व्यवस्था ६:१-२५
६ “यहोवा तिमीहरूका परमेश्वरले तिमीहरूलाई सिकाउनू भनी मलाई यी आज्ञा, नीतिनियम र विधिविधान दिनुभएको छ। यर्दन नदी पार गरेर आफूले अधिकार गर्ने देशमा पुगेपछि तिमीहरूले यी आज्ञा, नियम र विधिविधान पालन गर्नू।
२ त्यसो गऱ्यौ भने तिमीहरूले अनि तिमीहरूका छोरानातिले जीवनभर यहोवा तिमीहरूका परमेश्वरको भय मान्न सक्नेछौ अनि मैले तिमीहरूलाई आज्ञा गरेका उहाँका सबै नियम तथा आज्ञा पालन गर्न सक्नेछौ।+ अनि तिमीहरू सबै दीर्घायु हुनेछौ।+
३ हे इस्राएली हो, यी सबै कुरा ध्यान दिएर सुन र होसियार भई पालन गर। त्यसो गऱ्यौ भने यहोवा तिमीहरूका पितापुर्खाका परमेश्वरले प्रतिज्ञा गर्नुभएझैँ दूध र मह बग्ने त्यस देशमा तिमीहरूको फलिफाप हुनेछ र तिमीहरू सङ्ख्यामा पनि बढ्दै जानेछौ।
४ “हे इस्राएली हो, सुन! यहोवा हाम्रा परमेश्वर एक मात्र यहोवा हुनुहुन्छ।+
५ तिमीहरूले यहोवा तिमीहरूका परमेश्वरलाई आफ्नो सारा हृदयले, आफ्नो सारा ज्यानले*+ र आफ्नो सारा बलले* प्रेम गर्नू।+
६ आज मैले तिमीहरूलाई दिएका आज्ञाहरू आफ्नो हृदयमा राख्नू।
७ अनि आफ्ना छोराछोरीको* हृदयमा पनि यी आज्ञाहरू राखिदिनू।*+ घरमा बस्दा, बाटोमा हिँड्दा, सुत्दा र उठ्दा तिनीहरूसित यसबारे कुराकानी गर्नू।+
८ यी आज्ञाहरूलाई सम्झिरहन तिमीहरूले त्यसलाई आफ्नो हातमा बाँध्नू र निधारमा पट्टीसरह लगाउनू।+
९ यी आज्ञाहरू तिमीहरूले आफ्नो घरको ढोकाको चौकोसमा र सहरका मूलढोकाहरूमा लेख्नू।
१० “यहोवा तिमीहरूका परमेश्वरले तिमीहरूका पुर्खा अब्राहाम, इसहाक र याकुबलाई दिन्छु भनेर कसम खानुभएको देशमा+ तिमीहरूलाई पुऱ्याउनुभएपछि त्यहाँ तिमीहरूले ठूलठूला र सुन्दर सहरहरू पाउनेछौ, जसलाई तिमीहरूले बनाएका होइनौ;+
११ तिमीहरूले असल-असल थोकहरूले भरिएको घर पाउनेछौ, जसको निम्ति तिमीहरूले मेहनत गर्नै परेन; तिमीहरूले इनार पाउनेछौ, जसलाई तिमीहरूले खन्नै परेन; तिमीहरूले अङ्गुर र जैतुनको बगान पाउनेछौ, जसलाई तिमीहरूले रोप्नै परेन। अनि त्यहाँ तिमीहरूले नअघाउन्जेल खानेछौ र सन्तुष्ट हुनेछौ।+
१२ तब होसियार रहनू! तिमीहरूलाई दासत्वको घर—मिश्रबाट छुटाएर ल्याउनुहुने यहोवा परमेश्वरलाई नबिर्सनू।+
१३ तिमीहरूले यहोवा तिमीहरूका परमेश्वरको डर मान्नू,+ उहाँकै सेवा गर्नू+ अनि उहाँकै नाममा कसम खानू।+
१४ तिमीहरू अरू देवीदेवताको पछि नलाग्नू, वरपरका मानिसहरूको कुनै पनि देवीदेवताको पछि नलाग्नू।+
