Batho ba bantši bao ba phologilego lehu ka lešobana la nalete ba re ba gopola ba arogantšwe le mebele ya bona goba ba bona seetša se se phadimago goba lefelo le lebotsebotse. Puku ya Recollections of Death e re: ‘Ba bangwe ba re seo ke tokelo ya go bona ganyenyane lefelo le lengwe leo ba tla phelago go lona.’ Gaešita le ge Beibele e sa bolele ka ditiragalo tše bjalo tša batho bao ba phologilego lehu ka lešobana la nalete, e na le therešo ya bohlokwa yeo e bontšhago gore se ga se dipono tša bophelo bjo ba tlago go bo phela ka morago ga lehu.

 Bahu ga ba kwe selo.

Beibele e re bahu “ga ba tsebe selo le gatee.” (Mmoledi 9:5) Ge re ehwa, ga re tšwele pele re phela lefelong le itšego, eupša re kgaotša go ba gona. Thuto ya gore re na le moya wo o tšwelago pele o phela ge mmele o hwile, ga e tšwe ka Beibeleng. (Hesekiele 18:4) Ka gona, dilo le ge e le dife tšeo re naganago gore re di bone nakong ya ge re be re le kgauswi le go hwa e ka se be legodimo, hele goba bophelo bja ka morago ga lehu.

 Latsaro o ile a re go diregile’ng ka morago ga ge a hwile?

Pego ya Beibele ya Latsaro e hlalosa tiragalo ya lehu la kgonthe: O ile a tsošwa ke Jesu ka morago ga ge a hwile matšatši a mane. (Johane 11:38-44) Ge e ba Latsaro a be a thabela bophelo kaekae, Jesu o be a tla ba a dirile selo se sešoro ka go mo tsošetša bophelong mo lefaseng. Lega go le bjalo, Beibele ga e re botše selo ka gore Latsaro o be a phela ka morago ga ge a hwile. Ga go pelaelo gore Latsaro o be a tla re botša selo se itšego ka bophelo bja ka morago ga lehu ge e ba go be go na le seo a se bonego. Ka gona ke mo go kwagalago gore Jesu o ile a swantšha lehu la Latsaro le boroko, e lego seo se bontšhago gore ge a be a hwile o be a sa kwe selo.—Johane 11:11-14.