പല ശാസ്‌ത്ര​ജ്ഞ​രും പറയു​ന്നത്‌: ഡിഎൻഎ-യും അതിലെ കോഡു​ഭാ​ഷ​യി​ലുള്ള നിർദേ​ശ​ങ്ങ​ളും കോടാ​നു​കോ​ടി വർഷങ്ങ​ളി​ലൂ​ടെ നടന്ന ആകസ്‌മിക സംഭവ​ങ്ങ​ളു​ടെ ഫലമായി ഉരുത്തി​രി​ഞ്ഞ​താ​ണെന്ന്‌ അനേകം ജീവശാ​സ്‌ത്ര​ജ്ഞ​രും മറ്റു ശാസ്‌ത്ര​ജ്ഞ​രും കരുതു​ന്നു. ഈ തന്മാ​ത്ര​യു​ടെ ഘടനയി​ലോ അതു വഹിക്കു​ന്ന​തും കൈമാ​റു​ന്ന​തു​മായ വിവര​ങ്ങ​ളി​ലോ അതിന്റെ പ്രവർത്ത​ന​വി​ധ​ത്തി​ലോ രൂപര​ച​ന​യു​ടെ യാതൊ​രു തെളി​വു​മി​ല്ലെ​ന്നാണ്‌ അവരുടെ പക്ഷം.¹⁷

ബൈബിൾ പറയു​ന്നത്‌: ദൈവ​ത്തിൽനി​ന്നുള്ള ഒരു ആലങ്കാ​രിക പുസ്‌ത​ക​ത്തിൽ നമ്മുടെ ശരീര​ത്തി​ലെ അവയവ​ങ്ങ​ളു​ടെ രൂപീ​ക​ര​ണ​ത്തെ​ക്കു​റി​ച്ചും അവ രൂപീ​കൃ​ത​മാ​കുന്ന സമയ​ത്തെ​ക്കു​റി​ച്ചു​പോ​ലും രേഖ​പ്പെ​ടു​ത്തി​യി​ട്ടു​ള്ള​താ​യി ബൈബിൾ വ്യക്തമാ​ക്കു​ന്നു. നിശ്വ​സ്‌ത​ത​യിൽ ദാവീദു രാജാവ്‌ അതേക്കു​റിച്ച്‌ ഇങ്ങനെ പറയു​ക​യു​ണ്ടാ​യി: “ഞാൻ പിണ്ഡാ​കാ​ര​മാ​യി​രു​ന്ന​പ്പോൾ നിന്റെ [ദൈവ​ത്തി​ന്റെ] കണ്ണു എന്നെ കണ്ടു; നിയമി​ക്ക​പ്പെട്ട നാളു​ക​ളിൽ ഒന്നും ഇല്ലാതി​രു​ന്ന​പ്പോൾ അവയെ​ല്ലാം നിന്റെ പുസ്‌ത​ക​ത്തിൽ എഴുതി​യി​രു​ന്നു.”​—സങ്കീർത്തനം 139:16.

തെളിവുകൾ വെളി​പ്പെ​ടു​ത്തു​ന്നത്‌: പരിണാ​മം ശരിയാ​ണെ​ങ്കിൽ, ആകസ്‌മിക സംഭവ​ങ്ങ​ളു​ടെ ഒരു പരമ്പര​യി​ലൂ​ടെ ഡിഎൻഎ-യ്‌ക്ക്‌ ഉളവാ​കാ​നാ​കും എന്നതിന്‌ കുറ​ച്ചെ​ങ്കി​ലും തെളി​വു​കൾ ഉണ്ടായി​രി​ക്കണം. ഇനി, ബൈബിൾ പറയു​ന്ന​താണ്‌ സത്യ​മെ​ങ്കിൽ ഡിഎൻഎ-യുടെ സൃഷ്ടി​ക്കു​പി​ന്നിൽ ചിട്ട​യോ​ടെ കാര്യ​ങ്ങൾചെ​യ്യുന്ന ഒരു ബുദ്ധി​കേ​ന്ദ്രം പ്രവർത്തി​ച്ചി​ട്ടുണ്ട്‌ എന്നുള്ള​തിന്‌ ശക്തമായ തെളി​വു​കൾ ഉണ്ടായി​രി​ക്കണം.

