Amose 1:1-15
1 A ke mantšu ao Amose yoo e bego e le yo mongwe wa badiši ba dinku ba kua Thekoa a ilego a a botšwa ponong. Ke a ditaba tša mabapi le Isiraele mehleng ya Kgoši Usia wa Juda le mehleng ya Jeroboama morwa wa Joashe, e lego kgoši ya Isiraele. O bone pono ye mengwaga e mebedi pele go e ba le tšhišinyego ya lefase.
2 O itše:
“Jehofa o tla rora go swana le tau kua Tsione.O tla hlaboša lentšu a le Jerusalema.
Mafelo ao badiši ba fudišago diruiwa tša bona go ona a tla omelela,Gomme ntlha ya Thaba ya Karamele le yona e tla omelela.”
3 “Jehofa o re:‘“Ka ge batho ba Damaseko ba ile ba ntlhanogela gantšhintšhi, nka se fetoše seo ke nyakago go ba dira sona,Ka ge ba ile ba swara batho ba Gileada ga sehlogo.*
4 Ke tla fediša ntlo ya Hasaele bjalo ka ge eka e fišwa ke mollo,Gomme ke tla tšhuma le motse wo o ageleditšwego wa Bene-hadada.
5 Ke tla roba dikota tša dikeiti tša Damaseko,Gomme ka fediša badudi ba Bikathe-abeneLe yo a bušago Bethe-edene.Batho ba Siria ba tla išwa Kiri e le mathopša.” Ke nna Jehofa ke go botšago se.’
6 Jehofa o re:‘“Ka ge batho ba Gatsa ba ile ba ntlhanogela gantšhintšhi, nka se fetoše seo ke tlago go ba dira sona,Ka ge ba ile ba thopa Baisiraele ba bantšhi ba ba iša Edomo.
7 Ke tla fediša leboto la motse wa Gatsa bjalo ka ge eka le fišwa ke molloGomme ke tla tšhuma le mošate wa wona.
8 Ke tla fediša badudi ba AshidodoLe yo a bušago Ashikaloni.Ke tla otla badudi ba EkironeGomme Bafilisita bao ba šetšego ba tla fedišwa.” Ke nna Mmuši Morena Jehofa ke go botšago se.’
9 Jehofa o re:‘Ka ge badudi ba Tiro ba ile ba ntlhanogela gantšhintšhi, nka se fetoše seo ke tlago go ba dira sona,Ka ge ba ile ba thopa Baisiraele ba bantšhi ba ba iša Edomo,Le ka baka la ge ba se ba gopola kgwerano ya bana ba motho yeo e ilego ya dirwa.
10 Bjale ke tla fediša leboto la Tiro bjalo ka ge eka le fišwa ke mollo,Gomme ke tla tšhuma le mošate wa yona.’
11 Jehofa o re:‘Ka ge badudi ba Edomo ba ile ba ntlhanogela gantšhintšhi, nka se fetoše seo ke tlago go ba dira sona,Ka ge ba ile ba rakediša bana babo bona ba swere tšhoša.Le gona ba ile ba se ba kwele bohloko,Eupša ba ile ba dula ba ba hlasela bjalo ka ge sebata se hlasela phoofolo,E bile ba ile ba dula ba ba galefetše.
12 Bjale ke tla fediša motse wa Themane bjalo ka ge eka o fišwa ke mollo,Gomme ke tla tšhuma mošate wa Botsera.’
13 Jehofa o re:‘“Ka ge Baamoni ba ile ba ntlhanogela gantšhintšhi, nka se fetoše seo ke tlago go ba dira sona,Ka ge ba ile ba hlaba dimpa tša basadi ba baimana ba Gileada gomme ba di bula, e le gore ba oketše naga ya bona.
14 Bjale letšatšing la ntwa ke tla tšhuma leboto la Raba ka mollo,E bile mollo wo o tla tšhuma le mošate wa yona.Ge mašole a hlasela motse wo go tlo ba le mokgoši o mogolo,E bile letšatšing leo go tlo ba le ledimo le legolo kudu.
15 Le gona kgoši ya Amoni e tla išwa bothopša le matona a yona.” Ke nna Jehofa ke go botšago se.’
Mengwalo ya tlase
^ Phetolelo ya lentšu ka lentšu e re, “ka ge ba fotše Gileada ka selei sa go fola.”
