Go swarela ke go lebalela motho yo a go kgopišitšego. Ka Beibeleng lentšu la Segerika la “go swarela” le bolela “go phaela taba ka thoko,” go etša ge motho a sa nyake go patelwa sekoloto se itšego. Jesu o dirišitše papišo ye ge a be a ruta balatedi ba gagwe go rapela ka gore: “Re lebalele dibe tša rena, gobane le rena re lebalela mang le mang yo a nago le molato go rena.” (Luka 11:4) Ka mo go swanago, seswantšhong sa gagwe sa mohlanka yo kgopo, Jesu o ile a swantšha go swarela le go phumola sekoloto.—Mateo 18:23-35.

 Re lebalela ba bangwe ge re phaela ka thoko sekgopi gomme re sa nyake go patelwa bakeng sa bohloko goba tahlegelo yeo re bilego le yona. Beibele e ruta gore lerato leo le se nago boithati ke motheo wa go swarela ba bangwe, ka gore lerato “ga le boloke pego ya bobe.”—1 Bakorinthe 13:4, 5.

Go swarela ga go bolele

•   Go tshediša phošo mahlo. Ge e le gabotse Beibele e kgahlanong le bao ba bolelago gore ditiro tše mpe ga di kotsi goba di a amogelega.—Jesaya 5:20.

•   Go ikgakanya eke ga go na se se diregilego. Modimo o ile a swarela Kgoši Dafida dibe tše dikgolo, eupša ga se a mo šireletša ditlamoragong tša ditiro tša gagwe. Modimo o ile a ba a dira gore dibe tša Dafida di ngwalwe e le gore di gopolwe le lehono.—2 Samuele 12:9-13.

•   Go dumelela ba bangwe ba ikhola ka wena. Ka mohlala, a re re o adimile motho yo mongwe tšhelete gomme o e dirišitše gampe ga bjale ga a sa kgona go e buša go etša ge a holofeditše. O a itshola e bile o go kgopela tshwarelo. O ka kgetha go mo swarela ka go se boloke sekgopi o sa dulele go mmotša ka yona, mohlomongwe wa ba wa phumola sekoloto seo. Lega go le bjalo, o ka ba wa kgetha go se sa mo adima tšhelete.—Psalme 37:21; Diema 14:15; 22:3; Bagalatia 6:7.

•   Go swarela ntle le lebaka. Modimo ga a swarele batho bao ba dirago dibe tše dikgolo ka boomo e bile ba sa amogele diphošo tša bona, ba sa fetoše ditsela tša bona le go kgopela bao ba ba kwešitšego bohloko tshwarelo. (Diema 28:13; Ditiro 26:20; Baheberu 10:26) Batho ba bjalo bao ba sa itsholego e ba manaba a Modimo, e bile ga a letela gore re swarele batho bao a sa ba swarelego.—Psalme 139:21, 22.

   Go thwe’ng ge e ba motho yo mongwe a go dirile selo se bohloko gomme a gana go kgopela tshwarelo goba go dumela seo a se dirilego? Beibele e eletša ka gore: “Lesa go galefa gomme o tlogele go befelwa.” (Psalme 37:8) Le ge o sa phaele phošo ka thoko, o ka gana go laolwa ke kgalefo. Holofela gore Modimo o tla mo ahlola. (Baheberu 10:30, 31) O ka ba wa ikhomotša ka go tseba gore Modimo o tla tliša nako yeo ka yona re ka se sa kwago bohloko bjo bo re imelago gona bjale.—Jesaya 65:17; Kutollo 21:4.

•   Go kgopišwa ke dilo tše dinyenyane. Ka dinako tše dingwe go e na le go swarela mofoši, re ka swanelwa ke go dumela gore re be re se na lebaka le le kwagalago la go kgopišega. Beibele e re: “O se ke wa akgofela go kgopišega moyeng, gobane go kgopišega go agile sehubeng sa ditlaela.”—Mmoledi 7:9.

Kamoo o ka lebalelago motho yo mongwe

1.   Gopola gore go swarela go akaretša eng. Ga o kgothaletše phošo goba wa ikgakanya eke ga gona se se diregilego.

2.   Tseba mehola ya go swarela. Go tloša kgalefo le sekgopi go ka go thuša gore o dule o išitše maswafo fase, gwa kaonefatša bophelo bja gago le go go okeletša lethabo. (Diema 14:30; Mateo 5:9) Sa bohlokwa le go feta, go swarela ba bangwe go bohlokwa kudu gore le wena Modimo a go swarele dibe tša gago.—Mateo 6:14, 15.

3.   E ba le kwelobohloko. Ka moka ga rena ga se ra phethagala. (Jakobo 3:2) Ka ge re nyaka go swarelwa, ka mo go swanago re swanetše go swarela ba bangwe diphošo tša bona.—Mateo 7:12.

4.   Naganela ba bangwe. Ge go na le selo se senyenyane seo se re belaetšago, re ka diriša keletšo ya Beibele yeo e rego: “Tšwelang pele le kgotlelelana.”—Bakolose 3:13.

5.   Tšea kgato ka pela. Katanela go swarela ba bangwe ka pela go e na le go dumelela kgalefo e gola go wena.—Baefeso 4:26, 27.