Puku ya Bobedi ya Dikgoši 25:1-30
25 Ka ngwaga wa bosenyane wa ge Tsedekia a buša, letšatšing la bolesome la kgwedi ya bolesome, Kgoši Nebukadinetsara wa Babilona o ile a tla le mašole a gagwe ka moka go tlo hlasela Jerusalema. Ba ile ba e dikanetša ka ditente gomme ba aga leboto go e dikologa gore ba lwe le yona.
2 Ka gona ba ile ba hloma ditente go dikologa motse wo go fihla ngwageng wa bo-11 wa ge go buša Kgoši Tsedekia.
3 Ka letšatši la senyane la kgwedi ya bone, go ile gwa wa tlala e kgolo mo motseng, gomme batho ba mo nageng ba be ba se na dijo.
4 Leboto la motse le ile la thubiwa, gomme mašole ka moka a tšhaba motseng bošego a tšwa ka tsela yeo e lego magareng ga maboto a mabedi yeo e lego kgauswi le serapa sa kgoši, mola Bakaladea ba be ba dikaneditše motse, gomme kgoši ya tšwela pele e sepela ka tsela ya Araba.
5 Eupša mašole a Bakaladea a ile a rakediša Kgoši Tsedekia a mo swara leganateng la Jeriko, gomme mašole a gagwe ka moka a be a gašane gohle a mo tlogetše.
6 Ke moka mašole a Bakaladea a ile a swara kgoši yeo a e tliša go kgoši ya Babilona kua Ribila gore a e ahlole.
7 Barwa ba Tsedekia ba ile ba bolawa pele ga gagwe, ke moka Kgoši Nebukadinetsara a foufatša Tsedekia gomme a mo tlema ka diketane tša koporo a mo iša Babilona.
8 Ka letšatši la bošupa la kgwedi ya bohlano, ke gore ngwageng wa bo-19 wa ge go buša Kgoši Nebukadinetsara wa Babilona, Nebusaradani yo e bego e le molaodi wa batho bao ba letago motse, yoo e bile e bego e le mohlanka wa kgoši ya Babilona, o ile a tla Jerusalema.
9 O ile a fiša ntlo ya Jehofa, ntlo ya kgoši le dintlo ka moka tša Jerusalema. Le gona o ile a fiša dintlo ka moka tša batho ba go tuma.
10 Mašole ka moka a Bakaladea ao a bego a na le molaodi wa batho ba go leta motse a ile a phušola maboto ka moka ao a bego a agilwe go dikologa Jerusalema.
11 Nebusaradani yoo e bego e le molaodi wa batho ba go leta motse o ile a tšea batho ka moka bao ba bego ba šetše motseng a ba iša bothopša, a tšea le batho ka moka bao ba bego ba tšhabetše go kgoši ya Babilona, a ba a tšea le batho ka moka bao ba bego ba le nageng.
12 Eupša molaodi wa batho ba go leta motse, o ile a tlogela ba bangwe ba batho bao ba diilago nageng gore ba leme mašemo a diterebe e bile ba šome ka go gapeletšwa.
13 Bakaladea ba ile ba pšhatlaganya diphilara tša koporo tša ntlong ya Jehofa, dikarikana gotee le sebjana se segolo sa koporo seo se bitšwago Lewatle seo se bego se le ka ntlong ya Jehofa, gomme ba rwala koporo ya tšona ka moka ba e iša Babilona.
14 Le gona ba ile ba tšea le dilo tša go olela melora, digarafo, dilo tša go tima mabone, dikomiki gotee le dilo ka moka tša koporo tšeo di bego di dirišwa ka tempeleng.
15 Molaodi wa batho ba go leta motse a tšea dibjana tša go swara magala, dibjana, le dibjana tšeo di dirilwego ka gauta ya nnete le silifera ya nnete.
16 Go be go sa kgonege go kala boima bja koporo yeo e dirišitšwego go dira diphilara tše pedi, sebjana se segolo seo se bitšwago Lewatle, le dikarikana tšeo Kgoši Solomone a bego a di diretše ntlo ya Jehofa.
