ആർ​ത്രൈ​റ്റിസ്‌ എന്തെന്നു മനസ്സി​ലാ​ക്കു​ക

“രാത്രി ഉറങ്ങാൻ കിടക്കു​മ്പോൾ എന്റെ വികൃ​ത​മായ കൈകാ​ലു​കൾ നോക്കി ഞാൻ കരയും.”—മിഡോ​രി, ജപ്പാൻ.

കാലങ്ങ​ളാ​യി മനുഷ്യ​വർഗത്തെ കഷ്ടപ്പെ​ടു​ത്തുന്ന ഒരു രോഗ​മാണ്‌ ആർ​ത്രൈ​റ്റിസ്‌. നൂറ്റാ​ണ്ടു​കൾക്കു മുമ്പു​തന്നെ അതുണ്ടാ​യി​രു​ന്നു എന്നതിന്റെ തെളിവ്‌ ഈജി​പ്‌ഷ്യൻ മമ്മിക​ളിൽ കാണാം. തെളി​വ​നു​സ​രിച്ച്‌, പര്യ​വേ​ക്ഷ​ക​നായ ക്രിസ്റ്റഫർ കൊളം​ബ​സി​നെ ഈ രോഗം ബാധി​ച്ചി​രു​ന്നു. ഇന്ന്‌ ദശലക്ഷ​ക്ക​ണ​ക്കിന്‌ ആളുകൾ ഈ രോഗ​ത്തിന്‌ ഇരയാ​യി​രി​ക്കു​ന്നു. ശരീര​ത്തെ​യും മനസ്സി​നെ​യും തളർത്തി​ക്ക​ള​യുന്ന ഈ രോഗം യഥാർഥ​ത്തിൽ എന്താണ്‌?

“ആർ​ത്രൈ​റ്റിസ്‌” എന്ന വാക്ക്‌ “വീങ്ങിയ സന്ധികൾ” എന്ന്‌ അർഥമുള്ള ഗ്രീക്കു പദങ്ങളിൽനി​ന്നു വന്നതാണ്‌. 100-ലധികം വാത​രോ​ഗ​ങ്ങ​ളും രോഗാ​വ​സ്ഥ​ക​ളു​മാ​യി  ഇതിനു ബന്ധമുണ്ട്‌. a ഈ രോഗം സന്ധികളെ മാത്രമേ ബാധിക്കൂ എന്നില്ല. അവയോ​ടു ബന്ധപ്പെട്ട പേശികൾ, അസ്ഥികൾ, സ്‌നാ​യു​ക്കൾ, കണ്ഡരങ്ങൾ എന്നിവ​യെ​യെ​ല്ലാം അതു ബാധി​ക്കാം. ചിലതരം ആർ​ത്രൈ​റ്റി​സു​കൾ നിങ്ങളു​ടെ ത്വക്കി​നും ആന്തരാ​വ​യ​വ​ങ്ങൾക്കും കണ്ണിനു പോലും കേടു വരുത്തി​യേ​ക്കാം. ആർ​ത്രൈ​റ്റി​സി​ന്റെ ഏറ്റവും സാധാ​ര​ണ​മാ​യി കണ്ടുവ​രുന്ന രണ്ടു വകഭേ​ദ​ങ്ങ​ളിൽ നമുക്ക്‌ ഇപ്പോൾ ശ്രദ്ധ കേന്ദ്രീ​ക​രി​ക്കാം—ഓസ്റ്റി​യോ ആർ​ത്രൈ​റ്റി​സും റൂമ​റ്റോ​യ്‌ഡ്‌ ആർ​ത്രൈ​റ്റി​സും.

സന്ധിയു​ടെ രൂപമാ​തൃ​ക

രണ്ട്‌ അസ്ഥികൾ കൂടി​ച്ചേ​രുന്ന ഭാഗത്തി​നാണ്‌ സന്ധി എന്നു പറയു​ന്നത്‌. ഒരു സ്രാവ സന്ധിക്കു ചുറ്റും അതിനെ സംരക്ഷി​ക്കു​ക​യും താങ്ങു​ക​യും ചെയ്യുന്ന ദൃഢമായ ഒരു കവചം ഉണ്ടായി​രി​ക്കും. (4-ാം പേജിലെ ചിത്രം കാണുക.) ഈ സന്ധി കവചത്തെ ആവരണം ചെയ്യുന്ന ഒരു സ്രാവ സ്‌തരം ഉണ്ട്‌. ഈ സ്‌തരം വഴുവ​ഴു​പ്പുള്ള ഒരു ദ്രാവകം സ്രവി​പ്പി​ക്കു​ന്നു. സന്ധി കവചത്തി​നു​ള്ളി​ലാ​യി രണ്ട്‌ അസ്ഥിക​ളു​ടെ​യും അഗ്രഭാ​ഗ​ങ്ങളെ തരുണാ​സ്ഥി എന്ന്‌ അറിയ​പ്പെ​ടുന്ന മിനു​സ​മാർന്ന, ഇലാസ്‌തി​ക​ത​യുള്ള ഒരു കല ആവരണം ചെയ്യുന്നു. അസ്ഥികൾ തമ്മിൽ കൂട്ടി ഉരയു​ന്നതു തടയാൻ ഇതു സഹായി​ക്കു​ന്നു. കൂടാതെ, ഇത്‌ അസ്ഥിക​ളു​ടെ അറ്റത്ത്‌ കുഷൻ പോലെ വർത്തി​ക്കു​ക​യും അസ്ഥിക​ളിൽ ഉടനീളം മർദത്തെ സമമായ തോതിൽ വ്യാപി​പ്പി​ക്കു​ക​യും ചെയ്‌തു​കൊണ്ട്‌ ഒരു ഷോക്ക്‌ അബ്‌സോർബ​റാ​യും ഉതകുന്നു.