ഏറ്റവും ലളിത​മായ ഭാഷയിൽ വിവരി​ക്കു​ക​യാ​ണെ​ങ്കിൽ ഡിഎൻഎ-യെക്കു​റിച്ച്‌ ഒരു പരിധി​വ​രെ​യൊ​ക്കെ നമുക്കു മനസ്സി​ലാ​ക്കാ​നാ​കും; മാത്രമല്ല, വളരെ കൗതു​ക​മു​ണർത്തുന്ന ഒരു വിഷയ​വു​മാ​ണത്‌. അതു​കൊണ്ട്‌ നമുക്കി​പ്പോൾ കോശ​ത്തി​ലൂ​ടെ മറ്റൊരു പര്യടനം നടത്തി​യാ​ലോ? ഇത്തവണ ഒരു മനുഷ്യ​കോ​ശ​ത്തി​ലൂ​ടെ​ത്തന്നെ ആകട്ടെ. അത്തര​മൊ​രു കോശം പ്രവർത്തി​ക്കു​ന്ന​വി​ധം വിശദീ​ക​രി​ച്ചു​ത​രുന്ന ഒരു മ്യൂസി​യ​ത്തി​ലേക്കു പോകു​ന്ന​താ​യി ഭാവന​യിൽ കാണുക. ഒരു മനുഷ്യ​കോ​ശ​ത്തി​ന്റെ മാതൃ​ക​യി​ലു​ള്ള​തും അതിന്റെ ഏതാണ്ട്‌ 1,30,00,000 മടങ്ങ്‌ വലുപ്പ​ത്തി​ലു​ള്ള​തു​മാണ്‌ ഈ മ്യൂസി​യം​—70,000-ത്തോളം പേർക്ക്‌ ഇരിക്കാ​വുന്ന ഒരു വലിയ സ്‌പോർട്‌സ്‌ സ്റ്റേഡി​യ​ത്തി​ന്റെ അത്രയും വലുപ്പം.

 നിങ്ങളി​പ്പോൾ മ്യൂസി​യ​ത്തി​ന​ക​ത്തേക്കു പ്രവേ​ശി​ക്കു​ക​യാണ്‌. അവി​ടെ​യുള്ള വസ്‌തു​ക്ക​ളു​ടെ വിചി​ത്ര​മായ രൂപവും ഘടനയും മറ്റും നിങ്ങളെ അമ്പരപ്പി​ക്കു​ന്നു. കോശ​ത്തി​ന്റെ നടുവി​ലാ​യി കാണുന്ന മർമത്തി​ന്റെ വ്യാസം, 20 നില കെട്ടി​ട​ത്തി​ന്റെ ഉയര​ത്തോ​ളം വരും. അങ്ങോ​ട്ടാണ്‌ നിങ്ങളി​പ്പോൾ പോകു​ന്നത്‌.

