यर्मिया ३१:१-४०
३१ यहोवा घोषणा गर्नुहुन्छ, “त्यसबेला म इस्राएलका सबै घरानाको परमेश्वर हुनेछु र तिनीहरू मेरा मानिसहरू हुनेछन्।”+
२ यहोवा यसो भन्नुहुन्छ:
“इस्राएल आफ्नो विश्रामस्थलमा फर्कन यात्रा गरिरहेको बेला
तरबारबाट बचेका मानिसहरूले निर्जनभूमिमा निगाह पाए।”
३ टाढाबाट यहोवा मकहाँ आउनुभयो र भन्नुभयो:
“मैले तिमीलाई माया गरेको छु; मेरो माया सधैँभरि रहनेछ।
मैले तिमीलाई अटल प्रेम देखाएर आफूतिर खिचेको छु।+
४ त्यसैले म तिमीलाई फेरि बनाउनेछु; हो, तिमी फेरि बनाइनेछ्यौ।+
ए इस्राएलकी कुमारी केटी, तिमीले फेरि आफ्नो खैँजडी बोक्नेछ्यौ
र हर्षले नाच्नेछ्यौ।+
५ तिमीले सामरियाका डाँडाहरूमा फेरि अङ्गुर बगान लगाउनेछ्यौ।+
मानिसहरूले अङ्गुर बगान लगाउनेछन् र त्यसको फल खानेछन्।+
६ किनकि यस्तो दिन आउँदै छ, जब एप्रैमका पहाडहरूमा बस्ने पहरेदारहरू यसो भन्दै कराउनेछन्:
‘उठ! सियोनमा उक्लौँ र हाम्रा परमेश्वर यहोवाकहाँ जाऔँ!’”+
७ किनकि यहोवा यसो भन्नुहुन्छ:
“याकुबको निम्ति खुसीले गाओ।
चर्को स्वरले जयजयकार गर किनकि तिमी सबै राष्ट्रभन्दा माथि उचालिएका छौ।+
यस कुराको घोषणा गर; परमेश्वरको प्रशंसा गर र यसो भन,
‘हे यहोवा! आफ्ना जनहरू, इस्राएलका बाँकी मानिसहरूलाई बचाउनुहोस्।’+
८ म तिनीहरूलाई उत्तरको देशबाट फिर्ता ल्याउनेछु।+
तिनीहरूलाई पृथ्वीको कुनाकुनादेखि जम्मा पार्नेछु।+
तिनीहरूमाझ अन्धा र लङ्गडाहरू हुनेछन्,+
गर्भवती स्त्री, बेथा लागेकी स्त्री, सबै हुनेछन्।
तिनीहरू ठूलो जमातमा फर्कनेछन्।+
९ तिनीहरू रुँदै आउनेछन्,+
तिनीहरूले मसित दयाको भीख माग्नेछन् र म तिनीहरूलाई डोऱ्याउनेछु।
म तिनीहरूलाई प्रशस्त पानी भएको ठाउँमा,*+
ठेस नलाग्ने सम्म परेको बाटोमा डोऱ्याउनेछु
किनकि म इस्राएलको बुबा हुँ र एप्रैम मेरो पहिलो सन्तान हो।”+
१० ए राष्ट्रहरू हो! यहोवाको वचन सुन!
टाढा-टाढाका टापुहरूमा यो कुराको घोषणा गर:+
“इस्राएललाई तितरबितर पार्नुहुनेले तिनीहरूलाई फेरि जम्मा गर्नुहुनेछ।
गोठालोले आफ्नो बगालको हेरविचार गरेझैँ उहाँले तिनीहरूको हेरविचार गर्नुहुनेछ।+
११ किनकि यहोवाले याकुबलाई छुटकारा दिनुहुनेछ;+
ऊभन्दा शक्तिशालीको हातबाट उसलाई छुटाउनुहुनेछ।+
१२ तिनीहरू आउनेछन् र सियोनको टाकुरामा खुसीले कराउनेछन्।+
यहोवाले दिनुभएका असल-असल कुराले तिनीहरूको अनुहार धपक्क बल्नेछ।
उहाँले तिनीहरूलाई अन्न, नयाँ मद्य+ र तेल दिनुहुनेछ।
तिनीहरूका वस्तुभाउ ब्याउनेछन्।+
तिनीहरू राम्ररी पानी पाएको बगैँचाजस्तै हराभरा हुनेछन्+
र फेरि कहिल्यै कमजोर हुनेछैनन्।”+
१३ “त्यसबेला कुमारी केटीहरू रमाई-रमाई नाच्नेछन्,
तन्नेरीहरू र बूढापाकाहरू पनि सँगै नाच्नेछन्।+
म तिनीहरूको शोकलाई हर्षमा परिवर्तन गरिदिनेछु।+
म तिनीहरूलाई सान्त्वना दिनेछु र पीडाको सट्टा खुसी दिनेछु।+