ഉദാഹ​ര​ണ​ത്തിന്‌, നടക്കു​മ്പോ​ഴും ഓടു​മ്പോ​ഴും ചാടു​മ്പോ​ഴു​മെ​ല്ലാം അരക്കെ​ട്ടി​ലും മുട്ടി​ലും ശരീര​ഭാ​ര​ത്തി​ന്റെ നാല്‌ ഇരട്ടി മുതൽ എട്ട്‌ ഇരട്ടി വരെ മർദം ചെലു​ത്ത​പ്പെ​ടു​ന്നു! ആ മർദത്തിൽ അധിക​വും സ്വീക​രി​ക്കു​ന്നത്‌ ചുറ്റു​മുള്ള പേശി​ക​ളും സ്‌നാ​യു​ക്ക​ളും ആണെങ്കി​ലും അതിന്റെ ഒരു ഭാഗം അസ്ഥിയി​ലും ചെലു​ത്ത​പ്പെ​ടും. ഒരു സ്‌പോഞ്ച്‌ പോലെ അമർന്നു​കൊണ്ട്‌ ഈ മർദത്തെ താങ്ങാൻ തരുണാ​സ്ഥി അസ്ഥിയെ സഹായി​ക്കു​ന്നു.

റൂമ​റ്റോ​യ്‌ഡ്‌ ആർ​ത്രൈ​റ്റിസ്‌

റൂമ​റ്റോ​യ്‌ഡ്‌ ആർ​ത്രൈ​റ്റി​സി​ന്റെ (ആർഎ) കാര്യ​ത്തിൽ, ശരീര​ത്തി​ന്റെ പ്രതി​രോധ വ്യവസ്ഥ സന്ധികൾക്കെ​തി​രെ ഒരു ‘സന്ധിയി​ല്ലാ​സ​മരം’ പ്രഖ്യാ​പി​ക്കു​ന്നു. അജ്ഞാത​മായ ഏതോ കാരണ​ത്താൽ പ്രതി​രോധ വ്യവസ്ഥ​യു​ടെ മുഖ്യ ഭാഗമായ ടി കോശങ്ങൾ ഉൾപ്പെ​ടെ​യുള്ള ശരീര​ത്തി​ലെ രക്താണു​ക്കൾ വലിയ അളവിൽ സന്ധി ഗഹ്വര​ങ്ങ​ളി​ലേക്കു പ്രവഹി​ക്കു​ന്നു. ഇത്‌ രാസ​പ്ര​വർത്ത​ന​ങ്ങ​ളു​ടെ ഒരു പരമ്പര​യ്‌ക്കു​തന്നെ തിരി​കൊ​ളു​ത്തു​ന്നു. ഇതിന്റെ ഫലമായി സന്ധി വീങ്ങുന്നു. പാനസ്‌ എന്ന ട്യൂമർ പോലുള്ള ഒരു കലാസ​ഞ്ചയം രൂപം​കൊ​ള്ളാൻ ഇടയാ​ക്കി​ക്കൊണ്ട്‌ സ്രാവ കോശങ്ങൾ അനിയ​ന്ത്രി​ത​മാ​യി വിഭജി​ക്കാൻ തുടങ്ങി​യേ​ക്കാം. പാനസ്‌ ഉത്‌പാ​ദി​പ്പി​ക്കുന്ന ചില എൻ​സൈ​മു​കൾ തരുണാ​സ്ഥി​യെ നശിപ്പി​ക്കു​ന്നു. അസ്ഥികൾ തമ്മിൽ ഉരയു​ന്ന​തിന്‌ ഇത്‌ ഇടയാ​ക്കും. ചലന​ശേ​ഷി​യു​ടെ നഷ്ടവും അതിക​ഠി​ന​മായ വേദന​യും ആയിരി​ക്കും ഫലം. ഈ നശീകരണ പ്രക്രിയ കണ്ഡരങ്ങ​ളെ​യും സ്‌നാ​യു​ക്ക​ളെ​യും പേശി​ക​ളെ​യും കൂടെ ദുർബ​ല​മാ​ക്കു​ന്നു. തത്‌ഫ​ല​മാ​യി സന്ധികൾ ഉറപ്പി​ല്ലാ​ത്ത​താ​കു​ക​യും അവയ്‌ക്കു ഭാഗി​ക​മാ​യി സ്ഥാന​ഭ്രം​ശം സംഭവി​ക്കു​ക​യും ചെയ്യുന്നു. ഇത്‌ മിക്ക​പ്പോ​ഴും രൂപ​വൈ​കൃ​ത​ത്തി​ലേക്കു നയിക്കു​ന്നു. സാധാ​ര​ണ​ഗ​തി​യിൽ ആർഎ ഒരേ മാതൃക പിൻപ​റ്റി​ക്കൊണ്ട്‌ മണിക​ണ്‌ഠം, കാൽമുട്ട്‌, പാദം എന്നിവ​യി​ലെ സന്ധിക​ളെ​യാ​ണു ബാധി​ക്കു​ന്നത്‌. ആർഎ രോഗി​ക​ളിൽ 50 ശതമാ​ന​ത്തി​ലു​മ​ധി​കം പേർക്ക്‌ ത്വക്കി​ന​ടി​യിൽ ചെറിയ മുഴകൾ ഉള്ളതാ​യും കാണ​പ്പെ​ടു​ന്നു. ചിലരിൽ വിളർച്ച​യും കണ്ണി​ന്റെ​യും തൊണ്ട​യു​ടെ​യും വരൾച്ച​യും വേദന​യും പോലുള്ള ലക്ഷണങ്ങ​ളും കാണാ​റുണ്ട്‌. തളർച്ച​യും പനിയും പേശീ​വേ​ദ​ന​യും ഉൾപ്പെ​ടെ​യുള്ള ഫ്‌ളൂ​വി​ന്റെ ലക്ഷണങ്ങ​ളും സാധാ​ര​ണ​മാ​യി ആർഎ രോഗി​ക​ളിൽ കണ്ടുവ​രു​ന്നു.

