Batho ka moka ba na le maina. Na e ka se be mo go kwagalago gore Modimo le yena a be le leina? Go ba le maina le go a diriša go bohlokwa magareng ga bagwera. Na ga se gwa swanela go ba ka tsela yeo tabeng ya segwera sa rena le Modimo?

 Ka Beibeleng, Modimo o re: “Ke nna Jehofa. Ke lona leina la ka.” (Jesaya 42:8) Le ge Modimo a na le direto tše dintši tše bjalo ka “Modimo Ramatlaohle,” “Mmuši Morena” le “Mmopi,” o neile barapedi ba gagwe tokelo ya gore ba mmitše ka leina.—Genesi 17:1; Ditiro 4:24; 1 Petro 4:19.

 Diphetolelo tše dintši tša Beibele di na le leina la Modimo go Ekisodo 6:3. Lengwalo leo le re: “Ke be ke fela ke iponagatša go Aborahama, Isaka le Jakobo ke le Modimo Ramatlaohle, eupša ge e le mabapi le leina la ka e lego Jehofa, ke be ke se ka itsebiša go bona ka botlalo.”

 Phetolelo ya leina la Modimo ka Sepedi ke Jehofa gomme le be le dutše le dirišwa ka nywagakgolo e mentši. Gaešita le ge diithuti tše dintši di kgetha mongwalelo wa leina leo wa “Yahweh,” Jehofa ke sebopego sa leina leo seo se tsebjago kudu ke batho ba bantši. Mathomong, karolo ya pele ya Beibele e be e se ya ngwalwa ka Sepedi eupša e be e ngwadilwe ka Seheberu, e lego leleme leo le balwago go tloga ka go le letona go ya go le letshadi. Lelemeng leo, leina la Modimo le tšwelela e le ditumammogo tše tše nne, יהוה. Ditlhaka tšeo tše nne tša Seheberu—tšeo di fetoletšwego e le YHWH—di tsebja ka gore ke Tetragrammaton.