१४ म पुजारीहरूलाई प्रशस्त खानेकुरा दिएर तृप्त पार्नेछु।
मैले दिएका असल-असल कुराले मेरा मानिसहरू सन्तुष्ट हुनेछन्,”+ यहोवा घोषणा गर्नुहुन्छ।
१५ “यहोवा यसो भन्नुहुन्छ:
‘रामामा+ एउटा स्वर सुनियो, रोदन र क्रन्दनको;
राहेल आफ्ना छोराहरूको* निम्ति विलाप गर्दै थिई;+
जति नै सान्त्वना दिए पनि ऊ शान्त हुन मानिन
किनकि तिनीहरू अब रहेनन्।’”+
१६ यहोवा यसो भन्नुहुन्छ:
“‘नरोऊ, आँसु झार्न बन्द गर।
किनकि म तिमीलाई तिम्रा कामहरूको इनाम दिनेछु,’ यहोवा घोषणा गर्नुहुन्छ।
‘तिनीहरू आफ्नो शत्रुको देशबाट फर्कनेछन्।’+
१७ ‘तिम्रो लागि एउटा आशा छ,’+ यहोवा घोषणा गर्नुहुन्छ।
‘तिम्रा छोराहरू आफ्नै भूमिमा फर्कनेछन्।’”+
१८ “एप्रैमले यसो भन्दै सुस्केरा हालेको मैले सुनेको छु,
‘म त हलो जोत्ने तालिम नपाएको बाछोजस्तै थिएँ।
तपाईँले मलाई सुधार्नुभयो र म सुध्रिएँ।
मलाई फर्काउनुहोस् र म खुसी-खुसी फर्कनेछु
किनकि तपाईँ मेरा परमेश्वर यहोवा हुनुहुन्छ।
१९ फर्केर आएपछि मलाई ग्लानि भयो।+
तपाईँले मलाई सम्झाउनुभएपछि मैले शोकमा आफ्नो तिघ्रा ठटाएँ।*
जवान छँदा आफूले गरेका कामहरूले गर्दा
मैले लज्जित र अपमानित महसुस गरेँ।’”+
२० यहोवा घोषणा गर्नुहुन्छ, “एप्रैम मेरो लागि अनमोल छैन र? ऊ मेरो प्यारो छोरो होइन र?+
किनकि उसलाई जति हप्काए पनि म उसलाई बिर्सन सक्दिनँ।
उसलाई सम्झेर मेरा भावनाहरू उर्लेर आउँछन्।+
त्यसैले म उसलाई पक्कै दया देखाउनेछु।+
२१ आफ्नो लागि सडकमा चिन्हहरू ठड्याऊ
अनि खम्बाहरू खडा गर।+
तिमी हिँड्नुपर्ने मूलबाटोतिर नजर लगाऊ।+
फर्किआऊ, ए इस्राएलकी कुमारी केटी, आफ्ना यी सहरहरूमा फर्केर आऊ।
२२ ए विश्वासघाती छोरी, तिमी कहिलेसम्म यताउता बरालिन्छ्यौ?
किनकि यहोवाले पृथ्वीमा एउटा नयाँ कुरा बनाउनुभएको छ:
एउटी स्त्री मरिहत्ते गरेर पुरुषको पछि लाग्छे।”
२३ सेनाहरूका यहोवा, इस्राएलका परमेश्वर यसो भन्नुहुन्छ: “कैदमा लगिएकाहरूलाई फर्काएर ल्याएपछि तिनीहरूले यहुदा र यसका सहरहरूमा फेरि यसो भन्नेछन्: ‘ए धर्मी घर!+ ए पवित्र डाँडा!+ यहोवाले तिमीलाई आशिष् देऊन्।’
२४ अनि त्यसमै यहुदा र यसका सारा सहर सँगै बसोबास गर्नेछन्। किसानहरू र बगाललाई डोऱ्याउने गोठालाहरू पनि सँगै बस्नेछन्।+
२५ अनि थाकेकाहरूलाई म तृप्त पार्नेछु र दुर्बलहरूलाई बल दिनेछु।”+
२६ यसपछि म ब्युँझिएँ र मैले आफ्नो आँखा खोलेँ। मलाई मीठो निद्रा लागेको थियो।
२७ यहोवा घोषणा गर्नुहुन्छ, “हेर! यस्ता दिनहरू आउँदै छन्, जब म इस्राएलको घराना र याकुबको घरानामा मानिसहरूको र वस्तुभाउको सङ्ख्या बढाइदिनेछु।”+
२८ “अनि जसरी मैले तिनीहरूलाई उखेल्न, ढाल्न, भत्काउन, नाश गर्न र हानि गर्न+ तिनीहरूमाथि नजर राखेको थिएँ, त्यसरी नै तिनीहरूलाई बनाउन र रोप्न म तिनीहरूमाथि नजर राख्नेछु,”+ यहोवा घोषणा गर्नुहुन्छ।
