Beibele e hlalosa ditiragalo le maemo ao a tlago go bontšha gore re phela mehleng ya “bofelo bja tshepedišo [ya gona ba bjale] ya dilo,” goba bofelo bja lefase. (Mateo 24:3) Beibele e bitša dinako tše gore ke “mehla ya bofelo” goba ‘nako ya bofelo.’ (2 Timotheo 3:1; Daniele 8:​19) Diporofeto tše di latelago tša mabapi le mehla ya bofelo di a phethagala:

•   Dintwa tše dintši kudu.​—Mateo 24:7; Kutollo 6:4.

•   Tlala.​—Mateo 24:7; Kutollo 6:5, 6.

•   Ditšhišinyego tše dikgolo tša lefase.​—Luka 21:11.

•   Go ata ga “malwetši” a šoro.​—Luka 21:11.

•   Koketšego ya bosenyi.​—Mateo 24:12.

•   Go senywa ga lefase ke batho.​—Kutollo 11:18.

•   Go oketšega ga batho ba go hloka molao, ba go se “leboge, ba go se botege, . . . ba ba sa ikemišetšago go amogela tumelelano le ge e le efe, bathomeletši, ba se nago boitshwaro, ba bogale, ba go se rate go loka, baeki, ba hlogothata, [le bao] ba tletšego boikgantšho.”​—2 Timotheo 3:1-4.

•   Go phumega ga manyalo, le batho bao ba “se nago lerato la tlhago” gotee le bana “ba go se kwe batswadi.”​—2 Timotheo 3:​2, 3.

•   Batho ba bantši ga ba sa rata Modimo.—Mateo 24:12.

•   Madumedi a mantši a tletše ka bofora.​—2 Timotheo 3:5.

•   Go kwešiša diporofeto tša Beibele kutšwanyana, go akaretša le tšeo di bolelago ka mehla ya bofelo.​—Daniele 12:4.

•   Go bolelwa ga ditaba tše dibotse tša Mmušo wa Modimo lefaseng ka moka.​—Mateo 24:14.

•   Batho ba bantši ga ba šetše selo e bile ba kwera taba ya gore re phela mehleng ya bofelo.​—Mateo 24:37-39; 2 Petro 3:3, 4.

•   Go phethagala ka nako e tee ga diporofeto tše ka moka, e sego feela tše sego kae goba bontši bja tšona.​—Mateo 24:33.

Na re phela “mehleng ya bofelo”?

 Ee. Go latelana ga ditiragalo tšeo di lego ka Beibeleng le maemo a sa kgahlišego a lefase le, go re bontšha gore mehla ya bofelo e thomile ka 1914. Ka ngwaga woo, Mmušo wa Modimo o ile wa thoma go buša legodimong. Selo sa pele seo Mmušo wo o se dirilego ke go raka Sathane le batemona ba gagwe legodimong gomme wa thibela gore ba se dire dilo ka boithatelo mo lefaseng. (Kutollo 12:7-12) Re bona gore Sathane o tutuetša batho ka baka la mekgwa ya bona le ditiro tša bona, e lego seo se dirago gore dinako tše tša mehla ya bofelo go be “thata go lebeletšana le tšona.”—2 Timotheo 3:1.