ആർഎ-യുടെ ആരംഭം, അത്‌ ഉളവാ​ക്കുന്ന ഫലങ്ങൾ, ദൈർഘ്യം എന്നിവ ഓരോ​രു​ത്ത​രി​ലും വളരെ വ്യത്യ​സ്‌ത​മാ​യി​രി​ക്കും. ഒരാളിൽ വേദന​യും വഴക്കമി​ല്ലാ​യ്‌മ​യും മെല്ലെ, ആഴ്‌ച​ക​ളോ വർഷങ്ങ​ളോ കൊണ്ടാ​യി​രി​ക്കാം അനുഭ​വ​പ്പെട്ടു തുടങ്ങു​ന്നത്‌. എന്നാൽ മറ്റൊ​രാൾക്ക്‌ ഇതെല്ലാം പെട്ടെന്ന്‌ ഉണ്ടാ​യേ​ക്കാം. ചിലരിൽ ആർഎ ഏതാനും മാസം മാത്രം നീണ്ടു​നിന്ന ശേഷം വലിയ തകരാ​റൊ​ന്നും വരുത്താ​തെ അപ്രത്യ​ക്ഷ​മാ​കു​ന്നു. മറ്റു ചിലരിൽ രോഗം പലപ്പോ​ഴും കലശലാ​കു​ക​യും ഇടയ്‌ക്ക്‌ ആശ്വാ​സ​വേ​ളകൾ ഉണ്ടാകു​ക​യും ചെയ്യുന്നു. ചിലരിൽ രോഗം വർഷങ്ങ​ളോ​ളം തുടരു​ക​യും മൂർച്ഛിച്ച്‌ മൂർച്ഛിച്ച്‌ ഒടുവിൽ അംഗ​വൈ​ക​ല്യ​ത്തിന്‌ ഇടയാ​ക്കു​ക​യും ചെയ്യും.

ആർഎ വരാൻ സാധ്യ​ത​യു​ള്ളത്‌ ആർക്കാണ്‌? “മധ്യവ​യ​സ്‌ക​രായ സ്‌ത്രീ​ക​ളി​ലാണ്‌ ഇത്‌ ഏറ്റവും സാധാ​ര​ണ​മാ​യി കണ്ടുവ​രു​ന്നത്‌” എന്ന്‌ ഡോ. മൈക്കൾ ഷിഫ്‌ പറയുന്നു. എന്നിരു​ന്നാ​ലും “ഏതു പ്രായ​ത്തി​ലുള്ള ആരെയും അതു ബാധി​ക്കാം, പുരു​ഷ​ന്മാ​രെ​യും കുട്ടി​ക​ളെ​യും ഉൾപ്പെടെ” എന്നും ഷിഫ്‌ കൂട്ടി​ച്ചേർക്കു​ന്നു. കുടും​ബ​ത്തിൽ ആർക്കെ​ങ്കി​ലും റൂമ​റ്റോ​യ്‌ഡ്‌ ആർ​ത്രൈ​റ്റിസ്‌ ഉണ്ടെങ്കി​ലും രോഗ​സാ​ധ്യത കൂടു​ത​ലാണ്‌. പുകവലി, അമിത​തൂ​ക്കം,  രക്തപ്പകർച്ച എന്നിവ​യെ​ല്ലാം രോഗം വരാനുള്ള സാധ്യത വളരെ​യ​ധി​കം വർധി​പ്പി​ക്കു​ന്ന​താ​യി പല പഠനങ്ങ​ളും സൂചി​പ്പി​ക്കു​ന്നു.