२९ “ती दिनहरूमा तिनीहरूले फेरि कहिल्यै यसो भन्नेछैनन्, ‘अमिलो अङ्गुर खाए बुबाले, दाँत कुँडियो छोराको।’+
३० तर हरेक मानिस आफ्नै गल्तीले मर्नेछ। त्यसैले जसले अमिलो अङ्गुर खान्छ, उसैको दाँत कुँडिनेछ।”
३१ यहोवा यस्तो घोषणा गर्नुहुन्छ, “हेर, यस्ता दिनहरू आउँदै छन्, जब म इस्राएलको घराना र यहुदाको घरानासित नयाँ करार गर्नेछु।+
३२ त्यो करार मैले तिनीहरूका पुर्खाहरूलाई हात समाएर मिश्र देशबाट बाहिर ल्याउँदा तिनीहरूसित गरेको करारजस्तो हुनेछैन।+ ‘म तिनीहरूको साँचो मालिक* थिएँ तर तिनीहरूले मेरो करार तोडे,’+ यहोवा घोषणा गर्नुहुन्छ।”
३३ “ती दिनहरूपछि इस्राएलको घरानासित मैले गर्ने करार यही हो,” यहोवा घोषणा गर्नुहुन्छ। “मेरा नियमहरू म तिनीहरूको मनमस्तिष्कमा राखिदिनेछु+ र तिनीहरूको हृदयमा ती लेखिदिनेछु।+ अनि म तिनीहरूका परमेश्वर हुनेछु र तिनीहरू मेरा मानिसहरू हुनेछन्।”+
३४ “तिनीहरूमध्ये कसैले पनि आफ्नो छिमेकीलाई र आफ्नो दाजुभाइलाई यसो भनेर सिकाउनेछैन: ‘यहोवालाई चिन!’+ किनकि तिनीहरू सबैले अर्थात् सानादेखि ठूला सबैले मलाई चिन्नेछन्,”+ यहोवा घोषणा गर्नुहुन्छ। “म तिनीहरूलाई क्षमा दिनेछु र फेरि कहिल्यै तिनीहरूको पाप सम्झनेछैनँ।”+
३५ यहोवा, जसले दिनमा उज्यालो होस् भनेर घाम दिनुहुन्छ,
रातमा प्रकाश छर्न जूनताराको निम्ति नियम तोक्नुहुन्छ,
जसले सागरलाई हल्लाउनुहुन्छ र ठूलठूला छाल उठाउनुहुन्छ,
जसको नाम सेनाहरूका यहोवा हो,+
उहाँ यसो भन्नुहुन्छ:
३६ “यहोवा यस्तो घोषणा गर्नुहुन्छ, ‘जसरी यी नियमहरूले कहिल्यै काम गर्न छोड्दैनन्,
त्यसैगरि इस्राएलका सन्तानलाई म राष्ट्रको रूपमा कहिल्यै नाश हुन दिनेछैनँ।’”+
३७ यहोवा यसो भन्नुहुन्छ: “‘जसरी माथि आकाशलाई नाप्न र तल पृथ्वीको जगसम्म पुग्न असम्भव छ, त्यसरी नै इस्राएलका सन्तानले गरेका गल्तीहरूको निम्ति मैले तिनीहरू सबैलाई त्याग्ने कुरा असम्भव छ,’ यहोवा घोषणा गर्नुहुन्छ।”+
३८ यहोवा यस्तो घोषणा गर्नुहुन्छ, “हेर! यस्ता दिनहरू आउँदै छन्, जब हननेल धरहरादेखि+ कुना-ढोकासम्म+ यहोवाको निम्ति यो सहर निर्माण गरिनेछ।+
३९ अनि नाप्ने डोरी+ सोझै गारेबको डाँडासम्म पुग्नेछ र त्यसपछि गोआहतिर मोडिनेछ।
४० अनि सिनु र खरानीले* भरिएको सम्पूर्ण उपत्यकाका साथै किद्रोन बेँसीसम्म+ फैलिएको सबै खेत र पूर्वमा घोडा-ढोकाको+ कुनासम्म सबै इलाका यहोवाको निम्ति पवित्र हुनेछ।+ त्यो फेरि कहिल्यै उखेलिनेछैन र नाश हुनेछैन।”
फुटनोटहरू
^ वा “वादीमा।” शब्दावलीमा “वादी” हेर्नुहोस्।
^ वा “छोराछोरीको।”
^ इस्राएलमा दुःख, शोक, खेद आदि व्यक्त गर्न पनि तिघ्रा ठटाउने चलन थियो।
^ वा सम्भवतः “तिनीहरूको पति।”
^ वा “बोसो मिसिएको खरानीले।” यसले बलि चढाइएका जनावरहरूको बोसो मिसिएको खरानीलाई जनाउँछ।
