നഥനയേൽ യേശു​വി​ന്റെ ആദ്യശി​ഷ്യ​ന്മാ​രിൽ ഒരാളാ​യിട്ട്‌ ഇതു മൂന്നാം ദിവസ​മാണ്‌. യേശു​വും ആ ശിഷ്യ​ന്മാ​രിൽ ചിലരും വടക്ക്‌ അവരുടെ ജന്മനാ​ടായ ഗലീല​പ്ര​ദേ​ശ​ത്തേക്കു പോകു​ന്നു. അവരുടെ ലക്ഷ്യം നഥന​യേ​ലി​ന്റെ ജന്മസ്ഥല​മായ കാനാ പട്ടണമാണ്‌. യേശു ജനിച്ചു​വ​ളർന്ന നസറെ​ത്തി​നു വടക്കുള്ള മലകളി​ലാണ്‌ കാനാ സ്ഥിതി ചെയ്യു​ന്നത്‌. കാനാ​യി​ലെ ഒരു കല്യാ​ണ​സ​ദ്യയ്‌ക്ക്‌ അവരെ ക്ഷണിച്ചി​ട്ടുണ്ട്‌.

യേശു​വി​ന്റെ അമ്മയും കല്യാ​ണ​ത്തിന്‌ എത്തിയി​ട്ടുണ്ട്‌. കല്യാണം കഴിക്കു​ന്ന​വ​രു​ടെ കുടും​ബ​സു​ഹൃ​ത്തെന്ന നിലയിൽ മറിയ വിരു​ന്നു​കാ​രെ സ്വീക​രി​ക്കു​ക​യും സത്‌ക​രി​ക്കു​ക​യും ചെയ്യു​ന്ന​തിൽ മുൻപ​ന്തി​യി​ലുണ്ട്‌. അതു​കൊ​ണ്ടു​തന്നെ വീഞ്ഞു തീർന്ന​പ്പോൾ മറിയ അതു പെട്ടെന്നു ശ്രദ്ധി​ക്കു​ന്നു, “അവർക്കു വീഞ്ഞില്ല” എന്ന കാര്യം യേശു​വി​നോ​ടു പറയു​ക​യും ചെയ്യുന്നു.​—യോഹ​ന്നാൻ 2:3.

വീഞ്ഞിന്റെ കുറവ്‌ നികത്താൻ യേശു എന്തെങ്കി​ലും ചെയ്യണ​മെന്നു സൂചി​പ്പി​ക്കു​ക​യാ​ണു മറിയ. അപ്പോൾ യേശു പറയുന്നു: “സ്‌ത്രീ​യേ, നമുക്ക്‌ ഇതിൽ എന്തു കാര്യം?” (യോഹ​ന്നാൻ 2:4) മറിയ പറഞ്ഞതി​നോ​ടുള്ള തന്റെ വിയോ​ജിപ്പ്‌ യേശു ഒരു ഭാഷാ​പ്ര​യോ​ഗ​ത്തി​ലൂ​ടെ സൂചി​പ്പി​ക്കു​ക​യാണ്‌ ഇവിടെ. ദൈവ​ത്തി​ന്റെ നിയമി​ത​രാ​ജാ​വെന്ന നിലയിൽ യേശു​വി​ന്റെ പ്രവർത്ത​ന​ങ്ങ​ളെ​യെ​ല്ലാം നയി​ക്കേ​ണ്ടതു സ്വർഗീ​യ​പി​താ​വാണ്‌, അല്ലാതെ വീട്ടു​കാ​രോ സ്‌നേ​ഹി​ത​രോ അല്ല. അപ്പോൾ മറിയ ജോലി​ക്കാ​രോട്‌: “അവൻ എന്തു പറഞ്ഞാ​ലും അതു​പോ​ലെ ചെയ്യുക” എന്നു പറയുന്നു. അങ്ങനെ മറിയ ജ്ഞാന​ത്തോ​ടെ കാര്യം യേശു​വി​നു വിടുന്നു.​—യോഹ​ന്നാൻ 2:5.

വെള്ളം കോരി​വെ​ക്കുന്ന ആറു കൽഭരണി അവി​ടെ​യുണ്ട്‌. ഓരോ​ന്നി​ലും 40-ലേറെ ലിറ്റർ വെള്ളം കൊള്ളും. യേശു സേവക​ന്മാ​രോട്‌ ഇങ്ങനെ നിർദേ​ശി​ക്കു​ന്നു: “ഭരണി​ക​ളിൽ വെള്ളം നിറയ്‌ക്കുക.” എന്നിട്ട്‌ യേശു പറയുന്നു: “ഇതിൽനിന്ന്‌ കുറച്ച്‌ എടുത്ത്‌ വിരു​ന്നു​ന​ട​ത്തി​പ്പു​കാ​രനു കൊണ്ടു​പോ​യി കൊടു​ക്കൂ.”​—യോഹ​ന്നാൻ 2:7, 8.

നല്ല ഗുണനി​ല​വാ​ര​മുള്ള വീഞ്ഞു കണ്ടപ്പോൾ വിരു​ന്നു​ന​ട​ത്തി​പ്പു​കാ​രനു സന്തോ​ഷ​മാ​യി. എന്നാൽ ഇത്‌ അത്ഭുത​ക​ര​മാ​യി ഉണ്ടാക്കി​യ​താ​ണെന്ന്‌ അദ്ദേഹ​ത്തിന്‌ അറിയില്ല. മണവാ​ളനെ വിളിച്ച്‌ അദ്ദേഹം പറയുന്നു: “എല്ലാവ​രും ആദ്യം മേത്തരം വീഞ്ഞും, ആളുകൾ ലഹരി​പി​ടി​ച്ചു​ക​ഴി​യു​മ്പോൾ നിലവാ​രം കുറഞ്ഞ​തും ആണ്‌ വിളമ്പാറ്‌. പക്ഷേ നീ മേത്തരം വീഞ്ഞ്‌ ഇതുവരെ എടുക്കാ​തെ വെച്ചല്ലോ!”​—യോഹ​ന്നാൻ 2:10.

യേശു​വി​ന്റെ ആദ്യത്തെ അത്ഭുത​മാണ്‌ ഇത്‌. പുതിയ ശിഷ്യ​ന്മാർ ഇതു കാണു​മ്പോൾ യേശു​വി​ലുള്ള അവരുടെ വിശ്വാ​സം ശക്തമാ​കു​ന്നു. പിന്നീട്‌ യേശു​വും അമ്മയും അർധസ​ഹോ​ദ​ര​ന്മാ​രും കൂടി ഗലീലക്കടലിന്‌ വടക്കു​പ​ടി​ഞ്ഞാ​റേ തീരത്തുള്ള കഫർന്ന​ഹൂം നഗരത്തി​ലേക്കു പോകു​ന്നു.