Puku ya Bobedi ya Dikgoši 23:1-37
23 Kgoši ya romela molaetša gomme gwa kgoboketšwa banna ba bagolo ka moka ba Juda le ba Jerusalema.
2 Ke moka kgoši ya ya ntlong ya Jehofa e na le banna ka moka ba Juda, le badudi ka moka ba Jerusalema, baperisita le baporofeta, ke gore batho ka moka go tloga ka yo mogolo go fihla ka yo monyenyane. Ya ba balela dilo ka moka tšeo di bego di ngwadilwe ka pukung ya kgwerano yeo e bego e hweditšwe ka ntlong ya Jehofa, gomme bona ba theeditše.
3 Kgoši ya ema kgauswi le philara gomme ya dira kgwerano* pele ga Jehofa. E ile ya tshepiša gore e tla dira dilo ka moka tšeo kgwerano yeo e ngwadilwego ka pukung e bego e di nyaka le gore e tla dula e ekwa Jehofa le go latela melao ya gagwe le ditaelo tša gagwe ka pelo ya yona ka moka, dikgopotšo tša gagwe le melao ya gagwe ka pelo ya yona ka moka le ka moya* wa yona ka moka. Ke moka setšhaba ka moka sa dumelelana le kgwerano yeo.
4 Josia a laela Hilikia moperisita yo mogolo, baperisita ba bangwe le baletamejako gore ba ye ka tempeleng ya Jehofa gomme ba ntšhe dibjana ka moka tšeo di bego di diretšwe Baali, tšeo di diretšwego kota e kgethwa,* letšatši, ngwedi le dinaledi. O ile a di fišetša ka ntle ga Jerusalema mebotong ya Kidirone gomme a iša melora ya tšona Bethele.
5 A raka baperisita ba medimo ya maaka bao dikgoši tša Juda di bego di ba kgethile gore ba dire dihlabelo tšeo di thuntšhago muši mafelong a phagamego ao go rapelwago go ona ao a lego metseng ya Juda le ditikologong tša Jerusalema, le bao ba bego ba dira dihlabelo tšeo di thuntšhago muši ba di direla Baali, letšatši, ngwedi, dihlopha tša dinaledi le dinaledi tše dingwe ka moka.
6 A tšea kota e kgethwa yeo e bego e le ka ntlong ya Jehofa, a e ntšhetša ka ntle ga Jerusalema, Moeding wa Kidirone, gomme a e fišetša gona moo Moeding wa Kidirone, a e šila go fihlela e e ba lerole gomme a gašanya lerole la yona mabitleng a batho bohle.
7 A ba a phušola le dintlo tša banna bao ba rekišago mmele ka tempeleng tšeo di bego di le ka ntlong ya Jehofa, moo basadi ba bego ba loga ditente ba di logela kota e kgethwa.
8 Ke moka a ntšha baperisita ka moka metseng ya Juda gomme a dira gore mafelo a phagamego ao go rapelwago go ona moo baperisita ba bego ba dira dihlabelo tšeo di thuntšhago muši, e be ao a šilafetšego go tloga Geba go fihla Beresheba. Ya ba ya phušola mafelo a phagamego ao a bego a le moo go tsenwago gona keiting ya Joshua, yoo e lego moetapele wa motse. Mafelo ao a be a le ka lehlakoreng le letshadi ge motho a tsena ka keiti ya motse.
9 Baperisita ba mafelong a phagamego ga se ba ka ba hlankela aletareng ya Jehofa kua Jerusalema, eupša ba ile ba ja dinkgwa tše di sa omelwago gotee le bana babo bona.
10 Le gona, Josia o ile a šilafatša lefelo la borapedi la Thofethe leo le bego le le Moeding wa Barwa ba Hinomo,* e le gore go se ke gwa ba le motho yoo a dirago sehlabelo ka morwa wa gagwe goba morwedi wa gagwe* a direla Mmoleke.
11 Le gona, o ile a thibela dipere tšeo dikgoši tša Juda di bego di di neetše gore di dirišwe ge go rapelwa letšatši, a di thibela gore di se ke tša tsena ka ntlong ya Jehofa di feta ka phapošing ya go jela ya Nathane-meleke yoo e lego mohlankedi wa kgoro, yeo e bego e le ntlong ya diphilara. Le gona o ile a tšea dikariki tša ntwa tšeo di bego di dirišwa ge go rapelwa ntwa a di fiša mollong.