ഓസ്റ്റി​യോ ആർ​ത്രൈ​റ്റിസ്‌

വെസ്റ്റേൺ ജേർണൽ ഓഫ്‌ മെഡി​സിൻ പറയുന്നു: “ഓസ്റ്റി​യോ ആർ​ത്രൈ​റ്റിസ്‌ പല വിധങ്ങ​ളിൽ കാലാ​വ​സ്ഥ​യ്‌ക്കു സമാന​മാണ്‌—എല്ലായി​ട​ത്തും ഉണ്ടെങ്കി​ലും അതു പലപ്പോ​ഴും ശ്രദ്ധി​ക്ക​പ്പെ​ടാ​റില്ല, എന്നാൽ ചില​പ്പോൾ അതിന്റെ ഫലങ്ങൾ വലിയ​തോ​തിൽ ദൃശ്യ​മാ​കു​ന്നു.” ആർഎ-യിൽ നിന്നു വ്യത്യ​സ്‌ത​മാ​യി ഓസ്റ്റി​യോ ആർ​ത്രൈ​റ്റിസ്‌ (ഒഎ) സാധാ​ര​ണ​ഗ​തി​യിൽ മറ്റു ശരീരാ​വ​യ​വ​ങ്ങ​ളി​ലേക്കു വ്യാപി​ക്കാ​റില്ല. ഒന്നോ അല്ലെങ്കിൽ ഏതാനും സന്ധിക​ളെ​യോ മാത്രമേ അതു ബാധി​ക്കു​ന്നു​ള്ളൂ. തരുണാ​സ്ഥി​ക്കു മെല്ലെ തേയ്‌മാ​നം സംഭവി​ക്കു​ന്ന​തോ​ടെ അസ്ഥികൾ തമ്മിൽ ഉരയാൻ തുടങ്ങു​ന്നു. ഇതോ​ടൊ​പ്പം അസ്ഥിക​ളിൽ കൂടു​ത​ലായ വളർച്ച​യും ഉണ്ടാകു​ന്നു. കൂടു​ത​ലാ​യി വളരുന്ന അസ്ഥികളെ ഓസ്റ്റി​യോ​ഫൈ​റ്റു​കൾ എന്നാണു പറയു​ന്നത്‌. സിസ്റ്റുകൾ രൂപം കൊ​ണ്ടേ​ക്കാം. അതിന​ടി​യിൽ ഉള്ള അസ്ഥി കൂടുതൽ കട്ടിയു​ള്ള​താ​കു​ക​യും വികൃ​ത​മാ​യി​ത്തീ​രു​ക​യും ചെയ്യുന്നു. വിരൽ മടക്കു​ക​ളി​ലെ മുഴകൾ, സന്ധിക​ളിൽ കേൾക്കുന്ന കിരു​കി​രുപ്പ്‌ ശബ്ദങ്ങൾ, പെട്ടെ​ന്നു​ണ്ടാ​കുന്ന ശക്തമായ പേശീ​സ​ങ്കോ​ചങ്ങൾ, വേദന, വഴക്കമി​ല്ലായ്‌മ, ചലന​ശേഷി നഷ്ടം എന്നിവ​യെ​ല്ലാം മറ്റു ലക്ഷണങ്ങ​ളാണ്‌.

ഒരു വാർധ​ക്യ​സഹജ രോഗ​മാ​യാണ്‌ കഴിഞ്ഞ കാലങ്ങ​ളിൽ ഒഎ വീക്ഷി​ക്ക​പ്പെ​ട്ടി​രു​ന്നത്‌. എന്നാൽ വിദഗ്‌ധർ ആ ധാരണ കൈ​വെ​ടി​ഞ്ഞിട്ട്‌ ഇപ്പോൾ നാളേ​റെ​യാ​യി. ദി അമേരി​ക്കൻ ജേർണൽ ഓഫ്‌ മെഡിസൻ പറയുന്നു: “സാധാരണ മർദത്തി​നു വിധേ​യ​മാ​കുന്ന ഒരു സന്ധി വ്യക്തി​കൾക്കു പ്രായ​മേ​റു​ന്ന​തോ​ടെ പ്രവർത്ത​ന​ര​ഹി​ത​മാ​യി​ത്തീ​രും എന്നു വിശ്വ​സി​ക്കു​ന്ന​തി​നു കാരണ​മൊ​ന്നു​മില്ല.” അങ്ങനെ​യാ​ണെ​ങ്കിൽ പിന്നെ ഓസ്റ്റി​യോ ആർ​ത്രൈ​റ്റി​സിന്‌ ഇടയാ​ക്കു​ന്നത്‌ എന്താണ്‌? ബ്രിട്ടീഷ്‌ മാസി​ക​യായ ദ ലാൻസെറ്റ്‌ പറയു​ന്ന​ത​നു​സ​രിച്ച്‌ അതിന്റെ യഥാർഥ കാരണത്തെ കുറിച്ച്‌ “അനേകം തർക്കങ്ങൾ നിലവി​ലുണ്ട്‌.” ചില ഗവേഷ​ക​രു​ടെ അഭി​പ്രാ​യ​ത്തിൽ അസ്ഥിക​ളിൽ ആദ്യം ചെറിയ പൊട്ട​ലു​കൾ പോ​ലെ​യുള്ള തകരാ​റു​കൾ ഉണ്ടാ​യേ​ക്കാം. ഇത്‌ എല്ലിന്റെ കൂടു​ത​ലായ വളർച്ച​യി​ലേ​ക്കും തരുണാ​സ്ഥി​യു​ടെ നാശത്തി​ലേ​ക്കും നയി​ച്ചേ​ക്കാം. എന്നാൽ ഒഎ-യുടെ ആരംഭം തരുണാ​സ്ഥി​യിൽനി​ന്നു തന്നെയാ​ണെ​ന്നാണ്‌ മറ്റു ചിലരു​ടെ പക്ഷം. അതിനു തേയ്‌മാ​നം സംഭവി​ച്ചു നശിക്കു​മ്പോൾ അടിയി​ലുള്ള അസ്ഥിയി​ന്മേൽ ചെലു​ത്ത​പ്പെ​ടുന്ന മർദം വർധി​ക്കു​മെന്ന്‌ അവർ കരുതു​ന്നു. കേടു പറ്റിയ തരുണാ​സ്ഥി​യെ പുനഃ​സ്ഥി​തീ​ക​രി​ക്കാൻ ശരീരം ശ്രമി​ക്കു​മ്പോൾ രോഗ​ല​ക്ഷ​ണങ്ങൾ കണ്ടുതു​ട​ങ്ങു​ന്നു.

