Dihlatse tša Jehofa di be di dutše di le gona nageng ya Turkey go tloga ka 1931. Di ile tša tlaišwa ka baka la bodumedi bja tšona go fihla mafelelong a bo-1980. Mengwageng ya ka morago, ganyenyane-ganyenyane mmušo o ile wa kgaotša go tlaiša Dihlatse gomme wa di dumelela go dira mediro ya tšona ya bodumedi, eupša wa di ganetša go ingwadiša semolao gore di tsebje e le bodumedi. Maemo a ile a fetoga ka July 2007, ge dikgoro tša tsheko tša Turkey di dira diphetho go dumelelana le Dihlatse tša Jehofa gomme tša dumelelwa gore di ingwadiše. Lehono Dihlatse di kgona go bokana bakeng sa borapedi le go dira mediro ya tšona ya bodumedi ka tokologo.

Lega go le bjalo, mmušo wa Turkey ga o dumelele batho go ba le tokelo ya go gana go tsenela bošole ka baka la letswalo. Ka mengwaga e mentši, Dihlatse tša Jehofa tšeo di ganago go tsenela bošole ka baka letswalo di sa dutše di biletšwa bošoleng, di bonwa molato, di newa difaene tše boima le go golegwa. Go tloga ka 2011, Kgoro ya Yuropa ya Ditshwanelo tša Batho ya [European Court of Human Rights (ECHR)] e ile ya dira dikahlolo go dumelelana le Dihlatse, gomme ka 2012, Komiti ya Ditokelo tša Batho ya UN le yona e ile ya dira kahlolo go dumelelana le Dihlatse tabeng ye. Lega go le bjalo, Turkey e sa dutše e bona molato masogana a Dihlatse ao a ganago go tsenela bošole ka baka la letswalo.

Ka 2003, Turkey e ile ya kaonefatša melao ya yona ya kamoo mafelo goba meago e itšego e ka dirišwago ka gona bakeng sa go dumelela madumedi a manyenyane ao e se go a Bomoseleme go aga mafelo a wona a borapedi. Lega go le bjalo ka go diriša melao ye, mebasepala le dikgoro tša tsheko tše dinyenyane gantši di gana go dumelela Dihlatse go bitša mafelo a tšona a borapedi Diholo tša Mmušo. Melato e mebedi tabeng ye e sa dutše e sa tlo ahlaahlwa ke ECHR.