Puku ya Bobedi ya Samuele 23:1-39
23 A ke mantšu a mafelelo a Dafida:
“Mantšu a morwa wa Jese,Mantšu a monna yoo Modimo a ilego a dira gore a hlomphiwe,Motlotšwa wa Modimo wa Jakobo,Sethakga sa go opela dikoša tša Isiraele.
2 Jehofa o nthušitše ka moya wa gagwe gore ke bolele molaetša wa gagwe,Ke boletše mantšu ao Modimo a a beilego lelemeng la ka.
3 Modimo wa Isiraele o ile a bolela,Modimo wa Isiraele yo a swanago le leswika o boletše le nna a re:
‘Ge motho yo a bušago ba bangwe a lokile,Ebile a buša ka tsela yeo e bontšhago gore o boifa Modimo,
4 Gona pušo ya gagwe e swana le seetša sa mesong, ge letšatši le hlaba,Ebile e swana le ge mesong go se na maru.
E swana le seetša seo se bago gona ka morago ga pula,Yeo e dirago gore lefase le mele bjang.’
5 Ntlo ya ka e swana le yeo e lego pele ga Modimo.
Ka gobane o dirile kgwerano ya go ya go ile le nna,E lego kgwerano yeo e rulagantšwego gabotse le yeo e kgonthišeditšwego.
Ka gobane kgwerano ye e ra gore, ke tlo phološwa ka mo go feletšego le go dula ke thabile,Ke ka baka leo Modimo a dirago gore lapa la ka le atlege.
6 Eupša batho ka moka bao e sego ba selo, ba lahlwa bjalo ka mehlare ya meetlwa,Ka gobane mehlare yeo e ka se ke ya swarwa ka diatla.
7 Ge motho a swara mehlare yeo,O swanetše go ba a swere sebetša sa tšhipi le lerumo,Le gona mehlare yeo e swanetše go fišwa ka mollo mo gongwe le mo gongwe moo e lego gona.”
8 A ke maina a mašole a matla a Dafida: Josheba-baseshebethe wa Mohakimone, moetapele wa mašole a mararo a matla. O ile a bolaya batho ba fetago ba 800 ka nako e tee ka lerumo la gagwe.
9 Gwa latela Eleasara morwa wa Dodo morwa wa Ahohi. Yo le yena e bego e le yo mongwe wa mašole a mararo a matla ao a bego a na le Dafida ge ba be ba ile go rumola Bafilisita. Bafilisita ba be ba kgobokane gore ba tlo lwa le Baisiraele, le gona ge banna ba Isiraele ba tšhaba,
10 o ile a dulela go bolaya Bafilisita go fihlela letsogo la gagwe le lapa eupša ga se a ka a lahla sabola. Jehofa o ile a thuša batho ba gagwe gore ba fenye letšatšing leo, gomme mašole a mo šala morago gore a yo tšea dilo tša batho bao ba bolailwego.
11 O be a latelwa ke Shaama morwa wa Age wa Moharari. Bafilisita ba ile ba kgobokana Lehi, moo go bego go na le tšhemo yeo e bego e tletše dihlodi,* gomme batho ba tšhaba ka baka la Bafilisita.
12 Eupša a ema gare ga tšhemo yeo, a se dumelele gore e tšewe gomme a dulela go bolaya Bafilisita, ka go realo Jehofa a phološa batho ba gagwe ka tsela e kgolo.
13 Go baetapele ba 30, ba bararo ba bona ba ile ba ya go Dafida leweng kua Adulama, nakong ya go buna gomme Bafilisita ba be ba hlomile ditente Moeding wa Barefaimi.