ഒഎ വരാൻ സാധ്യ​ത​യു​ള്ളത്‌ ആർക്കാണ്‌? പ്രായം അതിൽത്തന്നെ ഒഎ-യ്‌ക്ക്‌ ഇടയാ​ക്കു​ന്നി​ല്ലെ​ങ്കി​ലും പ്രായം ചെല്ലു​ന്തോ​റും സന്ധിക​ളി​ലെ തരുണാ​സ്ഥി​ക്കു നാശം സംഭവി​ക്കാ​നുള്ള സാധ്യത വർധി​ക്കു​ന്ന​താ​യി കാണ​പ്പെ​ടു​ന്നു. സന്ധിക​ളി​ലെ എല്ലുകൾ കൂടി​ച്ചേർന്നി​രി​ക്കുന്ന വിധത്തി​നുള്ള എന്തെങ്കി​ലും തകരാറ്‌, കാലി​ലെ​യും തുടയി​ലെ​യും ദുർബ​ല​മായ പേശികൾ, നീളവ്യ​ത്യാ​സ​മുള്ള കാലുകൾ, സ്ഥാനം തെറ്റിയ നട്ടെല്ല്‌ എന്നിവ​യൊ​ക്കെ ഇതു വരാനുള്ള സാധ്യത വർധി​പ്പി​ക്കു​ന്നു. കൂടാതെ, ഒരു അപകട​മോ ഒരു സന്ധിതന്നെ കൂടു​ത​ലാ​യി ഉപയോ​ഗി​ക്കുന്ന തരത്തി​ലുള്ള ജോലി​യോ നിമിത്തം സന്ധിക്കു​ണ്ടാ​കുന്ന ക്ഷതവും ഓസ്റ്റി​യോ ആർ​ത്രൈ​റ്റി​സി​ലേക്കു നയി​ച്ചേ​ക്കാം. നശീകരണ പ്രക്രിയ തുടങ്ങി​ക്ക​ഴി​ഞ്ഞാൽ പിന്നെ അമിത​തൂ​ക്ക​വും ഒഎ കൂടുതൽ വഷളാ​കു​ന്ന​തിന്‌ ഇടയാ​ക്കി​യേ​ക്കാം.

ഡോ. ടിം സ്‌പെക്ടർ പറയുന്നു: “ഓസ്റ്റി​യോ ആർ​ത്രൈ​റ്റിസ്‌ സങ്കീർണ​മായ ഒരു രോഗ​മാണ്‌. ബാഹ്യ​ഘ​ട​ക​ങ്ങ​ളോ​ടൊ​പ്പം ഈ രോഗ​ത്തിന്‌ പാരമ്പ​ര്യ​സം​ബ​ന്ധ​മായ ഒരു അടിസ്ഥാ​ന​വു​മുണ്ട്‌.” ഒഎ-യുടെ പാരമ്പ​ര്യ​മുള്ള കുടും​ബ​ങ്ങ​ളിൽപ്പെട്ട മധ്യവ​യ​സ്‌ക​രും പ്രായ​മാ​യ​വ​രു​മായ സ്‌ത്രീ​കൾക്കാണ്‌ ഇതു വരാൻ ഏറ്റവും കൂടുതൽ സാധ്യത. അസ്ഥി​ദ്ര​വീ​ക​ര​ണ​ത്തിൽനി​ന്നു വ്യത്യ​സ്‌ത​മാ​യി കുറഞ്ഞ അസ്ഥി സാന്ദ്ര​തയല്ല, മറിച്ച്‌ കൂടിയ അസ്ഥി സാന്ദ്ര​ത​യാണ്‌ ഒഎ-യിലേക്കു നയിക്കു​ന്നത്‌. കൂടാതെ, സ്വതന്ത്ര ഓക്‌സി​ജൻ ആറ്റങ്ങൾ വരുത്തി​വെ​ക്കുന്ന തകരാ​റു​ക​ളും ജീവകം സി-യുടെ​യും ഡി-യുടെ​യും കുറവും ഈ രോഗ​ത്തി​നു കാരണ​മാ​കാ​റു​ണ്ടെന്ന്‌ ചില ഗവേഷകർ പറയുന്നു.

ചികിത്സ

മരുന്നു​കൾ, വ്യായാ​മം, ജീവി​ത​ശൈലി ചിട്ട​പ്പെ​ടു​ത്തൽ എന്നിവ​യെ​ല്ലാം ഉൾപ്പെ​ട്ട​താണ്‌ പലപ്പോ​ഴും ആർ​ത്രൈ​റ്റി​സി​ന്റെ ചികിത്സ. ഒരു ഫിസി​യോ​തെ​റാ​പിസ്റ്റ്‌ ഒരു വ്യായാമ പരിപാ​ടി നിർദേ​ശി​ച്ചേ​ക്കാം. സന്ധികൾ പല രീതി​യിൽ ചലിപ്പി​ക്കുന്ന തരത്തി​ലുള്ള വ്യായാ​മങ്ങൾ,  പേശി​ക​ളിൽ മർദം ചെലു​ത്തു​ക​യും അവയെ സങ്കോ​ചി​ക്കാൻ അനുവ​ദി​ക്കാ​തി​രി​ക്കു​ക​യും ചെയ്യുന്ന തരത്തി​ലുള്ള ഐസോ​മെ​ട്രിക്‌ വ്യായാമ മുറകൾ, ഏയ്‌റോ​ബിക്‌ വ്യായാ​മങ്ങൾ, മർദം ചെലു​ത്ത​പ്പെ​ടുന്ന പേശികൾ സങ്കോ​ചി​ക്കാൻ അനുവ​ദി​ക്കുന്ന ഐസോ​ട്ടോ​ണിക്‌ വ്യായാ​മങ്ങൾ എന്നിവ​യെ​ല്ലാം ഇതിൽ ഉൾപ്പെ​ട്ടേ​ക്കാം. സന്ധിയു​ടെ വേദന, വീക്കം, ശാരീ​രി​കാ​സ്വാ​സ്ഥ്യം, തളർച്ച, വിഷാദം എന്നിങ്ങനെ നിരവധി ലക്ഷണങ്ങൾ നിവാ​രണം ചെയ്യു​ന്ന​തിൽ ഇവ വളരെ​യ​ധി​കം സഹായ​ക​മാ​യി​രി​ക്കു​ന്ന​താ​യി കാണ​പ്പെ​ട്ടി​ട്ടുണ്ട്‌. വയോ​വൃ​ദ്ധ​രിൽ പോലും വ്യായാ​മ​ത്തി​ന്റെ പ്രയോ​ജ​നങ്ങൾ നിരീ​ക്ഷി​ക്കാൻ കഴിഞ്ഞി​ട്ടുണ്ട്‌. അസ്ഥി സാന്ദ്രത കുറയു​ന്നതു തടയാൻ സഹായി​ക്കു​ന്ന​തി​നും വ്യായാ​മ​ത്തി​നു കഴിയും. ശരീര​ത്തിൽ ചൂടും തണുപ്പും ഏൽപ്പി​ക്കുന്ന തരം ചികി​ത്സാ​രീ​തി​ക​ളും അക്യൂ​പ​ങ്‌ച​റും വേദന​യ്‌ക്ക്‌ ആശ്വാസം കാണാൻ സഹായി​ക്കു​ന്നു​വെന്ന്‌ ചിലർ അവകാ​ശ​പ്പെ​ടു​ന്നു. b

