Puku ya Bobedi ya Samuele 2:1-32
2 Ka morago ga moo, Dafida a botšiša Jehofa a re: “Na ke ye go o mongwe wa metse ya Juda?” Jehofa a re go yena: “Ee, o ka ya.” Dafida a re: “Ke ye kae?” Modimo a re: “Eya Heburone.”
2 Ke moka Dafida a ya moo a na le basadi ba gagwe ba babedi, e lego Ahinoama wa Jeseriele le Abigaile yoo e bego e le mosadi wa Nabala wa Mokaramele.
3 Le gona, Dafida o ile a tloga le banna bao a bego a na le bona, yo mongwe le yo mongwe wa bona a na le lapa la gagwe, gomme ba dula metseng yeo e lego Heburone.
4 Banna ba Juda ba tla moo ba tšhela Dafida makhura hlogong gore e be kgoši ya moloko wa Juda.
Ba tla ba re go Dafida: “Saulo o bolokilwe ke banna ba Jabeshe-gileada.”
5 Ka gona, Dafida a roma batho go banna ba Jabeshe-gileada a re go bona: “Anke Jehofa a le šegofatše ka gobane le bontšhitše mong wa lena Saulo botho* ka gore le mmoloke.
6 Anke Jehofa a le bontšhe botho,* a be a le bontšhe gore o a tshepega, le nna ke tla le bontšha botho ka ge le dirile se.
7 Bjale tiang matla le be le sebete ka gobane mong wa lena Saulo o hlokofetše. Le gona ba ntlo ya Juda ba ntloditše gore ke be kgoši ya bona.”
8 Eupša Abenere morwa wa Nere molaodi wa mašole a Saulo o be a tšere Ishiboshethe morwa wa Saulo a mo tlišitše Mahanaime,
9 gomme a mo dirile kgoši ya Gileada le ya Baashuri le ya Jeseriele le ya Efuraime le ya Benjamini gotee le ya Isiraele ka moka.
10 Ishiboshethe morwa wa Saulo o be a na le mengwaga e 40 ge a eba kgoši ya Isiraele. O bušitše ka mengwaga e mebedi, eupša moloko wa Juda ke wona feela wo o ilego wa thekga Dafida.
11 Dafida o feditše mengwaga e mebedi le dikgwedi tše tshelelago e le kgoši kua Heburone molokong wa Juda.
12 Ge nako e dutše e eya, Abenere morwa wa Nere le bahlanka ba Ishiboshethe morwa wa Saulo ba ile ba tloga Mahanaime ba ya Gibeoni.
13 Joaba morwa wa Tseruya le bahlanka ba Dafida le bona ba tšwa gomme ka morago ba kopana le bona bodibeng bja Gibeoni. Ba dula moo, ba bangwe ba le ka thoko e nngwe ya bodiba mola ba bangwe ba le ka thoko e nngwe ya bjona.
14 Mafelelong Abenere a re go Joaba: “Hle e re masogana a eme gomme a phadišane ka go lwa mo pele ga rena.” Joaba a re: “A a eme.”
15 Masogana ao a bego a kgethilwe a ya ka pele. Masogana a 12 e be e le a Benjamini le Ishiboshethe morwa wa Saulo, mola a mangwe a 12 e le a bahlanka ba Dafida.
16 A swarana ka dihlogo gomme le lengwe le le lengwe la ona la hlaba leo le bego le elwa le lona ka sabola mo lethekeng, gomme a wela fase gotee. Lefelo leo, leo le lego Gibeoni, le ile la bitšwa Helekathe-hatsurimi.
17 Ntwa e ile ya ba e šoro kudu letšatšing leo, gomme Abenere le masogana a Isiraele ba ile ba fenywa ke bahlanka ba Dafida.
18 Barwa ba bararo ba Tseruya ba be ba le moo, bona ke Joaba, Abishai le Asahele. Asahele o be a na le lebelo go etša tshepe yeo e kitimago lebaleng.
19 Asahele o ile a kitimiša Abenere a mo lebile thwii, ebile o be a sa ye ka go le letona goba ka go le letshadi.
20 Ge Abenere a lebelela morago, o ile a re: “Asahele na ke wena?” Yena a re: “Ee, ke nna.”
21 Ke moka Abenere a re go yena: “Arogela ka go le letona goba ka go le letshadi o sware le lengwe la masogana o le tšeele dilo tša lona.” Eupša Asahele yena o be a sa nyake go tlogela go mo kitimiša.
22 Abenere a buša a re go Asahele: “Tlogela go nkitimiša. O reng o nyaka gore ke go bolaye? Ke tla reng go Joaba ngwaneno?”
23 Eupša a gana go goma. Ka gona Abenere a mo hlaba mpeng ka lerumo la phuleletša mokokotlong, gomme Asahele a wa ke moka a hwela moo. Batho ka moka bao ba bego ba etla moo Asahele a hwetšego gona ba be ba ema ganyenyane.
24 Joaba le Abishai ba kitimiša Abenere. Ge letšatši le sobela, ba fihla mmotong wa Ama yeo e lebanego le Gia tseleng yeo e yago lešokeng la Gibeoni.
25 Babenjamini ba kgobokana ka morago ga Abenere, ya ba sehlopha setee gomme ba ema godimo ga mmoto o mongwe.
26 Abenere a goeletša Joaba a re: “Le tla hlabana ka disabola go fihla neng? Na ga o tsebe gore se se tla baka lehloyo le legolo? Ke ka baka lang o sa botše batho ba gore ba lese go lwa le banababo bona?”
27 Joaba a re: “Ke ikana ka Modimo yo a phelago gore ge nkabe o se wa ka wa bolela, batho ba be ba tla tlogela go lwa le banababo bona gosasa mesong.”
28 Bjale Joaba a letša naka, gomme banna bao a bego a na le bona ba tlogela go kitimiša Baisiraele, ke moka ntwa ya fela.
29 Abenere le banna bao a bego a na le bona ba sepela bošego ka moka nageng ya Araba, ba tshela Noka ya Jorodane, ba sepela leopeng* gomme mafelelong ba fihla Mahanaime.
30 Ka morago ga moo, Joaba a tlogela go kitimiša Abenere gomme a kgobokanya batho ka moka. Go bahlanka ba Dafida, gwa hwetšwa Asahele le banna ba bangwe ba 19 ba se gona.
31 Eupša Bahlanka ba Dafida ba be ba fentše Babenjamini le banna ba Abenere, gomme go be go hlokofetše banna ba 360 (makgolo a mararo le masome a tshelelago).
32 Ba ile ba rwala Asahele gomme ba mmolokela lebitleng la tatagwe leo le bego le le Betlelehema. Ke moka Joaba le banna ba gagwe ba sepela bošego ka moka, gomme ba tsena Heburone ge go esa.
Mengwalo ya tlase
^ Goba, “lerato le le botegago.”
^ Goba, “lerato le le botegago.”
^ Goba mohlomongwe, “nageng ya Bethirone ka moka.”
