സങ്കീർത്തനം 63:1-11
യഹൂദാവിജനഭൂമിയിൽവെച്ച്‌ ദാവീദ്‌ രചിച്ച ശ്രുതിമധുരമായ ഗാനം.+
63 ദൈവമേ, അങ്ങാണ്‌ എന്റെ ദൈവം. ഞാൻ അങ്ങയെ തേടി നടക്കുന്നു.+
ഞാൻ അങ്ങയ്‌ക്കായി ദാഹിക്കുന്നു.+
വെള്ളമില്ലാത്ത, വരണ്ടുണങ്ങിയ ദേശത്ത്‌അങ്ങയ്‌ക്കുവേണ്ടി കാത്തുകാത്തിരുന്ന്‌ എന്റെ ബോധം നശിക്കാറായിരിക്കുന്നു.+
2 അതുകൊണ്ട്‌, അങ്ങയെ കാണാൻ ഞാൻ വിശുദ്ധസ്ഥലത്തേക്കു നോക്കി;അങ്ങയുടെ ശക്തിയും മഹത്ത്വവും ഞാൻ കണ്ടു.+
3 അങ്ങയുടെ അചഞ്ചലമായ സ്‌നേഹം ജീവനെക്കാൾ ഏറെ നല്ലത്‌;+അതുകൊണ്ട്‌, എന്റെ അധരങ്ങൾ അങ്ങയെ മഹത്ത്വപ്പെടുത്തും.+
4 അങ്ങനെ, എന്റെ ജീവിതകാലം മുഴുവൻ ഞാൻ അങ്ങയെ സ്‌തുതിക്കും,അങ്ങയുടെ നാമത്തിൽ എന്റെ കൈകൾ ഉയർത്തും.
5 അത്യുത്തമവും അതിവിശിഷ്ടവും ആയ ഓഹരി ലഭിച്ചതിൽ* ഞാൻ തൃപ്‌തനാണ്‌;സന്തോഷമുള്ള അധരങ്ങളാൽ എന്റെ വായ്‌ അങ്ങയെ സ്‌തുതിക്കും.+
6 കിടക്കയിൽ ഞാൻ അങ്ങയെ ഓർക്കുന്നു;രാത്രിയാമങ്ങളിൽ ഞാൻ അങ്ങയെക്കുറിച്ച്‌ ധ്യാനിക്കുന്നു.+
7 അങ്ങാണല്ലോ എന്റെ സഹായി;+അങ്ങയുടെ ചിറകിൻതണലിൽ ഞാൻ സന്തോഷിച്ചാർക്കുന്നു.+
8 അങ്ങയോടു ഞാൻ ഒട്ടിച്ചേർന്നിരിക്കുന്നു;അങ്ങയുടെ വലങ്കൈ എന്നെ മുറുകെ പിടിച്ചിരിക്കുന്നു.+
9 എന്നാൽ, എന്റെ ജീവനെടുക്കാൻ നോക്കുന്നവർഭൂമിയുടെ ആഴങ്ങളിലേക്ക്‌ ഇറങ്ങും.
10 അവരെ വാളിന്റെ ശക്തിക്ക്‌ ഏൽപ്പിച്ചുകൊടുക്കും;അവർ കുറുനരികൾക്കിരയാകും.*
11 എന്നാൽ രാജാവ്‌ ദൈവത്തിൽ ആനന്ദിക്കും.
നുണ പറയുന്നവരുടെ വായ്‌ അടഞ്ഞുപോകുന്നതിനാൽദൈവനാമത്തിൽ സത്യം ചെയ്യുന്നവരെല്ലാം ആഹ്ലാദിക്കും.*
അടിക്കുറിപ്പുകള്‍
^ അക്ഷ. “കൊഴുപ്പും പുഷ്ടിയും കൊണ്ടെന്നപോലെ.”
^ അഥവാ “കുറുക്കന്മാർക്കിരയാകും.”
^ അഥവാ “അഭിമാനത്തോടെ സംസാരിക്കും.”