12 Le gona, Kgoši Josia o ile a phušola dialetare tšeo dikgoši tša Juda di bego di di dirile godimo ga tlhaka ya phaphoši ya Ahasi* gotee le dialetare tšeo Manase a bego a di dirile ka malapeng a mabedi a ntlo ya Jehofa. Josia o ile a di pšhatlaganya gomme a gašanya lerole la tšona Moeding wa Kidirone.
13 O ile a šilafatša mafelo a phagamego ao go rapelwago go ona ao a bego a le pele ga Jerusalema, ka thoko ya borwa bja Thaba ya Tshenyego,* ao Solomone kgoši ya Isiraele a bego a a agetše Ashiterothe, e lego modimo yo a šišimišago wa Basidoni, Kemoshi e lego modimo yo a šišimišago wa Bamoaba le Milikomo e lego modimo yo a šišimišago wa Baamoni.
14 O ile a pšhatlaganya diphilara tše kgethwa, a rema dikota tše kgethwa gomme a tlatša mafelo a tšona ka marapo a batho.
15 O ile a ba a phušola le aletare yeo e bego e le Bethele, e lego lefelo le le phagamego leo Jeroboama morwa wa Nebata a bego a le dirile, leo le dirilego gore Baisiraele ba dire sebe. Ka morago ga gore a phušole aletare le lefelo le le phagamego, o ile a fiša lefelo leo. A le šila go fihlela e e ba lerole gomme a fiša le kota e kgethwa.
16 Ge Josia a retologa gomme a bona mabitla ao a bego a le thabeng, o ile a laela gore marapo a ditopo tšeo a tšewe gomme a fišetšwe godimo ga aletare gomme seo sa dira gore e se sa swanelega go dirišetšwa borapedi. Se se diragetše e le go phethagatša seo Jehofa a bego a se boletše a diriša moporofeta wa gagwe.
17 Ke moka a re: “Leswika lela ke le lebeletšego ke la eng?” Ke moka banna ba mo motseng ba re go yena: “Ke lebitla la moporofeta wa Modimo wa nnete yoo a bego a etšwa Juda yoo a ilego a bolela e sa le pele ka dilo tše o di dirilego ka aletare yeo e lego Bethele.”
18 Ka gona a re: “Le se ke la dumelela motho a kgoma marapo a gagwe, a tlogeleng a le bjalo.” Ka gona ba tlogela marapo a gagwe a le bjalo gotee le marapo a moporofeta yoo a bego a etšwa Samaria.
19 Josia o ile a tloša le dintlo ka moka tša borapedi tšeo di bego di le mafelong a phagamego ao go rapelwago go ona ao a bego a le metseng ya Samaria. Dintlo tšeo di be di agilwe ke dikgoši tša Isiraele e le gore di kgopiše Modimo. A di dira dilo tšeo a bego a di dirile mafelong a phagamego ao go rapelwago go ona ao a bego a le Bethele.
20 O ile a tšea baperisita ka moka ba mafelong a phagamego gomme a ba bolaela dialetareng. A fišetša marapo a batho dialetareng tšeo. Ka morago ga moo a boela Jerusalema.
21 Bjale kgoši Josia a laela setšhaba ka moka a re: “Direlang Jehofa Modimo wa lena paseka go ya ka seo se ngwadilwego ka pukung ye ya kgwerano.”
22 Ga se gwa ka gwa swarwa Paseka ya go swana le ye go tloga mehleng ya ge baahlodi ba be ba ahlola Isiraele go fihla mehleng ya dikgoši tša Isiraele le tša Juda.
23 Le gona, ka ngwaga wa bo-18 wa ge go buša Kgoši Josia, Bajuda ba ile ba direla Jehofa Paseka e kgethegilego kua Jerusalema.
24 Josia a fediša le batho bao ba rego ba boledišana le bahu le bao ba rego ba botša batho dilo tšeo di tlago go direga nakong e tlago, medingwana ya lapa,* medingwana e šišimišago* le dilo ka moka tše di šišimišago tšeo di bego di le gona nageng ya Juda le Jerusalema, e le gore a phethagatše mantšu a Molao ao a bego a ngwadilwe ka pukung yeo moperisita Hilikia a bego a e hweditše ka ntlong ya Jehofa.
25 Go be go sa ka gwa ba le kgoši yeo e swanago le yena pele ga gagwe yeo e ilego ya boela go Jehofa gomme ya mo hlankela ka pelo ya yona ka moka, ka moya wa yona ka moka le ka matla a yona ka moka go ya ka seo se bego se ngwadilwe Molaong wa Moshe. Le gona ka morago ga gagwe ga sa nka gwa ba le wa go swana le yena.
