Puku ya Pele ya Dikoronika 14:1-17
14 Kgoši Hirama wa Tiro a romela batho go Dafida, a romela le dikota tša motsedara, batho bao ba agago ba diriša maswika* le batho bao ba šomago ka kota gore ba mo agele ntlo.*
2 Ka gona Dafida a lemoga gore Jehofa o mmeile gore e be kgoši ya Isiraele, le go mo dira gore e be kgoši e kgolo ka baka la setšhaba sa gagwe sa Isiraele.
3 Dafida o ile a nyala basadi ba bangwe gape kua Jerusalema gomme a ba tatago barwa le barwedi ba bangwe gape.
4 Maina a bana bao ba belegetšwego Dafida kua Jerusalema šea: Shamua, Shobaba, Nathane, Solomone
5 Ibehara, Elishua, Elipelete
6 Noga, Nefege, Jafia
7 Elishama, Beelayada le Elifelete.
8 Ge Bafilisita ba ekwa gore Dafida o tloditšwe gore e be kgoši ya Isiraele, ka moka ga bona ba ile ba tšama ba mo nyaka. Ge Dafida a ekwa seo, a ya go lwa le bona.
9 Ke moka Bafilisita ba tla gomme ba thoma go hlasela batho bao ba bego ba dula Moeding wa Barefaimi.
10 Dafida a botšiša Modimo a re: “Na ke yo lwa le Bafilisita? Na o tla nthuša gore ke ba fenye?” Ge a realo Jehofa a re go yena: “Sepela, gomme ke tla go thuša gore o ba fenye.”
11 Ka gona Dafida a ya Baali-peratsime a ba bolaela gona moo. Ke moka Dafida a re: “Modimo wa nnete o wišitše manaba a ka go swana le leboto leo le wišitšwego ke meetse.” Ke ka baka leo ba ilego ba reela lefelo leo leina ba re ke Baali-peratsime.*
12 Ka gona Bafilisita ba tlogela medimo ya bona moo gomme ge Dafida a be a laela gore e fišwe, e ile ya fišwa mollong.
13 Ka morago Bafilisita ba tla gape gomme ba thoma go hlasela batho bao ba bego ba dula moeding.
14 Dafida a botšiša Modimo wa nnete gape, eupša Modimo a re go yena: “O se ke wa ya go bona o ba lebile. Etla ka morago ga bona ke moka o gahlane le bona mehlašaneng ya Baka.
15 Ge o ekwa mogwanto wa mašole mehlašaneng ya Baka, o hlasele, ka gobane Modimo wa nnete o tla ba a go etile pele gore o a bolaye.”
16 Ka gona, Dafida a dira kamoo Modimo wa nnete a mo laetšego ka gona gomme yena le banna bao a bego a na le bona ba bolaya mašole a Bafilisita go tloga Gibeoni go fihla Getsere.
17 Le gona, Dafida o ile a tuma dinageng ka moka, gomme Jehofa a dira gore ditšhaba ka moka di mmoife.
Mengwalo ya tlase
^ Goba, “batho bao ba agago maboto.”
^ Goba, “mošate.”
^ Leina le le ra gore, “Yo a Nago le Bokgoni bja go Wiša.”