കോശ​മർമ​ത്തി​നു പുറ​മേ​യുള്ള ഇരട്ടസ്‌ത​ര​ത്തി​ലൂ​ടെ അകത്തേക്കു പ്രവേ​ശി​ക്കുന്ന നിങ്ങൾ ചുറ്റു​മൊ​ന്നു കണ്ണോ​ടി​ക്കു​ന്നു. ഈ അറയിൽ പ്രധാ​ന​മാ​യും 46 ക്രോ​മ​സോ​മു​ക​ളാണ്‌ ഉള്ളത്‌; ഒരേ​പോ​ലെ​യുള്ള രണ്ടെണ്ണം വീതം ജോടി​യാ​യി ക്രമീ​ക​രി​ച്ചി​രി​ക്കു​ന്നു. അവയുടെ ഉയരത്തിൽ വ്യത്യാ​സ​മുണ്ട്‌. നിങ്ങളു​ടെ തൊട്ട​ടു​ത്തുള്ള ജോടിക്ക്‌ ഏതാണ്ട്‌ 12 നില കെട്ടി​ട​ത്തി​ന്റെ അത്രയും ഉയരം​വ​രും (1). ഓരോ ക്രോ​മ​സോ​മി​ന്റെ​യും ഏതാണ്ട്‌ നടുഭാ​ഗ​ത്താ​യി സങ്കോ​ചി​ച്ചി​രി​ക്കുന്ന ഒരു ഭാഗം കാണാം. ക്രോ​മ​സോ​മി​ന്റെ വണ്ണമാ​കട്ടെ, ഒരു കൂറ്റൻ വൃക്ഷത്തി​ന്റെ തായ്‌ത്ത​ടി​യു​ടെ അത്രയും വരും. നമ്മുടെ മാതൃകാ ക്രോ​മ​സോ​മി​നെ ഒന്നു നിരീ​ക്ഷി​ക്കൂ. അതിനെ ചുറ്റി ഒരു നാടയുണ്ട്‌. കൂടുതൽ അടു​ത്തേക്ക്‌ ചെല്ലു​മ്പോൾ ഈ നാടയിൽ ലംബമായ രേഖകൾ കാണാ​വു​ന്ന​താണ്‌. അവയ്‌ക്കി​ട​യിൽ തിരശ്ചീ​ന​മായ ചെറി​യ​ചെ​റിയ വരകളു​മുണ്ട്‌ (2). പുസ്‌ത​കങ്ങൾ അട്ടിയാ​യി അടുക്കി​വെ​ച്ചി​രി​ക്കു​ന്ന​താ​ണോ അത്‌? അല്ല. ഒട്ടും ഇടംവി​ടാ​തെ ഞെരുക്കി അടുക്കി​യി​രി​ക്കുന്ന വലയങ്ങ​ളു​ടെ പുറ​മേ​യുള്ള ഭാഗമാണ്‌ നിങ്ങൾ കാണു​ന്നത്‌. ഒരു വലയത്തിൽ പിടിച്ചു വലിച്ചാൽ അത്‌ അയഞ്ഞു​വ​രും. അത്‌ ചെറിയ ചുരു​ളു​ക​ളാൽ നിർമി​ത​മാണ്‌ (3). അവയും ഭംഗി​യാ​യി അടുക്കി​യി​രി​ക്കു​ന്നു. ആ ചുരുൾ അയച്ചെ​ടു​ക്കു​മ്പോ​ഴാണ്‌ ഏറ്റവും സവി​ശേ​ഷ​ത​യാർന്ന ഭാഗം കാണാ​നാ​കു​ന്നത്‌. അതു വളരെ നീളമുള്ള ഒരു കയറു​പോ​ലെ​യി​രി​ക്കും. എന്താണത്‌?

മാതൃകാ ക്രോ​മ​സോ​മി​ലുള്ള ഇതിനെ തത്‌കാ​ലം നമുക്ക്‌ കയർ എന്നുതന്നെ വിളി​ക്കാം. അതിന്‌ ഏതാണ്ട്‌ ഒരിഞ്ച്‌ വണ്ണമുണ്ട്‌. അത്‌ തയ്യൽ മെഷീ​നി​ലെ ബൊബിൻ പോലു​ള്ള​വ​യിൽ മുറുകെ ചുറ്റി​യി​രി​ക്കു​ന്നു (4). അവ ചേർന്നാണ്‌ മേൽപ്പറഞ്ഞ ചുരു​ളു​കൾ രൂപം​കൊ​ണ്ടി​രി​ക്കു​ന്നത്‌. അതിവി​ദ​ഗ്‌ധ​മായ രീതി​യി​ലാണ്‌ കയർ ചുറ്റി​വെ​ച്ചി​രി​ക്കു​ന്ന​തെന്ന്‌ ഡിസ്‌പ്ലേ ബോർഡ്‌ കാണി​ക്കു​ന്നുണ്ട്‌. മാതൃകാ ക്രോ​മ​സോ​മു​ക​ളിൽ ഓരോ​ന്നിൽനി​ന്നും ഈ കയറുകൾ വലി​ച്ചെ​ടുത്ത്‌ നീളത്തിൽ നിവർത്തി ചേർത്തു​വെ​ക്കു​ക​യാ​ണെ​ങ്കിൽ ഭൂമി​യു​ടെ ചുറ്റള​വി​ന്റെ ഏതാണ്ട്‌ പകുതി​യോ​ളം എത്താൻമാ​ത്രം നീളം ഉണ്ടായി​രി​ക്കും അതിന്‌! a

