Ge o ka kgotla lelokelelo la maleme a Wepesaete ye ya JW.ORG leo le hwetšagalago letlakaleng le, o tla bona maleme a fetago a 300, e lego selo seo se sa hwetšagalego Wepesaeteng le ge e le efe!

Palo ye ya maleme e fapana bjang le ya Diwepesaete tše dingwe tše di tumilego? Ela hloko se: Go tloga ka July 2013, Wepesaete ya Ditšhaba tše Kopanego (United Nations) e be e hwetšagala ka maleme a tshelelago. Europa, e lego Wepesaete ya semmušo ya European Union, e hwetšagala ka maleme a 24. Wepesaete ya Google e hwetšagala ka maleme a 71, mola Wikipedia yona e hwetšagala ka maleme a 287.

Go fetolela Wepesaete ka maleme a fetago a 300, e tloga e le mošomo o mogolo! Bontši bja mošomo wo o dirwa ke Dihlatse tša Jehofa tše makgolokgolo go tšwa lefaseng ka bophara, ka ge di nyaka go tumiša Jehofa. Dihlatse tše di šoma ka dihlopha go ya ka maleme a tšona gomme tša diriša bokgoni bja tšona go fetolela Seisemane.

Wepesaete ya JW.ORG e na le matlakala a mantši ao a swerego tsebišo, ao a fetolelwago ka maleme a fetago a 300, ka gona palomoka ya matlakala ao ke e ntši kudu, a feta 200 000!

Ga se feela gore Wepesaete ya JW.ORG e hwetšagala lefaseng ka bophara, eupša gape e tumile. Taba ye e bonagetše pegong ya dipalopalo tša Diwepesaete tša go tuma yeo e tšweleditšwego ke Alexa, e lego khamphani yeo e hlahlobago go dirišwa ga Inthanete lefaseng ka bophara. Legorong la pego yeo la “Bodumedi,” go na le Diwepesaete tše di fetago tše 87 000, tšeo di akaretšago tša madumedi a magolo a lefase, bagatiši ba dipuku tša bodumedi gotee le mekgatlo e mengwe yeo e swaraganego le ditaba tša bodumedi. Go tloga ka July 2013, Wepesaete ya JW.ORG e eme maemong a bobedi lelokelelong leo! Yeo e di etago pele lelokelelong leo ke Wepesaete ya tša kgwebo yeo go yona batho ba ka balago diphetolelo tše di fapafapanego tša Beibele.

Go tloga ka October 2013, Wepesaete ya JW.ORG e etelwa mo e ka bago ka makga a 890 000 ka letšatši. Re tla dula re dira gore batho kae le kae ba hwetše tsebišo e holago e tšwago ka Beibeleng mahala.