Puku ya Pele ya Samuele 9:1-27
-
Samuele o kopana le Saulo (1-27)
9 Go be go na le monna yo mongwe wa moloko wa Benjamini yo a bego a humile kudu. Leina la gagwe e be e le Kishe, morwa wa Abiele, morwa wa Tseroro, morwa wa Bekorathe, morwa wa Afia.
2 O be a na le morwa yo a bitšwago Saulo. Saulo e be e sa le moswa e bile a le botse. Le gona go be go se na monna gare ga Baisiraele yo a bego a mo phala ka bobotse e bile o be a feta batho ka moka ka botelele gomme batho ba bangwe ka moka ba mo goma ka magetla.
3 Ge ditonki* tša Kishe tatago Saulo di be di timetše, Kishe o ile a re go Saulo morwa wa gagwe: “Hle tšea yo mongwe wa bahlanka le yo nyaka ditonki tšeo.”
4 Ba phatša tikologong ya dithabeng tša Efuraime le nageng ya Shalisha, eupša ba se di hwetše. Ba phatša nageng ya Shaalima, eupša ba se di hwetše. Ba phatša le nageng ya Babenjamini, eupša le gona moo ba se di hwetše.
5 Ba tla nageng ya Tsufi gomme Saulo a re go mohlanka wa gagwe yo a bego a na le yena: “A re boele morago gore tate a se ke a thoma go tshwenyega ka rena go e na le go tshwenyega ka ditonki tša gagwe.”
6 Eupša Mohlanka yoo a re go yena: “Go na le monna wa Modimo motseng wo, yoo batho ba mo hlomphago kudu. Dilo ka moka tšeo a di bolelago di a phethega. A re ye moo gona bjale. Mohlomongwe a ka re botša gore re ka hwetša ditonki kae.”
7 Ge Saulo a ekwa seo, a re go mohlanka wa gagwe: “Ge e ba re eya moo, re tla ya re mo swaretše’ng? Re feletšwe ke dijo ka mekotleng ya rena gomme ga go na seo re ka se fago monna wa Modimo wa nnete e le mpho. Re tla mo fa’ng?”
8 Mohlanka a buša a re go Saulo: “Ke swere siliferanyana,* ke tla e fa monna wa Modimo wa nnete gomme yena o tla re botša gore re ka hwetša ditonki kae.”
9 (Mehleng yeo kua Isiraele, ge motho a be a nyaka go nyakišiša go Modimo, o be a re: “A re yeng go mmoni,” ka gobane moporofeta wa lehono, mehleng yeo o be a bitšwa mmoni.)
10 Ke moka Saulo a re go mohlanka wa gagwe: “Moo o a bolela. A re ye.” Ke moka ba ya motseng woo monna wa Modimo wa nnete a bego a le go wona.
11 Ge ba be ba rotoga ba eya motseng, ba hwetša banenyana ba eya go kga meetse. Ba re go bona: “Na go na le mmoni motseng wo?”
12 Banenyana bao ba re: “O gona. Ke yola o le etile pele. Phakišang ka gobane lehono o tlile motseng, ka gobane batho ba dira sehlabelo lefelong le le phagamego lehono.
13 Ge le se na go tsena motseng le tla mo hwetša pele ga ge a rotogela lefelong le le phagamego go yo ja. Batho ba ka se je go fihlela ge a fihla ka gobane ke yena a šegofatšago sehlabelo. Ka morago ga moo, bao ba laleditšwego ba ka ja. Bjale rotogang gona bjale ka gobane le tla mo hwetša.”
14 Ke moka ba ya motseng. Ge ba tsena gare ga motse, Samuele a tla go tlo ba gahlanetša e le gore a rotogele le bona lefelong le le phagamego.
15 Jehofa yena o be a lomile Samuele tsebe letšatšing la pele ga ge Saulo a ka tla. O be a itše:
16 “Gosasa ka yona nako ye, ke tla go romela monna yo a tšwago nageng ya Benjamini. O swanetše go mo tlotša* gore e be moetapele wa batho ba ka ba Isiraele gomme o tla phološa batho ba ka go Bafilisita ka gobane ke bone mohlako wa batho ba ka e bile ke kwele sello sa bona.”
17 Ge Samuele a bona Saulo, Jehofa a re go yena: “Šo monna yo ke go boditšego ka yena ka re: ‘Yo ke yena yo a tlago go buša batho ba ka.’”
18 Ke moka Saulo a ya go Samuele keiting gomme a re: “Hle mpotše gore ntlo ya mmoni e kae?”
19 Samuele a araba Saulo a re: “Ke nna mmoni. Nketeng pele re rotogele lefelong le le phagamego gomme le tle le je le nna lehono, ke moka gosasa mesong ke tla go botša dilo ka moka tšeo o nyakago go di tseba.*
20 O se ke wa tshwenyega ka ditonki tšeo di bego di timetše matšatšing a mararo a fetilego ka gobane di hweditšwe. Dilo ka moka tšeo di rategago tša Isiraele ke tša mang? Na ga se tša gago le tša ntlo ka moka ya tatago?”
21 Ge a re’alo, Saulo a re: “Na ga ke Mobenjamini wa moloko o monyenyane kudu go meloko ya Isiraele, gomme na lapa lešo ga se leo le nyatšegago kudu go malapa ka moka a moloko wa Benjamini? Bjale ke ka baka la’ng o bolela le nna ka tsela ye?”
22 Ke moka Samuele a tšea Saulo le mohlanka wa gagwe a ya le bona phapošing ya go jela. A ba fa madulo a maemo a godimo gare ga bao ba laleditšwego. Go be go na le banna ba e ka bago ba 30.
23 Ka morago Samuele a re go moapei: “Tliša nama ye ke go filego yona, yeo ke go boditšego gore o e beele ka thoko.”
24 Ke moka moapei a tliša leoto a le bea pele ga Saulo. Samuele a re: “Ye ke nama yeo e bego e beetšwe ka thoko. Eja ka ge e be e beetšwe wena gore o tle o e je letšatšing le ka gobane ke ba boditše gore ke na le baeng.” Ka gona Saulo a ja le Samuele letšatšing leo.
25 Ke moka ba theogela motseng ba etšwa lefelong le le phagamego. Samuele a tšwela pele a bolela le Saulo ba le godimo ga ntlo.
26 Ba tsoga e sa le ka masa gomme ge letšatši le hlaba, Samuele a bitša Saulo yoo a bego a robetše godimo ga ntlo, a re: “Itokiše gore ke go felegetše.” Ka gona, Saulo a itokiša gomme bobedi bja bona ba tšwela ka ntle.
27 Ge ba theoga ba etšwa motseng, Samuele a re go Saulo: “E re mohlanka wa gago a re ete pele, fela wena ema e le gore ke go botše lentšu la Modimo.” Ke moka mohlanka yoo a ba eta pele.
Mengwalo ya tlase
^ Phetolelo ya lentšu ka lentšu e re, “ditonki tše tshadi.”
^ Phetolelo ya lentšu ka lentšu e re, “Kotara ya Shekele ya silifera.” Shekele e be e lekana le dikgerama tše 11,4. Bona Dit. B14.
^ Bona Tlhaloso ya Mantšu.
^ Phetolelo ya lentšu ka lentšu e re, “dilo ka moka tšeo di lego pelong ya gago.”