26 Lega go le bjalo Jehofa o ile a dula a galefetše Bajuda ka baka la dilo ka moka tše di kgopišago tšeo Manase a bego a di dira e le gore a mo kgopiše.
27 Jehofa a re: “Ke tla tloša le Juda pele ga ka go swana le ge ke ile ka tloša Isiraele. Le gona ke tla lahla motse woo ke o kgethilego, e lego Jerusalema le ntlo yeo ke ilego ka bolela ka yona ka re: ‘Leina la ka le tla dula mo go ya go ile.’”
28 Ditaba ka moka tša Josia le dilo ka moka tšeo a di dirilego di ngwadilwe ka pukung ya histori ya mehleng ya dikgoši tša Juda.
29 Mehleng ya Kgoši Josia, Farao Neko, e lego kgoši ya Egepeta, o ile a tla go lwa le kgoši ya Asiria kgauswi le Noka ya Eforate, gomme Kgoši Josia a ya go lwa le yena. Eupša ge Neko a mmona, o ile a mmolaela Megido.
30 Ka gona bahlanka ba gagwe ba mo rwala ka kariki ya ntwa go tloga Megido gomme ba mo iša Jerusalema ke moka ba mmolokela lebitleng la gagwe. Ke moka setšhaba sa nageng yeo sa tšea Jehoahase morwa wa Josia sa mo tlotša gomme sa mmea gore e be kgoši legatong la tatagwe.
31 Jehoahase o be a na le mengwaga e 23 ge a eba kgoši gomme o bušitše Jerusalema ka dikgwedi tše tharo. Leina la mmagwe e be e le Hamutala morwedi wa Jeremia wa go tšwa Libina.
32 O ile a thoma go dira dilo tše mpe pele ga Jehofa go swana le kamoo borakgolokhukhu ba gagwe ba ilego ba di dira.
33 Farao Neko a golega Jehoahase kua Ribila nageng ya Hamathi e le gore a se ke a buša kua Jerusalema, ke moka a laela gore batho ba nageng yeo ba ntšhe silifera yeo e imelago dikhilokgerama tše 3 400 (dikete tše tharo le makgolo a mane) le gauta yeo e imelago dikhilokgerama tše 34.*
34 Le gona Farao Neko o ile a bea Eliakima morwa wa Josia gore e be kgoši legatong la tatagwe gomme a fetoša leina la gagwe gore e be Jehoyakima. Ke moka a tšea Jehoahase a mo tliša Egepeta moo mafelelong a ilego a hwela gona.
35 Jehoyakima o ile a fa Farao silifera le gauta. Eupša o ile a swanelwa ke go patediša batho ba nageng yeo motšhelo e le gore a kgone go fa Farao silifera yeo a bego a e nyaka. O be a nyaka gore motho yo mongwe le yo mongwe yoo a bego a dula moo nageng a ntšhe motšhelo e le gore a tle a o fe Farao Neko.
36 Jehoyakima o be a na le mengwaga e 25 ge a eba kgoši, gomme o bušitše Jerusalema ka mengwaga e 11. Leina la mmagwe e be e le Sebida morwedi wa Pedaya wa go tšwa Ruma.
37 O ile a tšwela pele a dira dilo tše mpe pele ga Jehofa, go swana le kamoo borakgolokhukhu ba gagwe ba ilego ba di dira.
Mengwalo ya tlase
^ Goba, “ya mpshafatša kgwerano.”
^ Bona Tlhaloso ya Mantšu.
^ Bona Tlhaloso ya Mantšu.
^ Bona Tlhaloso ya Mantšu, “Gehenna.”
^ Phetolelo ya lentšu ka lentšu e re, “go fetiša morwa wa gagwe goba morwedi wa gagwe mollong.”
^ Ke gore, phaphoši ya gagwe ya ka godimo.
^ Ke gore, Thaba ya Mehlware, kudukudu karolo ya ka borwa yeo e tsebjago e le Thaba ya Kgopišo.
^ Phetolelo ya lentšu ka lentšu e re, “terafimi.”
^ Lentšu la Seheberu leo le sepedišanago le “šišimišago” le ka bolela boloko goba selo seo motho a ka se nyakego go se lebelela.
^ Goba, “ditalente tše 100 tša silifera le talente e tee ya gauta.” Talente e tee e lekana le dikhilokgerama tše 34,2. Bona Dit. B14.
