e bile o ka se be matla go swana le ge o be o bušwa ke yona, ka gobane mmušo wa yona o tla tumolwa gomme wa fiwa ba bangwe, eupša wa se fiwe ditlogolo tša yona.
5 “Kgoši ya borwa, e lego yo mongwe wa balaodi ba mašole a yona, e tla ba matla, eupša yo mongwe* o tla e fenya gomme a buša ka matla a magolo go feta a kgoši yeo.*
6 “Ka morago ga mengwaga e itšego, dikgoši tšeo di tla dira tumelelano. Morwedi wa kgoši ya borwa o tla ya go kgoši ya leboa go yo dira ditokišetšo tša go dira tumelelano. Eupša morwedi yoo a ka se sa ba le matla. Kgoši yeo le yona e ka se sa ba le matla. Morwedi yoo, bao ba mo tlišago, yo a mmelegego gotee le yoo a mo matlafatšago dinakong tšeo, ba tla neelwa batho ba bangwe.
7 Yo mongwe yo a tšwago lehlogeding la medu ya morwedi yoo o tla ema legatong la gagwe,* e bile o tla tsena mašoleng, gomme a hlasela lefelo le le šireletšegilego la kgoši ya leboa, ke moka a lwa le bona gomme a ba fenya.
8 O tla tla Egepeta le medingwana ya bona, medimo ya bona ya diswantšho ya go dirwa ka tšhipi, dilo tša bona tše bohlokwa tša silifera le tša gauta gotee le batho bao ba thopilwego. O tla fetša mengwaga e itšego a emetše kgole le kgoši ya leboa,
9 yeo e tlago go lwa le mmušo wa kgoši ya borwa, eupša ka morago ya boela nageng ya yona.
10 “Barwa ba kgoši yeo ba tla itokišetša ntwa gomme ba kgoboketša mašole a mantšhi kudu. Yo mongwe wa barwa bao o tla tla nageng yeo gomme a fediša batho ba moo bjalo ka ge eka ba gogolwa ke mafula. Eupša o tla boela morago gomme a tšama a elwa go fihlela a fihla lefelong la gagwe leo le šireletšegilego.
11 “Ke moka kgoši ya borwa e tla galefa kudu gomme ya ya go lwa le kgoši ya leboa, ke moka yona ya kgoboketša lešaba le legolo, eupša lešaba leo le tla neelwa kgoši yela e nngwe.*
12 Ke moka kgoši yeo e tla tšea lešaba leo. Pelo ya yona e tla ikgantšha gomme e tla fediša batho ba diketekete, eupša e ka se diriše maemo a yona a matla go ikhola.
13 “Kgoši ya leboa e tla boa gomme ya kgoboketša lešaba le legolo go feta la peleng. Le gona mafelelong, ka morago ga mengwaga e itšego, e tla tla le mašole a mantšhi ao a itlhamilego gabotse.
14 Mehleng yeo batho ba bantšhi ba tla lwa le kgoši ya borwa.
“Gare ga batho ba geno go tla ba le batho bao ba ratago bošoro, ba tla leka go dira gore pono e phethagale, eupša ba tla palelwa.
15 “Kgoši ya leboa e tla tla gomme ya aga legora go dikologa motse o šireleditšwego, ke moka ya o thopa. Le gona mašole a ka borwa gotee le mašole a yona a makaonekaone, a ka se be le matla a go itwela.
16 Yo a tlago go lwa le yona o tla itirela boithatelo, e bile ga go na yo a tlago go mo thibela. O tla ema nageng ya Mokgabišo, e bile o tla ba le matla a go fediša manaba a gagwe.
17 O tla ikemišetša go tla ka matla ka moka a mmušo wa gagwe, e bile o tla dira tumelelano le kgoši yeo gomme a atlega a ba a mo fa morwedi* gore a mo fediše. Morwedi yoo a ka se atlege, e bile a ka se dule a mo tshepagalela.
18 O tla ikemišetša go hlasela dinaga tšeo di lego kgauswi le mawatle, gomme a thopa batho ba bantšhi. Eupša go tla tla molaodi yo a tlago go fediša boikgogomošo bja gagwe, gore a se sa hlwa a ikgogomoša. Molaodi yoo o tla dira gore yena yoo a nyatšege.