17 Philara e nngwe le e nngwe ya diphilara tšeo e be e le ya botelele bja dimithara tše seswai,* gomme hlogwana ya philara e be e dirilwe ka koporo. Botelele bja hlogwana yeo e be e le dimithara tše pedi.* Digarenate le dilo tša go kgabiša tšeo di bego di le godimo ga yona go e dikologa, ka moka di be di dirilwe ka koporo. Philara ya bobedi e be e swana le ya pele gotee le dilo tša yona tša go kgabiša.
18 Le gona molaodi wa batho ba go leta motse a tšea Seraya moperisita yo mogolo le Tsefanya e lego moperisita yo a thušago moperisita yo mogolo, gotee le batho ba bararo ba go leta mojako.
19 Mo motseng o ile a tšea le mohlanka o tee wa ka mošate yo e bego e le molaodi wa mašole, a tšea le baeletši ba bahlano ba kgoši bao ba bego ba le mo motseng gotee le mongwaledi wa molaodi wa mašole yo a bego a kgoboketša mašole ao a yago ntweng. O ile a tšea le banna ba 60 ba maemo a tlasana mo nageng bao ba bego ba sa le mo motseng.
20 Nebusaradani molaodi wa batho ba go leta motse a tšea batho bao a ba iša go kgoši ya Babilona kua Ribila.
21 Kgoši ya Babilona ya ba hlasela gomme ya ba bolaela kua Ribila nageng ya Hamathi. Ke moka Bajuda ba ile ba tšewa nageng ya bona ba išwa bothopša.
22 Nebukadinetsara kgoši ya Babilona o ile a kgetha Gedalia morwa wa Ahikama morwa wa Shafane gore a hlokomele batho bao ba bego ba šetše nageng ya Juda.
23 Ge balaodi ba mašole ka moka le mašole a bona ba ekwa gore kgoši ya Babilona e kgethile Gedalia, ba ile ba ya Mitsipa go Gedalia ka yona nako yeo. E be e le Ishimaele morwa wa Nethania, Johanana morwa wa Karea, Seraya morwa wa Tanuhumethe wa Monetofa le Jesania morwa wa Momaakati gotee le mašole a bona.
24 Gedalia a direla balaodi ba mašole le mašole a bona keno, a re: “Le se ke la tšhošwa ke go ba bahlanka ba Bakaladea. Dulang mo nageng gomme le hlankele kgoši ya Babilona ke moka dilo di tla le sepelela gabotse.”
25 Ka kgwedi ya bošupa Ishimaele morwa wa Nethania morwa wa Elishama wa leloko la bogošing o ile a tla le banna ba bangwe ba lesome ba hlasela Gedalia gomme ba mmolaya, ba bolaya le Bajuda le Bakaladea bao ba bego ba na le yena kua Mitsipa.
26 Ka morago ga moo batho ka moka, go tloga ka yo mogolo go fihla ka yo monyenyane gotee le balaodi ba mašole, ba ile ba ya Egepeta ka gobane ba be ba tšhošitšwe ke Bakaladea.
27 Ka di-27 tša kgwedi ya bo-12 e lego ngwaga wa bo-37 wa ge Kgoši Jehoyakini wa Juda a le bothopša, e lego ngwageng woo Efila-merodaka a bilego kgoši ya Babilona ka wona, o ile a lokolla Kgoši Jehoyakini wa Juda teronkong.
28 O ile a mo swara gabotse gomme a mo nea maemo a phagamego go feta a dikgoši tše dingwe tšeo di bego di na le yena Babilona.
29 Ke moka Jehoyakini a apola diaparo tša gagwe tša ka teronkong, gomme a dula a eja pele ga kgoši bophelo bja gagwe ka moka.
30 O be a dula a newa dijo tšeo di tšwago go kgoši ya Babilona letšatši le letšatši, bophelo bja gagwe ka moka go fihlela a hlokofala.
Mengwalo ya tlase
^ Phetolelo ya lentšu ka lentšu e re, “dikubiti tše 18.” Bona Dit. B14.
^ Phetolelo ya lentšu ka lentšu e re, “dikubiti tše tharo.” Bona Dit. B14.