കോശ​മർമ​ത്തി​നു​ള്ളിൽ ഇവയെ ഇത്ര കാര്യ​ക്ഷ​മ​മാ​യി ക്രമീ​ക​രി​ച്ചി​രി​ക്കു​ന്ന​തി​നെ “അന്യാ​ദൃ​ശ​മായ എഞ്ചിനീ​യ​റിങ്‌ വിസ്‌മയം” എന്നാണ്‌ ഒരു ശാസ്‌ത്ര​പു​സ്‌തകം വിശേ​ഷി​പ്പി​ക്കു​ന്നത്‌.¹⁸ അപ്പോൾ അതിന്റെ പിന്നിൽ ഒരു എഞ്ചിനീ​യർ ഇല്ലെന്നു പറയു​ന്നത്‌ വിശ്വാ​സ്യ​മാ​യി നിങ്ങൾക്കു തോന്നു​ന്നു​ണ്ടോ? ഈ മ്യൂസി​യ​ത്തിൽ, ലക്ഷക്കണ​ക്കിന്‌ സാധനങ്ങൾ വിൽപ്പ​ന​യ്‌ക്ക്‌ നിരത്തി​വെ​ച്ചി​രി​ക്കുന്ന ഒരു വലിയ കടയു​ണ്ടെന്ന്‌ ഇരിക്കട്ടെ. ആവശ്യ​മുള്ള എന്തും എളുപ്പം കണ്ടുപി​ടി​ക്കാ​നാ​കും​വി​ധം വളരെ ചിട്ട​യോ​ടെ​യാണ്‌ അവിടെ സാധനങ്ങൾ അടുക്കി​വെ​ച്ചി​രി​ക്കു​ന്ന​തെ​ന്നും കരുതുക. ഇത്ര ചിട്ട​യോ​ടെ അവ ക്രമീ​ക​രി​ച്ച​തി​നു പിന്നിൽ ആരും പ്രവർത്തി​ച്ചി​ട്ടി​ല്ലെന്ന്‌ നിങ്ങൾ നിഗമ​നം​ചെ​യ്യു​മോ? തീർച്ച​യാ​യും ഇല്ല. എന്നാൽ ഇതു​പോ​ലും കോശ​മർമ​ത്തി​നു​ള്ളി​ലെ ക്രമീ​ക​ര​ണ​ത്തോ​ടുള്ള താരത​മ്യ​ത്തിൽ വളരെ നിസ്സാ​ര​മാണ്‌.

ഈ കയർ കൈയി​ലെ​ടുത്ത്‌ പരി​ശോ​ധി​ക്കാ​നുള്ള ക്ഷണമാണ്‌ ഇപ്പോൾ ഡിസ്‌പ്ലേ ബോർഡിൽ  കാണു​ന്നത്‌ (5). അത്‌ കൈയി​ലെ​ടു​ത്തു നോക്കു​മ്പോൾ നിങ്ങൾക്കു മനസ്സി​ലാ​കു​ന്നു അതൊരു സാധാരണ കയർ അല്ലെന്ന്‌. രണ്ട്‌ ഇഴകൾകൊ​ണ്ടാണ്‌ അതു നിർമി​ച്ചി​രി​ക്കു​ന്നത്‌. തുല്യ അകലത്തിൽ ക്രമീ​ക​രി​ച്ചി​ട്ടുള്ള ചെറിയ പടിക​ളാൽ ഈ ഇഴകൾ ബന്ധിത​മാ​യി​രി​ക്കു​ന്നു. സർപ്പി​ളാ​കൃ​തി​യി​ലുള്ള ഒരു ഗോവ​ണി​പോ​ലെ​യാണ്‌ ഈ കയർ കാണ​പ്പെ​ടു​ന്നത്‌ (6). പെട്ടെ​ന്നാണ്‌ നിങ്ങൾ അതു തിരി​ച്ച​റി​യു​ന്നത്‌: നിങ്ങളു​ടെ കൈയി​ലി​രി​ക്കു​ന്നത്‌ ഒരു മാതൃകാ ഡിഎൻഎ തന്മാ​ത്ര​യാണ്‌​—ജീവന്റെ നിഗൂ​ഢ​തകൾ ഒളിഞ്ഞി​രി​ക്കുന്ന ഒരു തന്മാത്ര!