19 Ke moka a ikemišetša go hlasela mafelo ao a šireletšegilego a nageng ya gagwe, eupša o tla kgopša a wa gomme a se sa ba gona.
20 “Le gona legatong la gagwe go tla ema motho yoo a dirago gore motho yo a ntšhišago ba bangwe motšhelo, a fete gare ga mmušo woo o mobotse. Eupša ka morago ga matšatši a sego kae o tla hwa efela a ka se bolawe ke batho goba a hwela ntweng
21 “Ke moka, legatong la gagwe go tla ema yo a nyatšegago, eupša ba ka se mo nee tlhompho ya ka bogošing. Le gona, o tla tla nakong ya ge batho ba sa iketlile gomme a tšea mmušo ka boradia.
22 Ke moka mašole ao a swanago le mafula a tla gogolwa ka baka la gagwe, e bile a tla fedišwa go swana le ge Moetapele wa kgwerano le yena a tla fedišwa.
23 Le gona, ka ge ba dirile tumelelano le yena o tla tšwela pele ka bofora bja gagwe gomme a ba le matla a thušwa ke setšhaba se senyenyane.
24 Nakong ya ge go iketlilwe, o tla tla ditikologong tšeo di humilego* tša profense gomme a dira seo borakgolokhukhu ba gagwe ba sa kago ba se dira. O tla abela batho dilo tšeo ba itšeetšego tšona ka morago ga go fenya manaba a bona, gomme a logela mafelo ao a šireleditšwego maanomabe, eupša o tla dira seo ka nako e itšego feela.
25 “O tla rapa sebete* e bile a ba le matla gomme a ya go lwa le kgoši ya borwa a na le mašole a mantšhi. Kgoši ya borwa yona e tla itokišeletša ntwa e na le mašole a mantšhi kudu le a matla. Yena* a ka se atlege ka gobane batho ba tla mo logela maanomabe.
26 Bao ba jago dijo tša gagwe tša maemo ba tla mo pšhatlaganya.
“Mašole a gagwe ona a tla fenywa, gomme a mantšhi a tla bolawa ka sehlogo.
27 “Dikgoši tšeo tše pedi di tla ikemišetša go dira dilo tše mpe. Di tla dula gotee tafoleng gomme tša botšana maaka. Eupša ga go seo se tlago go atlega ka gobane bofelo bo tla tla ka nako yeo e beilwego.
28 “Kgoši ya leboa e tla boela nageng ya yona e na le dithoto tše dintšhi kudu. E tla ikemišetša go lwantšha kgwerano e kgethwa, e tla atlega ke moka ya boela nageng ya yona.
29 “E tla boa ka nako yeo e beilwego gomme ya ya go hlasela naga ya borwa, eupša mo lekgeng le go ka se swane le mathomong.
30 Ka gobane dikepe tša Khithima di tla tla go lwa le yona gomme e tla kokobetšwa.
“E tla boela morago gomme ya galefela kgwerano e kgethwa ke moka ya atlega, le gona e tla boela morago gomme ya thekga bao ba tlogelago kgwerano e kgethwa.
31 Mašole a yona a tla tla a etšwa go yona gomme a šilafatša sekgethwa, e lego lefelo leo le šireletšegilego ke moka a kgaotša sehlabelo sa letšatši le letšatši.
“Le gona a tla bea selo se se šišimišago seo se bakago tshenyo.
32 “Bao ba dirago dilo tše mpe gomme ba hlanogela kgwerano, e tla ba aroša ka mantšu a boreledi. Eupša bao ba tsebago Modimo wa bona, ba tla ema ba tiile gomme ba atlega.
33 Bao ba nago le temogo ba tla hlahla batho ba bantšhi. Ba tla kwešwa bohloko ka sabola, ka mollo, ka go išwa bothopša le ka go tšeelwa mahumo a bona ka matšatši a itšego.
