Joshua yo a dulago United States eupša a kile a dula Guyana ka nakwana a ruta batho Beibele o itše: “Ga ke na mantšu a go hlalosa gore go hlankela Modimo moo go nyakegago batho ba bantši ba go ruta batho Beibele go ile gwa nthabiša gakaakang!” Dihlatse tša Jehofa tše dintši tšeo di kilego tša ya go ruta batho Beibele nageng yeo e lego Amerika Borwa, moo batho ba bantši ba nyakago go ithuta ka Modimo, le tšona di ikwa go swana le Joshua. a Re ka ithuta’ng go batho bao ba ilego ba hudugela Guyana go yo ruta batho Beibele? Dilo tšeo re tlago go ithuta tšona di ka go thuša bjang gore le wena o ye nageng e nngwe ge e ba o kganyoga go dira seo?

 Pele ga ge ngwanabo rena Linel a ka hudugela Guyana, o ile a yo ruta batho Beibele lefelong leo Dihlatse tša Jehofa di sa fihlego gantši nageng ya gabo ya United States. O re: “Re ile ra abelwa go yo bolela ditaba tše dibotse tikologong ya magaeng ya kua West Virginia. Sehlopheng sa rena re be re le ba 20. Go ruta batho Beibele le go ipshina le bao ke bego ke sepetše le bona dibekeng tšeo tše pedi go ile gwa fetoša bophelo bja ka! Ke ile ka ikemišetša go dira sohle seo nka se kgonago go hlankela Jehofa.”

 Banyalani ba bangwe e lego Garth le Erica ba ile ba thoma go naganišiša ka go yo thuša nageng e nngwe, ke moka ba ile ba kgetha go ya Guyana. Ke ka baka la’ng ba ile ba kgetha Guyana? Erica o re: “Nna le monna wa ka re be re tseba banyalani ba bangwe bao ba bego ba hudugetše moo. Mafolofolo a bona le kamoo ba bego ba rata seo ba bego ba se dira go ile gwa dira gore le rena re nyake go hudugela moo.” Erica le Garth ba feditše mengwaga e meraro ba thabile kabelong ya bona yeo ba bego ba e rata. Garth o re: “Re ile ra latswa gore go bjang go hlankela nageng e nngwe gomme ra bona gore go bose.” Ka morago yena le mosadi wa gagwe ba ile ba ya Sekolong sa Gilead gomme gona bjale ba hlankela kua Bolivia.

 Melao ya motheo ya Beibele e re kgothaletša gore re se ke ra nyaka go ba le dilo tše dintši. (Baheberu 13:5) Le gona Beibele e re kgothaletša gore re naganišiše ka seo re tlago go swanelwa ke go se dira ge re dira diphetho tše dikgolo bophelong. (Luka 14:26-33) Seo se akaretša le phetho ya go hudugela nageng e nngwe! Garth o ngwadile gore: “Nna le Erica re ile ra swanelwa ke go fokotša dilo tšeo re bego re na le tšona pele re ka hudugela Guyana. Re ile ra rekiša kgwebo ya rena, ntlo ya rena le dilo tše dingwe ka moka tšeo re bego re na le tšona ka ntlong eupša re sa di šomiše. Go dira seo go ile gwa re tšea mengwaga e sego kae. Ge re dutše re dira dilo tšeo ka moka, ga se ra ka ra lebala gore re nyaka go ya Guyana gomme re ile ra ikgopotša seo ka go fela re etela moo gatee ka ngwaga.”

 Selo se sengwe seo motho a swanetšego go nagana ka sona ke gore o tlo hwetša bjang tšhelete ya go itlhokomela. Batho ba bangwe bao ba hudugetšego dinageng tše dingwe ba kgona go šoma dinageng tšeo ge e ba mmušo wa moo o ba dumelela go dira seo. Ba bangwe ba diriša dikhomphutha go šoma mošomo wo ba bego ba dutše ba o dira nageng ya gabo bona. Ba bangwe ba kgetha go boela dinageng tša gabo bona ke moka ba šoma ka nakwana moo. Banyalani ba bangwe e lego Paul le Sinead ba be ba boela Ireland gatee ka ngwaga go yo šoma moo. Go dira seo go ile gwa ba thuša go hlankela Guyana ka mengwaga e 18 ba thabile, go akaretša le mengwaga e 7 ka morago ga gore morwedi wa bona a belegwe.

 Psalme 37:5 e re: “Lahlela tsela ya gago go Jehofa, o ithekge ka yena, gomme yena o tla go thuša.” Christopher le Lorissa bao ba tšwago United States ba be rapela Jehofa ka mehla ba mmotša gore ba nyaka go hudugela nageng e nngwe go yo ruta batho Beibele. Le gona nakong ya borapedi bja lapa ba be ba boledišana ka dilo tšeo ba tlo swanelwago ke go di dira gore ba kgone go huduga. E bile ba be ba bolela ka mathata le mehola ya go huduga. Ka ge ba be ba nyaka go hudugela moo go ka se hlokagalego gore ba ithute leleme le lengwe, ba ile ba kgetha Guyana, ka ge nageng yeo go dirišwa Seisemane kudu.

