Difoa tše dintši tšeo di lego ditikologong tšeo go bolelwago leleme la Sefora kua bohlabela bja Canada, di diriša Polelo ya Diatla ya Quebec (LSQ). a Batho bao ba dirišago polelo yeo ke ba 6 000 feela, ka gona, go na le dikgatišo le dibidio tše sego kae feela tšeo di hwetšagalago ka Polelo ya Diatla ya Quebec. Lega go le bjalo, Dihlatse tša Jehofa di tšweletša dikgatišo le dibidio tša maemo a godimo ka polelo ya diatla ya Quebec mahala. Dikgatišo di thuša batho gore ba kwešiše Beibele.

E le gore re kgone go kwešiša gore ke ka baka la’ng go fetolela polelo ye ya diatla go le bohlokwa, a re kweng kanegelo ya Marcel. O belegwe ka 1941 porofenseng ya Quebec kua Canada. Ge a be a na le mengwaga e mebedi, o ile a swara ke bolwetši bja meningitis. Marcel o re: “Ke thomile go tsena sekolo sa difoa ke na le mengwaga e senyane gomme ka ithuta Polelo ya Diatla ya Quebec (LSQ). Le ge go be go na le dipuku tše dingwe tša go ruta mantšu a itšego a polelo ya diatla, go be go se na dikgatišo le dibidio tša polelo ya diatla.”

Ke ka baka la’ng go be go nyakega gore go tšweletšwe dikgatišo ka LSQ? Marcel o araba ka gore: “Batho ba difoa le bona ba nyaka go hwetša ditaba ka polelo yeo ba e kwešišago gabotse go e na le gore ba di hwetše ka polelo yeo ba sa e kwešišego. Ge re se na dikgatišo tša LSQ, re gapeletšega go bala dikgatišo tša maleme ao a bolelwago gomme seo se dira gore re se ke ra kwešiša dilo tše dintši.”

Dihlatse tša Jehofa di ile tša tšweletša kgatišo ya mathomo ya LSQ ka 2005, e le gore di kgone go thuša Marcel le batho ba bangwe ba difoa bao ba šomišago polelo ye ya diatla. Le gona di sa tšwa go oketša meago ya ofisi ya bofetoledi kua Montreal, Quebec. Ofising ye go na le batho ba šupago bao ba šomago ka nako e tletšego le ba ba fetago 12 bao ba šomago ka nakwana. Bafetoledi ba ba arotšwe ka dihlopha tše tharo gomme ba diriša ditudio tše pedi tša maemo a godimo gore ba tšweletše dibidio tša LSQ.

Batho bao ba dirišago LSQ ba leboga dikgatišo tša maemo a godimo tšeo di tšweletšwago ke Dihlatse tša Jehofa. Stéphan Jacques, yo e lego mothuši wa molaodi wa Association des Sourds de l’Estrie, b o re: “Dikgatišo tša Dihlatse tša Jehofa di a kwagala. Tsela yeo ba dirišago diatla tša bona le sefahlego ge ba bolela e kwešišega gabonolo. Le gona, ke kgahlwa ke ka mokgwa wo ba aparago gabotse ka gona mo dibidiong.”

Ga bjale, Dihlatse tša Jehofa tše 220 tšeo di dirišago LSQ di kgona go hwetša kgatišo ya Morokami, e lego makasine woo o dirišwago dibokeng tša Dihlatse tša Jehofa lefaseng ka moka. c Le gona, makasine wo o hola le batho ba bangwe bao ba yago dibokeng tša Dihlatse tša Jehofa diphuthegong tše šupago le dihlopheng tšeo di dirišago LSQ kua Quebec. Go oketša moo, Dihlatse tša Jehofa di tšweletša le dibidio tše dintši tša LSQ inthaneteng, gotee le dikoša tšeo di tiišago tumelo tšeo di theilwego Beibeleng.

Marcel, yo re boletšego ka yena pejana, o thabela gore go na le dikgatišo tše dintši ka LSQ. O rata kudu tšeo di tšweletšwago ke Dihlatse tša Jehofa. O re: “Ruri go a thabiša go bona dibidio tše dintši tša LSQ wepesaeteng ya jw.org. Ge ke bona dilo ka moka tšeo di tšweleditšwego ka polelo ya ka, ke thaba kudu!”