14 Dafida o be a iphihlile lefelong leo le šireletšegilego, ka nako yeo mašole a Bafilisita a be a le Betlelehema.
15 Ke moka Dafida a re: “O ka re nka nwa meetse ao a tšwago sedibeng seo se lego kgauswi le keiti ya Betlelehema!”
16 Ge mašole a mararo a matla a ekwa seo, a ile a gapeletša go ya kampeng ya Bafilisita gomme a ga meetse sedibeng seo se bego se le keiting ya Betlelehema, gomme a tla a a nea Dafida, eupša Dafida a gana go nwa meetse ao, ke moka a a tšhollela fase gore e be sebego sa Jehofa.
17 A re: “Wena Jehofa, ruri nka se tsoge ke dirile selo sa mohuta wo! Nka se nwe meetse ao batho ba ba beilego maphelo a bona kotsing gore ba a ge ka gobane ge nka a nwa go tlaba go le bjalo ka ge eka ke nwa madi a bona” Ke moka a gana go nwa meetse ao. Tše ke dilo tšeo di dirilwego ke mašole a mararo a maatla.
18 Abishai ngwanabo Joaba morwa wa Tseruya e be e le yo mogolo go sehlopha se sengwe sa mašole a matla a mararo. Ka letšatši le lengwe o ile a bolaya banna ba fetago ba 300. O be a tumile go swana le mašole a le a mangwe a mararo.
19 Le ge a be a tumile kudu go feta mašole ao, ebile e le moetapele wa ona, o be a se na maemo a go swana le a mašole a le a mararo a mathomo.
20 Benaya morwa wa Jehoyada o be a na le sebete, ebile o ile a dira dilo tše dikgolo kua Kabatsiele. O ile a bolaya barwa ba babedi ba Ariele wa Moaba, le gona o ile a tsena ka gare ga sediba nakong ya ge go ewa kapoko gomme a bolaya tau.
21 O ile a bolaya le monna wa Moegepeta yo e bego e le yo mogolo ka tsela e sa tlwaelegago. Le ge Moegepeta yoo a be a swere lerumo, Benaya o ile a ya go yena a swere molamo, a mo amoga lerumo leo ke moka a mmolaya ka lona.
22 Tše ke dilo tšeo di dirilwego ke Benaya morwa wa Jehoyada, o be a tumile go swana le mašole a matla a le a mararo a mathomo.
23 Le ge Benaya a be a tumile kudu go feta mašole a 30, o be a se na maemo a go swana le a mašole a le a mararo a mathomo. Le gona Dafida o ile a mo kgetha gore e be yo mogolo go bahlapetši ba gagwe.
24 Asahele ngwanabo Joaba e be e le yo mongwe wa mašole a matla a 30. A mangwe a wona e be e le: Elihanani morwa wa Dodo wa Betlelehema,
25 Shaama wa Moharode, Elika wa Moharode,
26 Heletse wa Mopelete, Ira morwa wa Ikeshe wa Mothekoa,
27 Abi-esere wa Moanathothe, Mebunai wa Mohusha,
28 Tsalamone wa Moahohi, Maharai wa Monetofa,
29 Helebe morwa wa Baena wa Monetofa, Itai morwa wa Ribai wa Gibea ya ba Benjamini,
30 Benaya wa Mopirathone, Hidai wa meeding* ya Gaashe,
31 Abi-aliboni wa Mobethe-araba, Asimafete wa Mobahurimi,
32 Eliahaba wa Moshaalabima, barwa ba Jasheni, Jonathane,
33 Shaama wa Moharari, Ahiama morwa wa Sharara wa Moharari,
34 Elifelete morwa wa Ahasibai morwa wa Maakati, Eliama morwa wa Ahithofele wa Mogilo,
35 Hetsero wa Mokaramele, Paarai wa Moarabia,
36 Igala morwa wa Nathane wa Tsoba, Bani wa Mogada,
37 Tseleke wa Moamoni, Naharai wa Mobeerothe, morwadi wa dibetša tša Joaba morwa wa Tseruya,
38 Ira wa Moithira, Garebe wa Moithira
39 le Uria wa Mohethe, ka moka e le ba 37.