തൂക്കം കുറയ്‌ക്കു​ന്നത്‌ സന്ധി വേദന ലഘൂക​രി​ക്കു​ന്ന​തിൽ വലിയ പങ്കുവ​ഹി​ക്കു​ന്ന​തി​നാൽ ആർ​ത്രൈ​റ്റിസ്‌ രോഗി​കൾ തങ്ങളുടെ ഭക്ഷണ​ക്രമം ശ്രദ്ധി​ക്കു​ന്നതു വളരെ പ്രധാ​ന​മാണ്‌. പച്ചിലകൾ, പഴങ്ങൾ, ഒമേഗ-3 ഫാറ്റി ആസിഡു​കൾ ഉള്ള ശീതജല മത്സ്യങ്ങൾ എന്നിങ്ങനെ കാൽസ്യം സമൃദ്ധ​മാ​യുള്ള ഭക്ഷണങ്ങൾ കഴിക്കു​ന്ന​തും സംസ്‌ക​രി​ച്ച​തും പൂരിത കൊഴുപ്പ്‌ അടങ്ങി​യി​ട്ടു​ള്ള​തു​മായ ഭക്ഷണം ഒഴിവാ​ക്കു​ന്ന​തും തൂക്കം കുറയ്‌ക്കു​ന്ന​തി​നു മാത്രമല്ല വേദന കുറയ്‌ക്കു​ന്ന​തി​നും സഹായ​ക​മാ​ണെന്ന്‌ ചിലർ പറയുന്നു. എങ്ങനെ? അവരുടെ അഭി​പ്രാ​യ​ത്തിൽ ഇത്തര​മൊ​രു ഭക്ഷണ​ക്രമം വീക്കം തടയു​ന്ന​തിൽ സഹായി​ക്കും. മാംസം, പാൽ ഉത്‌പ​ന്നങ്ങൾ, ഗോതമ്പ്‌ എന്നിവ​യും നൈറ്റ്‌ഷേഡ്‌ കുടും​ബ​ത്തിൽപ്പെട്ട തക്കാളി, ഉരുള​ക്കി​ഴങ്ങ്‌, മുളക്‌, കത്തിരി എന്നിങ്ങ​നെ​യുള്ള പച്ചക്കറി​ക​ളും ഒഴിവാ​ക്കു​ന്നത്‌ ഫലപ്ര​ദ​മാ​ണെ​ന്നും ചിലർ കണ്ടെത്തി​യി​ട്ടുണ്ട്‌.

ചില കേസു​ക​ളിൽ ആർ​ത്രോ​സ്‌കോ​പ്പി എന്ന ഒരു ശസ്‌ത്ര​ക്രി​യാ നടപടി ശുപാർശ ചെയ്യ​പ്പെ​ട്ടി​ട്ടുണ്ട്‌. ഇതിൽ ശസ്‌ത്ര​ക്രി​യാ വിദഗ്‌ധൻ സന്ധികൾക്കു​ള്ളി​ലേക്ക്‌ ഒരു ഉപകരണം കടത്തി നാശകാ​രി​ക​ളായ എൻ​സൈ​മു​കളെ ഉത്‌പാ​ദി​പ്പി​ക്കുന്ന സ്രാവ കല നീക്കം ചെയ്യുന്നു. എന്നാൽ വീക്കം പിന്നീ​ടും വരുന്ന​തി​നാൽ ഈ പ്രക്രി​യ​യ്‌ക്ക്‌ ഫലപ്ര​ദ​ത്വം കുറവാണ്‌. ഇതി​നെ​ക്കാൾ വലിയ ഒരു ശസ്‌ത്ര​ക്രി​യാ നടപടി​യാണ്‌ ആർ​ത്രോ​പ്ലാ​സ്റ്റി. ഇതിൽ സന്ധി (സാധാ​ര​ണ​ഗ​തി​യിൽ അരക്കെ​ട്ടോ മുട്ടോ) അപ്പാടെ നീക്കം ചെയ്‌ത്‌ തത്‌സ്ഥാ​നത്തു കൃത്രി​മ​മായ ഒന്ന്‌ വെക്കുന്നു. ഈ ശസ്‌ത്ര​ക്രി​യ​യു​ടെ ഫലം 10 മുതൽ 15 വരെ വർഷ​ത്തേക്കു നീണ്ടു​നിൽക്കും. മിക്ക​പ്പോ​ഴും വേദന ദൂരീ​ക​രി​ക്കുന്ന കാര്യ​ത്തിൽ ഇതു വളരെ ഫലപ്ര​ദ​മാണ്‌.

