GE DIHLATSE TŠA JEHOFA tše pedi di be di tsena ka ntlo le ntlo, di ile tša kokota mojakong wa ntlo e nngwe. Monna yo a gateletšegilego o ile a bula mojako; ka morago ga gagwe go be go lekeletše thapo ka godimo ga setepisi.

Ge monna yoo a dumelela Dihlatse tšeo gore di tsene, di ile tša mmotšiša gore thapo yeo e be e le ya go dirang. O ile a re o be a re o ipolaya ka yona, eupša ge a ekwa go kokotwa o ile a kgetha go bula mojako pele a ipolaya. Dihlatse di ile tša boledišana le yena gomme tša ya le yena ngakeng yeo e ilego ya mo thuša.

Taba yeo e ile ya tšwelela kuranteng ya Belgium. Eupša yeo ga se yona nako feela moo Dihlatse tša Jehofa di ilego tša thuša motho gore a se ke a ipolaya. Ela hloko dikanegelo tše dingwe tšeo di diregilego go dikologa lefase.

Mosadi yo a tšwago Gerika o ngwadile gore: “Ke ile ka nyamišwa kudu ke monna wa ka gomme ka gateletšega kudu. Ka baka la bohloko bja ka ke ile ka nyaka go ipolaya. Go nagana ka go ipolaya go be go dira gore ke ikwe ke imologile—ke be ke nyaka go fediša bohloko bjoo.”

Go e na le go dira seo, mosadi yoo o ile a nyaka thušo ya tša kalafo. Nakwana ka morago, o ile a bolela le Dihlatse, a thoma go ithuta Beibele le go ya dibokeng tša tšona. O ngwadile gore: “Ke hweditše lerato la go hloka boithati leo ke bego ke le tsoma ka nywaga e mentši go borwarre. Ke hweditše bagwera ba kgonthe bao nka ba botago. Ke ikwa ke se na bothata e bile ke thabile, ke sa opišwe hlogo ke ditaba tša gosasa.”

Hlatse e nngwe kua England e ngwadile gore: “Motho yo mongwe yo ke mo tsebago o ile a nteletša mogala a gateletšegile kudu, ke moka a mpotša gore o be a tlo ipolaya bošegong bja letšatši leo. Ke diriša dintlha tše di lego sehlogong sa Phafoga! ya May 2008 seo se sa kgothaletšego go ipolaya, ke ile ka boledišana le yena gomme ka abelana le yena mangwalo a kgothatšago. Ga bjale ga a sa nyaka go ipolaya, le ge a na le mathata.”

Kua Ghana, Michael, e lego yo mongwe wa Dihlatse tša Jehofa, o ile a thoma poledišano le kgarebe yeo e bego e le mošomong. Ka letšatši le lengwe, Michael o ile a lemoga gore mosadi yoo o gateletšegile kudu gomme a mmotšiša lebaka.

Mosadi yoo o ile a re o nyaka go ipolaya ka ge monna wa gagwe a mo tlogetše gomme a ratana le mosadi yo mongwe. Michael o ile a mo kgothatša ke moka a mo nea dipuku tše pedi tšeo di hlalosago Mangwalo. Seo a ithutilego sona se ile sa dira gore a se sa nyaka go ipolaya. Mosadi yoo o ile a tšwela pele a ithuta Beibele gomme gona bjale ke Hlatse ya Jehofa.

Kuranta ya United States e begile gore ge Hlatse e nngwe ya mofsa e le bodireding e ile ya bona koloi e eme gomme entšene ya yona e duma.

Mofsa yoo o re: “Ke ile ka bona phaephe ya ka godingwana ga disenthimithara tše lesome e kgokilwe phaepheng ya go ntšha muši wa koloi. Lehlakore le lengwe la phaephe le be le tsene ka lefasetere la koloi leo le bego le tswaletšwe ka theipe gore moya o se tšwe.

“Ke ile ka kitimela kua koloing, ke itše ge ke lebelela ka lefasetere ka bona mosadi yo mongwe a lla, a dikaneditšwe ke muši wa koloi. Ke ile ka goeletša ka re: ‘O dira’ng?’

“Ge ke re ke bula mojako, ke ile ka bona bana ba bararo ba dutše ka morago. Ke ile ka bula mojako, ke moka mosadi yoo a re: ‘Ntlogele ke hwe! Ke nyako ikhwela, nna le bana ba ka.’

“Ke ile ka re: ‘Hle o se ke wa ipolaya, ye ga se tsela ya go rarolla mathata!’

“O ile a re: ‘Ntlogele ke ikele legodimong. Ke ikele nna le bana ba ba ka.’

“Ge a dutše a lla, ke ile ka khunama—le nna ke ile ka ikhwetša ke kgitla sello. Ke ile ka buša ka re: ‘Hle o se ke wa ipolaya.’ Ke moka ke ile ka iša letsogo, ka mo gokarela gomme ka boleta ka mo gogela ka ntle ga koloi.

“O ile a goeletša re: ‘Ntšha bana bao!’

“Ba ile ba obelela matsogo go nna. E be e le banenyana ba babedi, yo mongwe a na le nywaga e mene yo mongwe a na le e mehlano, le mošemane wa nywaga e mebedi. Ba be ba ituletše ba ikhomoletše ka morago ga koloi, ba sa lemoge gore go se go ye kae ba tla hwa.

“Ka morago ga gore ka moka ga bona ba tšwe ka koloing, ke ile ka tima koloi yeo. Re ile ra dula leswikeng la phaphathi, ke moka ka re: ‘Molato ke eng?’”

Dihlatse tša Jehofa di lebelela bophelo e le mpho e bohlokwa e tšwago go Mmopi. Lefaseng ka moka di katanela go homotša bao ba hwetšwego ke baratiwa ba bona bao ba ipolailego le bao ba lekago go ipolaya.