Kaine e lego ngwana wa mathomo wa banyalani ba pele, o ile a nyala kgaetšedi ya gagwe goba wa leloko la gabo la kgauswi. Re bolela bjalo ka baka la seo Beibele e re botšago sona ka Kaine le lapa la gabo.

Ditherešo ka Kaine le lapa la gabo

•   Batho ka moka ba tšwa go Adama le Efa. “Go tšwa mothong o tee [e lego Adama, Modimo] o dirile setšhaba se sengwe le se sengwe sa batho, gore ba dule godimo ga lefase ka moka.” (Ditiro 17:26) Efa e lego mosadi wa Adama, ke “mmago motho yo mongwe le yo mongwe yo a phelago.” (Genesi 3:​20) Ka baka leo, Kaine o swanetše go ba a ile a nyala yo mongwe wa bana goba ditlogolo tša Adama le Efa.

•   Kaine le ngwanabo e lego Abele ke bana ba mathomo go bana ka moka ba Efa. (Genesi 4:​1, 2) Ka morago ga gore Kaine a rakwe tikologong yeo ba bego ba dula go yona ka ge a bolaile ngwanabo, o ile a bolela gore: “Motho le ge e le ofe yo a nkhwetšago ruri o tlo mpolaya.” (Genesi 4:​14) Kaine o be a tšhaba mang? Beibele e re Adama e bile “tatago barwa le barwedi.” (Genesi 5:4) Go molaleng gore Kaine a ka ba a be a tšhaba bona.

•   Mathomong a histori ya batho go be go tlwaelegile gore motho a nyale wa leloko. Ka mohlala, monna wa go botega e lego Aborahama o ile a nyala ngwana wa tatagwe. (Genesi 20:12) Mengwaga e mentši ka morago ga ge Kaine a hwile, Molao wa Moshe o ile wa thibela manyalo a bjalo. (Lefitiko 18:​9, 12, 13) Go bonagala mehleng yeo, bana ba batho bao ba tswalanago e be e sa be digole go swana le ge go tlwaelegile lehono.

•   Beibele e bolela ka histori ya Adama, Efa le lapa la bona ka tsela e nepagetšego kudu. Puku ya Genesi yeo e ngwadilwego ke Moshe ga se yona feela e bolelago ka histori ya lapa la Adama, eupša Esera le Luka le bona ba ile ba bolela ka lapa la Adama ka tsela e nepagetšego ka dipukung tšeo ba di ngwadilego. (Genesi 5:​3-5; 1 Dikoronika 1:​1-4; Luka 3:​38) Bangwadi ba Beibele ba re botša ka bophelo bja Kaine e le histori ya kgonthe.​—Baheberu 11:4; 1 Johane 3:​12; Juda 11.