 Ka morago ga moo ba ile ba dira seo Diema 15:22 e se bolelago. E re: “Maano a a fela ge batho ba sa ntšhetšane sa mafahleng, eupša taba e a atlega mo go nago le baeletši ba bantši.” Ba ile ba ngwalela ofisi ya lekala yeo e hlokometšego modiro wa rena wa go ruta batho Beibele kua Guyana, b ba hlalosa gore ba nyaka go tlo thuša le go itlhalosa gore ke bona bomang. Lengwalong leo ba ile ba botšiša le ka tša kalafo nageng yeo, ka boemo bja leratadima le ka tsela yeo batho ba moo ba phelago ka yona. Ofisi ya lekala e ile ya araba dipotšišo tša bona ke moka ya ba nea diaterese tša e-mail le dinomoro tša founo tša dihlopha tša bagolo ba moo ba bego ba tlo hudugela gona.

 Linel yo re boletšego ka yena pejana, gona bjale ke molebeledi wa tikologo Guyana. Le yena pele a ka hudugela moo o ile a diriša molao wa motheo wa Beibele wo o lego go Diema 15:22. Linel o re: “Ke ile ka boloka tšhelete ya leeto leo e bile ka bolela le ba bangwe bao ba kilego ba hlankela nageng e nngwe. Ke ile ka botša ba gešo ka taba yeo, bagolo ba phuthego yeo ke bego ke le go yona le molebeledi wa tikologo. Le gona ke ile ka bala dihlogo ka moka ka dikgatišong tša rena tšeo di bolelago ka go hudugela nageng e nngwe go yo thuša ka modiro wa go ruta batho Beibele.”

 Batho ba bantši bao ba nyakago go yo thuša nageng e nngwe ba thoma pele ka go etela moo. Banyalani ba bangwe e lego Joseph le Christina ba re: “Ge re be re etetše Guyana ka lekga la pele re ile ra dula moo dikgwedi tše tharo. Yeo e be e le nako e lekanego go ka bona gore go bjang nageng yeo. Ka morago ga moo re ile ra boela gae ra yo feleletša go phutha, ke moka ra huduga.”

 E le gore batho bao ba hudugetšego nageng e nngwe ba kgone go hlankela Modimo ba thabile, ba swanetše go ikgafa le go tlwaelana le maemo a moo ba hudugetšego gona le tsela ya moo ya go phela. Ka mohlala bao ba bego ba dula dinageng tše di tonyago gomme ba hudugela dinageng tšeo go dulago go ena pula ba hwetša e le gore mafelong ao go na le dikhunkhwane tše dintši. Joshua yo re boletšego ka yena pejana o itše: “Ke be ke se ka tlwaela go bona dikhunkhwane tše dintši ka tsela ye. E bile go be go bonagala eka tša Guyana ke tše dikgolo! Eupša ge nako e dutše e eya ke ile ka di tlwaela. Le gona ke ile ka ithuta le gore ge ntlo ya gago e dula e hlwekile o ka se be le dikhunkhwane tše dintši. Seo se akaretša go hlatswa dibjana, go lahla matlakala le go hlwekiša ntlo ka mehla.”

 Go tlwaela bophelo bja nageng e nngwe go akaretša le go tlwaela dijo tša moo le go ithuta go di apea. Joshua o re: “Nna le ngwanabo rena yo ke bego ke dula le yena re ile ra kgopela bana babo rena ba bangwe le dikgaetšedi go re ruta go apea re diriša dilo tšeo di hwetšagalago moo. Ka morago ga gore re ithute go apea selo se itšego, re be re ba mema gore ba tlo ja le rena. Ye e be e le tsela e kgahlišago ya go tsebana le bona le go gwerana le bona.”

 Ge Paul le Kathleen ba bolela ka tsela ya go phela ya batho ba moo ba re: “Re ile ra swanelwa ke go ithuta gore go ya ka batho ba moo mekgwa e mebotse e be e le efe, le gore tsela e botse ya go apara e be e le efe. E be e le la mathomo re swanelwa ke go ithuta tsela e mpsha ya go phela. Ka gona re ile ra swanelwa ke go ikokobetša, re dire diphetogo gomme re latele melao ya motheo ya Beibele. Ge bana babo rena le dikgaetšedi ka phuthegong le batho bao re bego re ba ruta Beibele ba be ba lemoga gore re be re leka go ithuta tsela yeo ba phelago ka yona, ba ile ba re rata kudu.”

 Joseph le Christina ba bolela ka tsela yeo batho bantši bao ba ilego ba hudugela dinageng tše dingwe ba ikwago ka yona. Ba re: “Go na le ditšhegofatšo tše dintši kudu go feta mathata ao re kopanago le wona. Go dira dilo tšeo re bego re se ra di tlwaela e bile go sego bonolo go di dira, go re thušitše go fetoša dilo tšeo di tlago pele bophelong. Dilo tšeo re bego re nagana gore di bohlokwa, di ile tša se sa bonagala di le bohlokwa. Phihlelo e nngwe le e nngwe e ile ya re dira gore re nyake go tšwela pele re dira sohle seo re ka se kgonago go hlankela Jehofa. Ruri re ile ra kgotsofala.”

 Erica yo re boletšego ka yena pejana o re: “Go thuša go ruta batho Beibele nageng e nngwe go dirile gore nna le monna wa ka re kwešiše gabotse gore go tshepa Jehofa go bolela eng. Re bone a re thuša ka ditsela tšeo re bego re sa ka ra bona a re thuša ka tšona. Le gona go šoma gotee ka mehla go dirile gore segwera sa rena se tie e bile gwa tiiša le lenyalo la rena.”