Go na le dithapelo tše dingwe tšeo Modimo a sa di arabego. Ela hloko mabaka a mabedi ao a ka dirago gore Modimo a hlokomologe dithapelo tša motho.

1. Thapelo e sa dumelelanego le thato ya Modimo

 Modimo ga a arabe dithapelo tšeo di sa dumelelanego le thato ya gagwe yeo e lego ka Beibeleng. (1 Johane 5:14) Ka mohlala, Beibele e re lemoša gore re pheme megabaru. Go petšha go kgothaletša megabaru. (1 Bakorinthe 6:9, 10) Ka gona, Modimo a ka se arabe thapelo ya gago ge e ba o rapelela go swara lotto. Modimo ga se motho yo re mo rapelago go kgotsofatša dinyakwa tša rena. Ge e le gabotse, o swanetše go leboga gore ga go bjalo. Ge nkabe go be go le bjalo, o be o tla tšhošwa ke go kwa gore batho ba bangwe ba be ba tla kgopela Modimo gore a ba direle eng.—Jakobo 4:3.

2. Thapelo ya lerabele

 Modimo ga a theetše dithapelo tša bao ba ikemišeditšego go mo kgopiša ka ditiro tša bona. Ka mohlala, Modimo o boditše bao ba bego ba ipolela gore ba a mo hlankela eupša ge e le gabotse ba rabela gore: “Gaešita le ge le ka atiša dithapelo, ga ke di theetše; diatla tša lena di tletše madi.” (Jesaya 1:15) Eupša ge ba be ba ka fetoša ditsela tša bona gomme ba ‘lokiša ditaba’ le Modimo, o be a tla theetša ge ba mo rapela.—Jesaya 1:18.