Mofsa yoo a bitšwago Will o re: “Beibele e ka bonala e tšwafiša, ge e ba o sa tsebe tsela ya maleba ya go e bala.”

 Na o ka rata go tseba gore o ka dira’ng gore o ipshine ka go bala Beibele? Sehlogo se se tla go thuša gore o ka dira seo bjang.

•  Dira gore Mangwalo ao o a balago a phele

•  Dira nyakišišo!

•  Seo dithaka tša gago di se bolelago

 Ge o bala pego e itšego ya Beibele, le wena ipone o le moo tiragalong yeo. O ka dira dilo tše tše tharo:

1.   Kgetha pego ya Beibele yeo o ka ratago go e bala. O ka kgetha go bala tiragalo e itšego ya ka Beibeleng, goba wa kgetha go bala ditemana tše itšego tšeo di bolelago ka bophelo bja Jesu le ba bangwe, go e nngwe ya dipuku tša Diebangedi. Goba o ka kgetha pego e itšego go e nngwe ya diterama tša mmalo wa Beibele tšeo di lego go jw.org/nso.

2.   Bala pego ya Beibele. O ka ipalela yona, goba wa e balela godimo, o na le bagwera goba ba lapa la geno. Motho o tee a ka anega, gomme ba bangwe ya ba batšeakarolo.

3.   Leka e nngwe ya dilo tše di latelago:

   •   Terowa diswantšho tšeo di sepedišanago le pego yeo o balago ka yona. Goba o ka terowa diswantšho tšeo di bontšhago tatelano ya ditiragalo tša pego yeo o e balago. Ka tlase ga diswantšho tšeo, hlalosa seo se diregago.

   •   Thala diswantšho tšeo di hlalosago pego yeo o e balago (goba diagram). Ka mohlala, ge o dutše o bala ka motho yo a itšego wa ka Beibeleng, yo a bego a botega, bapiša ditiro tša gagwe goba dika tšeo a bego a na le tšona, tša go swana le lerato, boleta, botho le tše dingwe, gore di tswalana bjang le ditšhegofatšo tšeo Modimo a ilego a mo fa tšona.

   •   Dira gore pego yeo o e balago e be okare ke setori. Hlalosa pego yeo ka ditsela tša go fapafapana. Ge o dutše o dira bjalo, dira eka o boledišana le batho bao o balago ka bona, gotee le batho bao ba bonego tiragalo yeo ka mahlo.

   •   A re re yo mongwe wa batho bao o balago ka bona, o dirile phetho ya bošilo, leka go nagana gore taba yeo e ile ya felela kae. Ka mohlala, nagana ka Petro ge a be a latola Jesu. (Mareka 14:66-72) Ipotšiše gore, Petro nkabe a ile a dira’ng gore a se ke a latola Jesu?

   •   O ka ingwalela terama yeo e bolelago ka pego e itšego ya ka Beibeleng. Ngwala le dilo tšeo o ka ithutago tšona.​—Baroma 15:4.

 Ge o ka dira nyakišišo ka pego yeo o e balago, o tla hwetša le dilo tšeo o bego o sa di tsebe ka pego yeo. Ka dinako tše dingwe, ge o dutše o bala pego e itšego, lentšu letee goba a mabedi feela, a ka fetošago tsela yeo o kwešišago pego yeo ka yona.

 Ka mohlala, bapiša Mateo 28:7 le Mareka 16:7.

•    Ke ka baka la’ng Mareka a ile a bolela gore kgauswinyane Jesu o be a tlo tsošwa bahung gomme a iponagatša go barutiwa ba gagwe ‘le go Petro’?

•  Seo o swanetšego go se tseba: Mareka ga se a bona ditiragalo tšeo, go bonagala Petro e le yena a ilego a mo laodišetša.

•  Nyaka ntlha e bohlokwa yeo o ka ithutago yona: Ke ka baka la’ng Petro a ka ba a ile a ikwa a homotšegile kudu ge a be a ekwa gore Jesu o nyaka go mmona gape? (Mareka 14:66-72) Jesu o ile a bontšha bjang gore ke mogwera wa nnete wa Petro? O ka ekiša bjang Jesu ka gore le wena o be mogwera wa nnete go ba bangwe?

 Ge o dira gore pego ya Beibele e phele, e bile o dira nyakišišo, o tlo ipshina ka go bala Beibele!