Puku ya Pele ya Dikoronika 23:1-32
23 Ge Dafida a be a tšofetše e bile a le kgauswi le go hlokofala, o ile a bea Solomone morwa wa gagwe gore e be kgoši ya Isiraele.
2 Ke moka a kgoboketša baetapele ba Baisiraele, baperisita le Balefi.
3 Go be go balwa Balefi bao ba bego ba na le mengwaga e 30 go ya godimo. Palo ya bona ka moka ge go balwa monna yo mongwe le yo mongwe, e be e le ba 38 000 (dikete tše masometharo-seswai).
4 Go bona ba, go be go na le ba 24 000 (dikete tše masomepedi-nne) bao ba bego ba hlokomela mošomo wa ntlong ya Jehofa e bile go be go na le ba 6 000 (dikete tše tshelelago) bao e bego e le bahlankedi ba kgoro le baahlodi.
5 Le gona, go be go na le ba 4 000 (dikete tše nne) bao ba bego ba leta dikeiti le ba bangwe ba 4 000 (dikete tše nne) bao ba bego ba tumiša Jehofa ka diletšo tšeo Dafida a boletšego ka tšona a re: “Ke di diretše go tumiša Modimo.”
6 Ke moka Dafida a ba bea* go ya ka dihlopha tša barwa ba Lefi, e lego Gerishone, Kohathe le Merari.
7 Go Bagerishone ya ba Ladana le Shimei.
8 Barwa ba Ladana e be e le ba bararo. Moetapele wa bona e be e le Jehiele gwa latela Sethama le Joele.
9 Barwa ba Shimei* e le ba bararo, e le Shelomotha, Hasiele le Harane. Ka moka ga bona e be e le baetapele ba malapa a moloko wa Ladana.
10 Barwa ba Shimei* e be e le ba bane, e le Jahathe, Tsina, Jeushi le Beria. Ka moka ga bona e be e le barwa ba Shimei.
11 Jahathe e be e le moetapele gomme a latelwa ke Tsisa. Eupša ka ge Jeushi le Beria ba be ba se na barwa ba bantšhi, ba ile ba wela molokong o tee wa botatago bona e bile ba be ba filwe mošomo o tee gore ba o dire e le lapa.
12 Barwa ba Kohathe e be e le ba bane, e le Amorama, Itsehara, Heburone le Usiele.
13 Barwa ba Amorama e be e le Arone le Moshe. Eupša Arone o ile a kgethwa gore a dule a kgethagatša Sekgethwakgethwa. Yena le barwa ba gagwe ba be ba swanetše go dira dihlabelo pele ga Jehofa, ba mo hlankele le go dula ba šegofatša batho ka leina la gagwe.
14 Ge e le Moshe mohlanka wa Modimo wa nnete, barwa ba gagwe ba ile ba balwa e le karolo ya moloko wa Balefi.
15 Barwa ba Moshe e be e le Gerishome le Eliesere.
16 Go barwa ba Gerishome, Shebuele e be e le moetapele.
17 Go ditlogolo* tša Eliesere, Rehabia e be e le yena moetapele. Eliesere o be a se na barwa ba bangwe, eupša barwa ba Rehabia e be e le ba bantšhi.
18 Go barwa ba Itsehara, Shelomithe e be e le moetapele.
19 Moetapele wa barwa ba Heburone e be e le Jeria, wa bobedi e le Amaria, wa boraro e le Jahasiele gomme wa bone e le Jekameama.
20 Barwa ba Usiele e be e le Mika yoo e bego e le moetapele gomme wa bobedi e le Isishia.
21 Barwa ba Merari e be e le Maheli le Mushi. Barwa ba Maheli e be e le Eleasara le Kishe.
22 Eleasara o ile a hlokofala. O be a na le barwedi feela eupša a se na barwa. Ka gona barwa ba Kishe, e lego batswala* ba bona, ba ile ba ba nyala.
23 Barwa ba Mushi e be e le ba bararo, e le Maheli, Edere le Jeremothe.
24 Ba e be e le barwa ba Lefi go ya ka malapa a botatago bona, bona baetapele ba malapa a botatago bona. Balefi bao ba nago le mengwaga e 20 go ya godimo ba be ba balwa le go ngwadišwa go ya ka maina a bona. Le gona ba be ba filwe mošomo wa go hlankela ntlong ya Jehofa.
25 Ka gobane Dafida o be a itše: “Jehofa Modimo wa Isiraele o khutšišitše setšhaba sa gagwe gomme o tla dula Jerusalema go ya go ile.
26 Le gona Balefi ba ka se sa rwala taberenakele goba dibjana le ge e le dife tša yona tšeo di dirišwago borapeding.”
27 Ka gobane, go ya ka ditaelo tša mafelelo tša Dafida, go be go balwa Balefi bao ba bego ba na le mengwaga e 20 go ya godimo.
28 Mošomo wa bona e be e le go thuša barwa ba Arone ge ba hlankela ntlong ya Jehofa, go hlokomela malapa a ntlo yeo, diphapoši tša go jela, go hlwekiša selo se sengwe le se sengwe se sekgethwa le go dira mošomo o mongwe le o mongwe woo o bego o nyakega ka ntlong ya Modimo wa nnete.
29 Ba be ba thuša ka go lokišetša senkgwa seo se hlatlagantšwego,* folouru yeo e šitšwego gabotse ya go dira sebego sa mabele, diphaphatha tše di sa omelwago, dinkgwa tša go gadikwa paneng, folouru yeo e dubilwego gabotse le go kala dilo ka moka tšeo di sa lekanego ka bontšhi le ka bogolo.
30 Ba be ba swanetše go ema e le gore ba leboge Jehofa le go mo reta mesong e mengwe le e mengwe le mantšiboa a mangwe le a mangwe.
31 Nako le nako ba be ba thuša ge dihlabelo tša go fišwa di be di neelwa Jehofa ka Sabatha e nngwe le e nngwe, ge ngwedi o moswa o thoma go bonala le nakong ya menyanya, go ya ka seo se bego se ngwadilwe molaong. Le gona ba be ba dira bjalo pele ga Jehofa ka mehla.
32 Ba be ba swanetše go hlokomela le tente yeo go kopanwago go yona, lefelo le lekgethwa le banababo bona bao e lego barwa ba Arone bao ba bego ba hlankela ntlong ya Jehofa.
Mengwalo ya tlase
^ Goba, “a ba arola.”
^ Go bonagala mo go bolelwa ka Shimei yo mongwe.
^ Go bonagala Shimei yo go bolelwago ka yena e le yo go boletšwego ka yena go tem. 7.
^ Phetolelo ya lentšu ka lentšu e re, “barwa.”
^ Phetolelo ya lentšu ka lentšu e re, “bana babo bona.”
^ Ke gore, senkgwa seo se neetšwego Modimo.
