Ka February 2016, mmušo wa Turkmenistan o ile wa lebalela le go lokolla bagolegwa ba makgolo eupša wa se lokolle Bahram Hemdemov. Pele go ka feta dikgwedi tše tharo, Kgorokgolo ya Tsheko ya Turkmenistan e ile ya gana boipiletšo bja molato wa gagwe wa bosenyi le go golegwa. Ka di-15 tša August 2016, ramolao wa Morena Hemdemov o ile a bula molato legatong la gagwe Komiting ya Ditokelo tša Batho ya Ditšhaba tše Kopanego.

Ge Morena Hemdemov a be a golegwa ka March 2015, yena gotee le Dihlatse tše dingwe ba be ba swere seboka seo se nago le khutšo sa bodumedi legaeng la gagwe kua Turkmenabad. Maphodisa a ile a tla a se a swara lengwalo la semolao, a šwahlela ka ntlong, a e phuruphutša, a tšea dithoto gomme a tlaiša bohle bao ba bego ba le gona.

Ramolao wa Morena Hemdemov o itše: “Maphodisa a ile a kgetha Bahram Hemdemov gore a mo tlaiše o šoro e le ge a leka go tšhošetša Dihlatse tše dingwe tšeo di dulago Turkmenabad.” Le ge Morena Hemdemov a ile a swarwa gampe ke bahlankedi ba mmušo, o sa kgomaretše tumelo ya gagwe.

Dihlatse tša Jehofa di holofela gore kgauswinyane mmušo wa Turkmenistan o tla lokolla Morena Hemdemov kgolegong. E tla ba mo gobotse ge Mopresitente Gurbanguly Berdimuhamedov a ka lokolla Morena Hemdemov nakong e latelago ge a lokollwa sehlopha se sengwe sa bao ba lebaletšwego.

Mosadi wa Morena Hemdemov e lego Gulzira, le bana ba bona ba bane ba mo hlologela kudu, bona gotee le Dihlatse tša tikologong yeo gomme ba fela pelo ya go mmona a boa gae. Ka tlhompho, Dihlatse tša Turkmenistan di kgopela gore mmušo o di dumelele go rapela Modimo di le gotee ka khutšo, di sa šitišwe ke bahlankedi ba mmušo.