१५ किनभने तिमीहरूमाझ हुनुहुने तिमीहरूका परमेश्वर यहोवा उहाँबाहेक अरू कसैको भक्ति गरिएको सहनुहुन्न।+ तिमीहरू अरू देवीदेवताको पछि लाग्यौ भने यहोवाको क्रोध तिमीहरूमाथि दन्कनेछ+ र उहाँले तिमीहरूलाई यस धर्तीबाट मेटाइदिनुहुनेछ।+
१६ “तिमीहरूले यहोवा आफ्ना परमेश्वरको परीक्षा कहिल्यै नलिनू,+ जसरी तिमीहरूले मास्साहमा उहाँको परीक्षा लिएका थियौ।+
१७ यहोवा तिमीहरूका परमेश्वरले दिनुभएका आज्ञा, सम्झौटा र नीतिनियम तिमीहरूले होसियार भई पालन गर्नू।
१८ तिमीहरूले यहोवा परमेश्वरको नजरमा जे सही र असल छ, त्यही मात्र गर्नू। त्यसो गऱ्यौ भने तिमीहरूको फलिफाप हुनेछ र यहोवा परमेश्वरले तिमीहरूका पुर्खाहरूलाई दिन्छु भनेर प्रतिज्ञा गर्नुभएको असल देशमा तिमीहरू पस्न पाउनेछौ र त्यसलाई अधिकार गर्नेछौ।+
१९ यहोवा परमेश्वरले प्रतिज्ञा गर्नुभएझैँ तिमीहरूले आफ्ना सबै शत्रुलाई आफ्नो सामनेबाट धपाउनेछौ।+
२० “भविष्यमा तिमीहरूका छोराहरूले, ‘यहोवा हाम्रा परमेश्वरले यी सम्झौटा, नीतिनियम र विधिविधान किन दिनुभयो’ भनेर सोधे भने
२१ तिमीहरूले यसो भन्नू: ‘हामी मिश्रमा फारोका* दास थियौँ तर यहोवा परमेश्वरले आफ्नो पराक्रमी हातले हामीलाई त्यहाँबाट छुटाउनुभयो।
२२ यहोवा परमेश्वरले मिश्रमा ठूलठूला चिन्ह र चमत्कार गर्नुभयो,+ जसले गर्दा मिश्र, फारो र तिनको पूरै घराना नाश भए। ती सबै हामीले आफ्नै आँखाले देख्यौँ।+
२३ त्यसपछि उहाँले हामीलाई त्यहाँबाट छुटाउनुभयो र हाम्रा पुर्खाहरूलाई दिन्छु भनेर कसम खानुभएको यस देशमा ल्याउनुभयो।+
२४ त्यसपछि यहोवा परमेश्वरले हामीलाई यी सबै नीतिनियम पालन गर्न र यहोवा हाम्रा परमेश्वरको डर मान्न आदेश दिनुभयो। हाम्रो सधैँ भलो होस्+ र हामी जीवित रहन सकौँ+ भनेर उहाँले त्यसो गर्नुभयो अनि हेर! अहिले त्यस्तै भइरहेको छ।
२५ उहाँले भन्नुभएझैँ हामीले यी सबै कुरा होसियार भई पालन गऱ्यौँ भने र यहोवा हाम्रा परमेश्वरप्रति* आज्ञाकारी भयौँ भने हामी उहाँको नजरमा धर्मी* ठहरिनेछौँ।’+
फुटनोटहरू
^ शब्दावलीमा “नेफेश; साइखी” हेर्नुहोस्।
^ वा “आफूसँग भएको सारा कुराले।”
^ शा., “छोराहरूको।”
^ वा “यी आज्ञाहरू छोराछोरीसामु दोहोऱ्याउनू; छोराछोरीको मनमा छापिदिनू।”
^ मिश्रका राजाहरूको एउटा उपाधि।
^ शा., “परमेश्वरसामु।”
^ शब्दावलीमा “धार्मिकता” हेर्नुहोस्।
