Lengwalo la Pele le le Yago go Bathesalonika 4:1-18
4 Banabešo, le phela ka tsela yeo e kgahlišago Modimo fela bjalo ka ge re le rutile, eupša bjale re a le eletša le go le kgopela re diriša leina la Morena Jesu gore le tšwele pele le dira seo le go feta.
2 Ka gobane le tseba ditaelo tšeo re le neilego tšona tšeo di tšwago go Morena Jesu.
3 Modimo o nyaka gore le be ba bakgethwa le gore le se ke la itshwara gampe ka tša thobalano.
4 Yo mongwe le yo mongwe wa lena a tsebe go laola mmele wa gagwe e le gore o dule o le o mokgethwa le go hlomphega.
5 Le se ke la ba le dikganyogo tše di feteletšego tša thobalano go swana le batho ba ditšhaba tše dingwe bao ba sa tsebego Modimo.
6 Go se be le motho yo a tshelago melao ya boitshwaro gomme a kweša ngwanabo bohloko. Ka gobane Jehofa ke yena a tlago go otla batho bao ba dirago dilo tše ka moka, fela bjalo ka ge re ile ra le botša le go le lemoša re tiišitše.
7 Modimo ga se a re biletša gore re phele bophelo bjo bo sa hlwekago, eupša o re bileditše gore re be ba bakgethwa.
8 Ka gona motho yo a sa latelego thuto ye ga a nyatše batho, eupša o nyatša Modimo yo a le neago moya wa gagwe o mokgethwa.
9 Eupša ga go hlokege gore re le ngwalele ka taba ya go rata banababo lena, ka gobane Modimo ke yena a le rutilego gore le ratane.
10 Ge e le gabotse le rata banababo lena ka moka ba Matsedonia. Eupša banabešo, re le kgothaletša gore le tšwele pele le rata banababo lena le go feta.
11 Lekang ka thata go phela ka khutšo, ebile le se ke la tsenatsena ditabeng tša batho ba bangwe, gomme le šomeng feela bjalo ka ge re le laetše gore le dire bjalo,
12 e le gore batho bao ba le lebeletšego ba kgone go bona gore le itshwere gabotse ebile ga le hloke selo.
13 Go feta moo banabešo, re nyaka gore le kwešiše gore go tlo direga eng ka bao ba hlokofetšego, e le gore le se ke la nyama go swana le ba bangwe ka moka bao ba se nago kholofelo.
14 Ge e ba re dumela gore Jesu o ile a hwa a ba a tsoga, gona re dumela le gore barutiwa bao ba hwilego ba botegela Jesu, Modimo o tla ba tsoša gore ba be le Jesu.
15 Ke ka baka leo go ya ka lentšu la Jehofa re le botšago gore, rena bao re tla bego re phela nakong ya go ba gona ga Morena re tlo išwa legodimong ka morago ga gore bao ba bego ba šetše ba hlokofetše ba tsošetšwe legodimong.
16 Morena o tla theoga a etšwa legodimong a swere phalafala ya Modimo a goeletša ka lentšu la morongwa yo mogolo, gomme barutiwa ba Kriste bao ba hwilego e tla ba bona ba pele ba go tsoga.
17 Ka morago ga moo rena bao re tla bego re sa phela, re tla rotogela marung gore re be le bona le go kopana le Morena lefaufaung. Ka gona, re tla dula re na le Morena.
18 Bjale tšwelang pele le kgothatšana ka mantšu a.
