भर्खरै जन्मेको बच्चाको लागि बाहिरको वातावरणसित घुलमिल हुन सुरुको ६० मिनेट एकदमै महत्त्वपूर्ण हुन्छ। किन? किनभने आमाले त्यतिबेला आफ्नो नवजात शिशुलाई माया-ममता देखाइन्‌ भने शिशुको शारीरिक वृद्धि र विकासमा निकै उन्‍नति हुन्छ। a

भर्खरै जन्मेको बच्चालाई माया देखाउँदै हेरविचार गर्न आमालाई कुन कुराले उत्प्रेरित गर्छ? नवजात शिशुसम्बन्धी एउटा अङ्‌ग्रेजी पत्रिकामा (द जर्नल अफ पेरिन्याटल) प्राध्यापक जनेट क्रेन्सले अक्सिटोसिन हर्मोनको बढ्‌दो मात्राले गर्दा “आमा आफ्नो नवजात शिशुलाई छोएर, नियालेर र स्तनपान गराएर मातृस्नेह देखाउन उत्प्रेरित हुन्छिन्‌” भनेर बताइन्‌। साथै त्यो समयमा निस्कने अर्को हर्मोनले “आमालाई बच्चाको प्रतिक्रिया बुझेर त्यसअनुसार गर्न” र बच्चासित नजिक हुन मदत गर्छ। यो कुरा किन उल्लेखनीय छ?

हाम्रो मायालु सृष्टिकर्ता र ईश्‍वर यहोवाले b नै आमा र बच्चाबीच यस्तो प्रगाढ सम्बन्ध सृष्टि गर्नुभएको हो। ईश्‍वरले आफूलाई “आमाको कोखबाट बाहिर” ल्याउनुभयो र आमाको छातीमा ढुक्क महसुस गराउनुभयो भनी प्राचीन इस्राएलका राजा दाउदले बताए। तिनले यस्तो प्रार्थना गरे: “म जन्मेदेखि नै तपाईँले मेरो ख्याल राख्नुभएको छ; म मेरी आमाको गर्भमा छँदादेखि नै तपाईँ मेरा परमेश्‍वर हुनुहुन्छ।”—भजन २२:९, १०.

विचार गर्नुहोस्‌: आमाले मायालु भई आफ्नो बच्चाको हेरविचार गरून्‌ र उसका आवश्‍यकताहरूको ख्याल राखून्‌ भनेर ईश्‍वरले यस्तो जटिल प्रणाली बनाउनुभयो। त्यसोभए के उहाँले पनि ‘आफ्नो सन्तान’ अर्थात्‌ हामीलाई चासो देखाउनुहुन्छ भन्‍नु तर्कसङ्‌गत छैन र?—प्रेषित १७:२९.

सृष्टिकर्तालाई सबैभन्दा नजिकबाट चिन्‍नुभएको येसु ख्रिष्टले यसो भन्‍नुभयो: “के दुई वटा भँगेरा एक पैसामा बिक्दैन र? तैपनि तीमध्ये एउटा पनि तिमीहरूका बुबाले थाह नपाई भुईँमा झर्दैन। तर तिमीहरूको शिरको केशसमेत सबै गनिएका छन्‌। त्यसैले नडराओ, तिमीहरू थुप्रै भँगेराभन्दा बहुमूल्य छौ।”—मत्ति १०:२९-३१.

हामीमध्ये थोरैले मात्र उडिरहेका साना चराहरूलाई ध्यान दिन्छौँ। तीमध्ये कुनै भुईँमा झरेको त हामीलाई याद पनि हुँदैन। तर स्वर्गमा बस्नुहुने हाम्रो ईश्‍वरले तिनीहरू हरेकलाई याद गर्नुहुन्छ! त्यसोभए उहाँको नजरमा के मानिस थुप्रै चराहरूभन्दा बहुमूल्य छैन त? पक्कै छ। त्यसैले ईश्‍वरले तपाईँको चासो राख्नुहुन्‍न भनेर ‘डराउनु’ वा शङ्‌का गर्नु पर्दैन। बरु उहाँ तपाईँको गहिरो चासो राख्नुहुन्छ भन्‍ने कुरामा ढुक्क हुनुहोस्‌!

 धर्मशास्त्रले यस्तो आश्‍वासन दिन्छ:

• “यहोवाको नजर सर्वत्र रहन्छ, असल र खराब दुवैलाई उहाँ ध्यान दिएर हेर्नुहुन्छ।”—हितोपदेश १५:३.

• “धर्मीहरूमाथि यहोवाको नजर रहन्छ अनि तिनीहरूले उहाँलाई गुहार्दा उहाँले आफ्नो कान थाप्नुहुन्छ।”—भजन ३४:१५.

• “तपाईँको अटल प्रेमको कारण म खुसीयाली मनाउनेछु किनकि तपाईँले मेरो दुःख देख्नुभएको छ; मेरो वेदना तपाईँलाई थाह छ।”—भजन ३१:७.

ईश्‍वर हाम्रो भलो चाहनुहुन्छ र हाम्रो ख्याल राखेर माया देखाउनुहुन्छ भनेर थाह पाउँदा यसले हाम्रो जीवनमा पक्कै फरक पार्छ। कसरी? बेलायतकी हानालाई c विचार गर्नुहोस्‌। तिनी भन्छिन्‌:

“यहोवाले मलाई माया नै गर्नुहुन्‍न र मेरो प्रार्थनाको जवाफै दिनुहुन्‍न जस्तो पटक-पटक लागेको थियो। ममा नै विश्‍वासको कमी भएकोले यस्तो महसुस भएको होला भन्ठान्थेँ। उहाँको नजरमा म बेकामको मानिस भएकोले उहाँले सजाय दिँदै हुनुहुन्छ र बेवास्ता गर्दै हुनुहुन्छ भनेर सोचेँ।”

तर यहोवाले चासो राख्नुहुन्छ र माया गर्नुहुन्छ भनेर हाना पछि ढुक्क भइन्‌। उनको सोचाइ कसरी परिवर्तन भयो? उनी भन्छिन्‌: “मेरो सोचाइमा बिस्तारै परिवर्तन आयो। येसुको फिरौतीको बलिदानबारे धेरै वर्षअघि दिइएको एउटा भाषण अझै सम्झन्छु। त्यस भाषणले मेरो मनमा गहिरो छाप पाऱ्‍यो अनि यहोवाले मलाई माया गर्नुहुन्छ भनेर विश्‍वस्त हुन सकेँ। प्रार्थनाहरूको जवाफ पाउँदा म आँसु थाम्नै सक्दिनँ किनभने यहोवा मलाई कत्ति धेरै माया गर्नुहुन्छ भनेर महसुस गर्न सक्छु। बाइबल अध्ययन र ख्रिष्टियन सभाहरूबाट पनि यहोवा, उहाँको व्यक्‍तित्व अनि उहाँ हामीबारे कस्तो महसुस गर्नुहुन्छ भन्‍नेबारे धेरै कुरा सिक्न सकेकी छु। यहोवा हामी प्रत्येकलाई मदत गर्न, माया देखाउन र हाम्रो ख्याल राख्न कत्ति इच्छुक हुनुहुन्छ भनेर बल्ल बुझेँ।”

हानाले भनेको कुरा साँच्चै प्रोत्साहनदायी छ। तर ईश्‍वरले तपाईँलाई राम्ररी चिन्‍नुहुन्छ र तपाईँको भावना पनि बुझ्नुहुन्छ भनेर कसरी पक्का हुन सक्नुहुन्छ? यसपछिको लेखमा यस प्रश्‍नबारे छलफल गर्नेछौँ।