34 Eupša ge ba kwešitšwe bohloko ba tla thušwa ganyenyane. E bile batho ba bantšhi ba tla ba thekga ka mantšu a boreledi.*
35 Ba bangwe ba bao ba nago le temogo ba tla kwešwa bohloko, e le gore batho ba tle ba lekwe ka baka la bona le gore ba hlwekišwe le go phela bophelo bjo bo hlwekilego go fihla mehleng ya bofelo ka gobane se se tla direga ka nako yeo e beilwego.
36 “Kgoši ya leboa e tla itirela boithatelo, e tla ikgodiša ya ba ya ikgogomošetša modimo yo mongwe le yo mongwe. Le gona, e tla bolela dilo tšeo di tšhošago ka Modimo yo mogolo go feta medimo ka moka. E tla atlega go fihlela ge bogale bja Modimo bo fedile. Ka gobane seo Modimo a nyakago se direga se tla direga.
37 Kgoši ye e ka se hlomphe Modimo wa borakgolokhukhu ba yona, e ka se be le taba le dilo tšeo basadi ba di kganyogago e bile e ka se be le taba le modimo le ge e le ofe yo mongwe, eupša e tla ikgogomošetša motho yo mongwe le yo mongwe.
38 E tla hlompha modimo wa mafelo ao a šireletšegilego, ya ba ya hlompha modimo yoo botatago yona ba bego ba sa mo tsebe. E tla mo nea gauta, silifera, maswika a bohlokwa le dilo tše bohlokwa.
39 E tla atlega ge e hlasela mafelo ao a šireletšegilego kudu e thušwa ke modimo o šele. E tla hlompha batho bao ba e thekgago,* le gona e tla ba dira gore ba buše batho ba bantšhi. E bile e tla patediša batho gore ba hwetše naga.
40 “Mehleng ya bofelo kgoši ya borwa e tla kgorometšana le kgoši ya leboa, e bile kgoši ya leboa ge e tlo lwa le kgoši ya borwa e tlo tla ka dikariki tša ntwa, banamedi ba dipere le dikepe tše dintšhi. Ke moka ya tsena dinageng tše dingwe gomme ya di fediša bjalo ka ge e ka di gogolwa ke mafula.
41 E tla tsena le nageng ya Mokgabišo, gomme dinaga tše dintšhi di tla fenywa. Eupša batho ba Edomo, ba Moaba le sehlopha se bohlokwa kudu sa Baamoni ba tla phonyokga seatleng sa yona.
42 Le gona e tla tšwela pele e diriša matla a yona go hlasela dinaga tše dingwe, eupša naga ya Egepeta e ka se phonyokge.
43 Kgoši yeo e tla laola mahumo ao a utilwego a gauta, le a silifera le dilo ka moka tše bohlokwa tša Egepeta. Le gona, Balibia le Baethopia ba tla e šala morago.
44 “Eupša dipego tšeo di tšwago ka bohlabela le ka leboa di tla e šitiša, gomme e tla tšwa lesolo e galefile kudu gore e yo fediša batho ba bantšhi.
45 E tla hloma ditente tša yona tša bogoši magareng ga lewatle le legolo le thaba e kgethwa ya Mokgabišo gomme ya fedišwa e bile go ka se be le motho yoo a e thušago.
Mengwalo ya tlase
^ Phetolelo ya lentšu ka lentšu e re, “diphefong tše nne tša magodimo.”
^ Go bonagala “yo mongwe” e šupa go kgoši ya leboa.
^ Go bonagala kgoši yeo go bolelwago ka yona mo e le kgoši ya borwa.
^ Go bonagala “gagwe” e šupa go kgoši ya borwa.
^ Go bonagala go bolelwa ka kgoši ya borwa.
^ Phetolelo ya lentšu ka lentšu e re, “morwedi wa basadi.”
^ Phetolelo ya lentšu ka lentšu e re, “ditikologong tšeo di nonnego.”
^ Phetolelo ya lentšu ka lentšu e re, “O tla beta pelo.”
^ Go bonagala “Yena” e šupa go kgoši ya leboa.
^ Goba, “a go ba goketša.”
^ Goba mohlomongwe, “bao yona e ba tšeelago godimo.”
