Khutšo lefaseng e ka se tlišwe ke maiteko a batho, eupša e tla tlišwa ke Mmušo wa Modimo, mmušo wa legodimong woo kgoši ya wona e lego Kriste Jesu. Ela hloko kamoo Beibele e re rutago ka gona mabapi le kholofelo ye e kgahlišago.

1.   Modimo o tla “fediša dintwa go fihla pheletšong ya lefase,” a phethagatša kholofetšo ya gagwe ya go tliša “khutšo lefaseng go bao a ba amogelago!”—Psalme 46:9; Luka 2:14, Good News Translation.

2.   Mmušo wa Modimo o tla buša lefase ka moka go tšwa legodimong. (Daniele 7:14) Ka ge e tla be e le mmušo wa lefase ka moka, o tla fediša botšhaba bjoo e lego modu wa dintwa tše dintši.

3.   Jesu yoo e lego Mmuši wa Mmušo wa Modimo, o bitšwa “Kgošana ya Khutšo,” gomme o tla kgonthišetša gore ‘khutšo ga e fele.’—Jesaya 9:6, 7.

4.   Batho bao ba ikemišeditšego go tšwela pele ba elwa ba ka se dumelelwe go phela ka tlase ga Mmušo woo, ka ge “moya wa [Modimo] o hloile le ge e le mang yo a ratago bošoro.”—Psalme 11:5; Diema 2:22.

5.   Modimo o ruta balata ba gagwe kamoo ba ka phelago ka khutšo. Ge Beibele e hlalosa ditlamorago tša thuto ye, e re: “Batho ba tla rula ditšhoša tša bona ba di dira megoma gomme marumo a bona ba a dira disekela. Setšhaba se ka se emišetše se sengwe tšhoša, e bile di ka se sa hlwa di ithuta ntwa.”—Jesaya 2:3, 4.

 Dihlatse tša Jehofa tše dimilione lefaseng ka bophara di šetše di ithuta go tšwa go Modimo kamoo di ka bago le khutšo. (Mateo 5:9) Gaešita le ge re etšwa ditšong tše dintši tše di sa swanego e bile re dula dinageng tša ka godimo ga tše 230, re gana go lwa le magagabo rena.