Lenyalo le ka se atlege moo go nago le go belaelana le go se tshepane. Ka gona, na o ka phema bjang lehufa le le feteletšego?

Sehlogong se

•  Lehufa ke eng?

•  Ke eng seo se bakago lehufa le le sa kwagalego?

•  Ge e ba o na le lehufa, na o ka le laola bjang?

•  Ge molekane wa gago a na le lehufa

•  Seo go ka boledišanwago ka sona

 Lehufa ke eng?

 Lentšu “lehufa” le ka bolela dilo tša go fapafapana. Mo sehlogong se, le bolela maikwelo ao re bago le ona ge re nagana gore motho yo mongwe o bonala a kgahlwa ke molekane wa rena wa lenyalo goba re nagana gore molekane wa rena wa lenyalo o bontšha go kgahlwa ke motho yo mongwe. Re ka bona eka lenyalo la rena le kotsing. Ge e ba ka nnete go le bjalo, gona lehufa ke ga tlhago gore le be gona e bile go swanetše. Gape lenyalo ke tswalano ya kgauswi kudu yeo e ka bago gona magareng ga batho ba babedi gomme balekane ba swanetše go dira sohle seo ba ka se kgonago go e šireletša.

 Molao wa motheo wa Beibele: “Ga e sa hlwa e le ba babedi, eupša ke nama e tee. . . . Se Modimo a se tlemagantšego jokong go se be le motho yo a se aroganyago.”—Mateo 19:6.

 “Ge e ba lenyalo la gago le le kotsing, lehufa le ka swana le temošo ya go go lemoša gore hlaga e a swa gomme o kgone go gata mogato.”—Benjamin.

 Lega go le bjalo, lehufa le le sa nyakegego le fehlwa ke go gonona mo go se nago motheo. Lerato la kgonthe le re šireletša lehufeng le le bjalo la go gobatša. (1 Bakorinthe 13:4, 7) Ngaka ya monagano, Dr. Robert L. Leahy o ngwala gore: “Dilo tše di dirwago ka baka la lehufa [le le sa kwagalego] di senya yona tswalano yeo o nyakago go e šireletša.” a

 Ke eng seo se bakago lehufa le le sa kwagalego?

 Ge e ba o kile wa se tshepagalelwe ke molekane peleng, o ka ikhwetša o na le go ba le lehufa le le sa kwagalego. Goba mohlomongwe lenyalo la batswadi ba gago le ile la senyega ka baka la go se tshepagale ga yo mongwe wa bona gomme o tšhoga gore o ka diragalelwa ke selo se se swanago.

 “Tate o ile a se tshepagalele mma ge ke be ke sa le yo monyenyane, ka gona go se tshepe batho e sa le e le bothata bja ka. Ke lebadi le le sa folego leo le felago le nyarela lenyalong la ka.”—Melissa.

 Se sengwe gape: Ge e ba o na le go se itshepe, o ka akgofela go gononwa batho ba bangwe gore ba ka thuba lenyalo la gago. O ka ba wa ipotša gomme wa kgolwa le gore, molekane wa gago, ge a ka hwetša sebaka, a ka go tlogela gomme a tšea yo mongwe.

 “Monna wa ka o ile a kgopelwa gore e be lekgetla lenyalong la mogwera wa gagwe, ka gona, ka dinako tše dingwe o be a tlo sepela gotee le lekgetla le lengwe la mosadi. Seo se be se sa nteše di theogela. O ile a swanelwa ke gore a re a ka se kgone.”—Naomi.

 Menyanya ya manyalo e fapafapana go ya ka dinaga, gomme Bakriste ba swanetše go hlahlwa ke melao ya motheo ya Beibele. Na Naomi o be a e lahlile mo nakong ye? Gona bjale ge a lebelela morago o dumela gore o be a se na mabaka a go ba le lehufa. O re: “Ka nako yeo ke be ke na le go se itshepe. Ke be ke nagana gore monna wa ka o mpapiša le basadi ba bangwe, eupša e be e no ba go inaganela, e se therešo.”

 Go sa šetšwe gore lebaka ke lefe, lehufa le le sa swanelago le ka go dira gore o gononwe le go bea molekane wa gago molato wa gore ga a tshepege. Moya wo o bago gona wa go se tshepane o senya lenyalo la gago le bophelo bja gago.

 Molao wa motheo wa Beibele: “Lehufa le swana le bolwetši bja kankere.”—Diema 14:30, Easy-to-Read Version.

  Ge e ba o na le lehufa, na o ka le laola bjang?

 Hlagolela go tshepa molekane wa gago. Nagana ka ditsela tšeo molekane wa gago a bontšhitšego gore o a go tshepagalela ka tšona, go e na le go nyaka maswao a go re eka ga a tshepege.

 “Ke nagana ka dika tše botse tša monna wa ka. Ge a efa motho yo mongwe nako ya gagwe, ke ka gobane o tloga a tshwenyega ka motho yoo, e sego gore o na le maikemišetšo a sa swanelago ka yena. Ke swanetše go ikgopotša gore lenyalo la batswadi ba ka ga se la ka.”—Melissa.

 Sekaseka dipelaelo tša gago. Dr. Leahy, yo a tsopotšwego pejana o ngwadile gore: “Gantši re tšea gore dikgopolo tša rena ke tša therešo. Ke moka kgodišego yeo re nago le yona ya gore re a rereša, re e tšea gore ke bohlatse. Eupša go dumela gore selo se itšego ke therešo ga se gore go se dira gore e be therešo, gomme le go kgodišega ga rena ga se gore ke bohlatse.” b

 “Go no lebelela seemo gomme wa fetša le pelo gore ke therešo go ka baka mathata ao le go ba gona a bego a se gona le mathomong.”—Nadine.

 Boledišanang ka dilo tšeo o tshwenyegago ka tšona. Go sa šetšwe seo se bakago lehufa la gago, boledišana le molekane wa gago ka seo o tshwenyegago ka sona e le gore bobedi bja lena le ka dumelelana ka mellwane yeo e kwagalago ya boitshwaro.

 “Ge le boledišana ka dilo tše, ipotše gore molekane wa gago ga se gore o nyaka go go kweša bohloko eupša le yena o nyaka tharollo. Naganelanang ka botho. Mohlomongwe o na le pelo e nyenyane gomme o letetše mo gontsi go tšwa go molekane wa gago. Goba mohlomongwe molekane wa gago ga a lemoge gore ga a go fe nako yeo e lekanego.”—Ciara.

 Molao wa motheo wa Beibele: “Anke yo mongwe le yo mongwe a tšwele pele a tsoma seo se holago motho yo mongwe, e sego seo se holago yena a nnoši.”—1 Bakorinthe 10:24.