 സമീപ​കാ​ലത്ത്‌ ഡോക്ടർമാർ ശരീര​ത്തിൽ അധികം കീറി​മു​റി​ക്ക​ലു​കൾ ആവശ്യ​മി​ല്ലാത്ത തരം ചികി​ത്സാ​രീ​തി​കൾ പരീക്ഷി​ച്ചു നോക്കി​യി​രി​ക്കു​ന്നു. അതി​ലൊ​ന്നാണ്‌ വിസ്‌കോ​സ​പ്‌ളി​മെ​ന്റേഷൻ ചികി​ത്സാ​രീ​തി. ഇതിൽ ഹയലു​റോ​ണിക്‌ അമ്ലം സന്ധിയി​ലേക്ക്‌ നേരിട്ടു കുത്തി​വെ​ക്കു​ന്നു. മുട്ടിലെ സന്ധിക​ളി​ലാണ്‌ ഇതു സാധാ​ര​ണ​മാ​യി നടത്തി​വ​രു​ന്നത്‌. ചില യൂറോ​പ്യൻ പഠനങ്ങൾ അനുസ​രിച്ച്‌ തരുണാ​സ്ഥി​യു​ടെ കേടു​പോ​ക്കൽ സാധ്യ​മാ​ക്കുന്ന പദാർഥങ്ങൾ (തരുണാ​സ്ഥി സംരക്ഷണ ഘടകങ്ങൾ) കുത്തി​വെ​ക്കു​ന്ന​തും കുറെ​യൊ​ക്കെ ഫലപ്ര​ദ​മാ​ണെന്നു തെളി​ഞ്ഞി​ട്ടുണ്ട്‌.

ആർ​ത്രൈ​റ്റിസ്‌ പൂർണ​മാ​യി ഭേദമാ​ക്കാൻ കഴിയുന്ന ഔഷധ​ങ്ങ​ളൊ​ന്നും ഇതുവരെ കണ്ടുപി​ടി​ച്ചി​ട്ടി​ല്ലെ​ങ്കി​ലും വേദന​യും വീക്കവും കുറയ്‌ക്കാൻ സഹായി​ക്കുന്ന അനേകം മരുന്നു​കൾ ഉണ്ട്‌. ചില മരുന്നു​കൾക്ക്‌ രോഗ​ത്തി​ന്റെ പുരോ​ഗ​തി​യെ മന്ദഗതി​യി​ലാ​ക്കാൻ കഴി​ഞ്ഞേ​ക്കു​മെ​ന്നും കരുത​പ്പെ​ടു​ന്നു. വേദനാ​സം​ഹാ​രി​കൾ, കോർട്ടി​ക്കോ​സ്റ്റീ​റോ​യിഡ്‌ ചികിത്സ, നോൺസ്റ്റീ​റോ​യിഡ്‌ ആന്റി ഇൻഫ്‌ള​മേ​റ്ററി ഔഷധങ്ങൾ, രോഗ പരിവർത്തന ആന്റിറൂ​മാ​റ്റിക്‌ ഔഷധങ്ങൾ, പ്രതി​രോ​ധ​രോ​ധ​കങ്ങൾ, സ്വയം​നാശ പ്രതി​രോ​ധ​ശ​ക്തി​യെ നിയ​ന്ത്രി​ക്കുന്ന മരുന്നു​കൾ, പ്രതി​രോ​ധത്തെ ബാധി​ക്കുന്ന ജനിതക വ്യതി​യാ​നം വരുത്തിയ ഔഷധങ്ങൾ എന്നിങ്ങനെ ആർ​ത്രൈ​റ്റി​സിന്‌ എതിരെ പ്രയോ​ഗി​ക്കാ​വുന്ന അനേക​തരം അസ്‌ത്രങ്ങൾ ആധുനിക വൈദ്യ​ശാ​സ്‌ത്ര​ത്തി​ന്റെ ആവനാ​ഴി​യിൽ ഉണ്ട്‌. എന്നിരു​ന്നാ​ലും, ആശ്വാസം ലഭിക്കു​ന്ന​തിന്‌ ചില​പ്പോൾ വലിയ വില ഒടു​ക്കേ​ണ്ട​താ​യി വരുന്നു. എന്തെന്നാൽ ഇത്തരം മരുന്നു​ക​ളെ​ല്ലാം ഗുരു​ത​ര​മായ പാർശ്വ​ഫ​ലങ്ങൾ ഉളവാ​ക്കി​യേ​ക്കാ​വു​ന്ന​വ​യാണ്‌. അതു​കൊണ്ട്‌ ഇത്തരം ചികി​ത്സാ​വി​ധി​ക​ളു​ടെ ഗുണവും ദോഷ​വും തൂക്കി​നോ​ക്കി തീരു​മാ​നം എടുക്കുക എന്നത്‌ രോഗി​കൾക്കും ഡോക്ടർമാർക്കും വലിയ വെല്ലു​വി​ളി ഉയർത്തു​ന്നു.

ആർ​ത്രൈ​റ്റിസ്‌ എന്ന ഈ വേദനാ​ജ​ന​ക​മായ രോഗ​വു​മാ​യി പൊരു​ത്ത​പ്പെ​ടാൻ ചിലർക്കു കഴിഞ്ഞി​രി​ക്കു​ന്നത്‌ എങ്ങനെ​യാണ്‌? (g01 12/08)

[അടിക്കു​റി​പ്പു​കൾ]

[6-ാം പേജിലെ ആകർഷക വാക്യം]

അമിതതൂക്കം, പുകവലി, രക്തപ്പകർച്ച എന്നിവ റൂമ​റ്റോ​യ്‌ഡ്‌ ആർ​ത്രൈ​റ്റിസ്‌ വരാനുള്ള സാധ്യത വർധി​പ്പി​ച്ചേ​ക്കാം

[8-ാം പേജിലെ ചതുരം/ചിത്രം]

പകര ചികി​ത്സ​കൾ

ഇപ്പോൾ പ്രചാ​ര​ത്തി​ലു​ള്ള​വ​യെ​ക്കാൾ സുരക്ഷി​ത​വും പാർശ്വ​ഫ​ലങ്ങൾ കുറഞ്ഞ​തു​മായ ചില ചികി​ത്സകൾ ഉള്ളതായി കരുത​പ്പെ​ടു​ന്നു. ടൈപ്‌ II കൊളാ​ജൻ കഴിക്കു​ന്നത്‌ റൂമ​റ്റോ​യ്‌ഡ്‌ ആർ​ത്രൈ​റ്റിസ്‌ രോഗി​ക​ളു​ടെ സന്ധിക​ളി​ലെ വീക്കവും വേദന​യും കുറയ്‌ക്കു​ന്ന​തിൽ സഹായ​ക​മാ​ണെന്ന്‌ ചില ഗവേഷകർ അവകാ​ശ​പ്പെ​ടു​ന്നു. ഇതെങ്ങ​നെ​യാ​ണു സാധ്യ​മാ​കു​ന്നത്‌? വീക്കത്തി​നി​ട​യാ​ക്കുന്ന വിനാശക സൈ​റ്റോ​ക്കൈ​നു​ക​ളായ ഇന്റർലൂ​ക്കിൻ-1-നെയും ട്യൂമർ ഊതകക്ഷയ ഘടകം α-യെയും നിയ​ന്ത്രി​ക്കുക വഴി. ഇതേ നശീകരണ ഘടകങ്ങളെ നിയ​ന്ത്രി​ക്കു​ന്ന​തിൽ ചില പ്രകൃ​തി​ജന്യ പോഷ​ക​ങ്ങ​ളും പ്രയോ​ജ​ന​പ്ര​ദ​മെന്നു തെളി​ഞ്ഞി​ട്ടു​ള്ള​താ​യി പറയ​പ്പെ​ടു​ന്നു. ജീവകം ഇ, ജീവകം സി, നിയാ​സി​ന​മൈഡ്‌, ഐകോ​സാ​പെ​ന്റെ​നോ​യ്‌ക്ക്‌ അമ്ലവും ഗാമാ​ലൈ​നോ​ളെ​നിക്‌ അമ്ലവും ധാരാ​ള​മുള്ള മത്സ്യ എണ്ണകൾ, ബോറിജ്‌ വിത്തിന്റെ എണ്ണ, ഈവനിങ്‌ പ്രിം​റോ​സി​ന്റെ എണ്ണ എന്നിവ​യെ​ല്ലാം ഇതിൽ പെടുന്നു. ചൈന​യിൽ ട്രൈ​പ്‌ടെ​റി​ജി​യം വിൽഫോർഡൈ ഹുക്ക്‌ എഫ്‌ എന്ന ഒരു പച്ചമരുന്ന്‌ വർഷങ്ങ​ളാ​യി ഉപയോ​ഗി​ച്ചു വരുന്നു. റൂമ​റ്റോ​യ്‌ഡ്‌ ആർ​ത്രൈ​റ്റി​സി​ന്റെ കെടു​തി​കൾ കുറയ്‌ക്കു​ന്ന​തിൽ ഇത്‌ ഒരളവു​വരെ വിജയം വരിച്ചി​ട്ടു​ണ്ടെന്നു പറയ​പ്പെ​ടു​ന്നു.

 [4, 5 പേജു​ക​ളി​ലെ രേഖാ​ചി​ത്രം]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

ആരോഗ്യമുള്ള സന്ധി

സന്ധി സഞ്ചി

പേശി

തരുണാസ്ഥി

സ്‌നായു

സന്ധി കവചം

സ്രാവ സ്‌തരം

സ്രാവ ദ്രാവകം

അസ്ഥി

റൂമറ്റോയ്‌ഡ്‌ ആർ​ത്രൈ​റ്റി​സുള്ള സന്ധി

ഇടം നഷ്ടപ്പെ​ടു​ന്നു

അസ്ഥിയുടെയും തരുണാ​സ്ഥി​യു​ടെ​യും നാശം

വീങ്ങിയ സ്രാവ സ്‌തരം

ഓസ്റ്റിയോ ആർ​ത്രൈ​റ്റി​സുള്ള സന്ധി

അടർന്ന തരുണാ​സ്ഥി​യു​ടെ ചെറിയ കണങ്ങൾ

തരുണാസ്ഥിയുടെ നാശം

അസ്ഥിയിലെ വളർച്ച

[കടപ്പാട്‌]

ഉറവിടം: Arthritis Foundation

[7-ാം പേജിലെ ചിത്രങ്ങൾ]

ആർത്രൈറ്റിസ്‌ ഏതു പ്രായ​ത്തി​ലു​ള്ള​വ​രെ​യും ബാധി​ക്കാം

[8-ാം പേജിലെ ചിത്രങ്ങൾ]

വ്യായാമത്തിനും ശരിയായ ഭക്ഷണ​ക്ര​മ​ത്തി​നും കുറെ​യൊ​ക്കെ ആശ്വാസം കൈവ​രു​ത്താ​നാ​കും