വലയങ്ങ​ളും ചുരു​ളു​ക​ളു​മൊ​ക്കെ​യാ​യി ക്രമീ​ക​രി​ച്ചി​രി​ക്കുന്ന ഒരൊറ്റ ഡിഎൻഎ തന്മാ​ത്ര​യാണ്‌ ഒരു ക്രോ​മ​സോ​മിൽ ഉള്ളത്‌. ഡിഎൻഎ ഗോവ​ണി​യു​ടെ പടികൾ ബേസ്‌ ജോടി​ക​ളാണ്‌ (7). അവയുടെ ധർമം എന്താണ്‌? എന്തിനു​വേ​ണ്ടി​യാണ്‌ ഇവയെ​ല്ലാം? അവിടെ സ്ഥാപി​ച്ചി​രി​ക്കുന്ന ഒരു ഡിസ്‌പ്ലേ ബോർഡിൽ വളരെ ലളിത​മായ ഒരു വിശദീ​ക​രണം ഉണ്ട്‌.

ഡിഎൻഎ-യെക്കു​റിച്ച്‌ മനസ്സി​ലാ​ക്കു​ന്ന​തിന്‌ ആദ്യം​തന്നെ അതിന്റെ രണ്ട്‌ ഇഴക​ളെ​യും തമ്മിൽ ബന്ധിപ്പി​ക്കുന്ന പടിക​ളെ​ക്കു​റി​ച്ചു മനസ്സി​ലാ​ക്ക​ണ​മെന്ന്‌ ഡിസ്‌പ്ലേ ബോർഡ്‌ പറയുന്നു. ഡിഎൻഎ ഗോവണി നെടുകെ രണ്ടായി പിളരു​ന്നത്‌ ഒന്നു വിഭാവന ചെയ്യൂ. ഓരോ ഇഴയിൽനി​ന്നും പാതി മുറിഞ്ഞ പടികൾ തള്ളിനിൽക്കു​ന്നു. അവ നാലു​ത​ര​മുണ്ട്‌. A, T, G, C എന്നിങ്ങ​നെ​യാണ്‌ ശാസ്‌ത്രജ്ഞർ അവയെ വിളി​ക്കു​ന്നത്‌. ആ അക്ഷരങ്ങ​ളു​ടെ വിന്യാ​സ​ക്രമം, വിവരങ്ങൾ കൈമാ​റു​ന്ന​തി​നുള്ള ഒരുതരം കോഡു ഭാഷയാ​ണെന്നു കണ്ടെത്തി​യത്‌ ശാസ്‌ത്ര​ജ്ഞരെ വിസ്‌മ​യ​ഭ​രി​ത​രാ​ക്കി​യി​ട്ടുണ്ട്‌.

ടെലി​ഗ്രാഫ്‌ വഴിയുള്ള ആശയവി​നി​മ​യ​ത്തി​നു വഴിതു​റന്ന, 19-ാം നൂറ്റാ​ണ്ടിൽ കണ്ടുപി​ടി​ക്ക​പ്പെട്ട മോഴ്‌സ്‌ കോഡി​നെ​ക്കു​റിച്ച്‌ നിങ്ങൾ കേട്ടി​രി​ക്കും.  രണ്ട്‌ ‘അക്ഷരങ്ങൾ’ മാത്രമേ അതിലു​ള്ളൂ—ഒരു കുത്തും ഒരു വരയും; എങ്കിലും അതുപ​യോ​ഗിച്ച്‌ അസംഖ്യം വാക്കു​ക​ളും വാചക​ങ്ങ​ളും എഴുതാ​നാ​കും. എന്നാൽ ഡിഎൻഎ-യ്‌ക്ക്‌ നാല്‌ അക്ഷരങ്ങ​ളുള്ള ഒരു കോഡു​ഭാ​ഷ​യാ​ണു​ള്ളത്‌. A, T, G, C എന്നീ അക്ഷരങ്ങ​ളു​ടെ വിന്യാ​സ​ക്ര​മ​മ​നു​സ​രി​ച്ചാണ്‌ ‘വാക്കുകൾ’ അഥവാ കോ​ഡോ​ണു​കൾ രൂപം കൊള്ളു​ന്നത്‌. കോ​ഡോ​ണു​കൾ ചേർന്ന്‌ ജീനുകൾ അഥവാ ‘ഖണ്ഡികകൾ’ ആകുന്നു. ഓരോ ജീനി​ലും ശരാശരി 27,000 അക്ഷരങ്ങ​ളുണ്ട്‌. ഈ ജീനു​ക​ളും ജീനു​കൾക്കി​ട​യിൽ കാണുന്ന നീണ്ട ഭാഗങ്ങ​ളും കൂടെ ചേർന്നാണ്‌ ‘അധ്യായം’ ആകുന്നത്‌. ഈ അധ്യാ​യ​മാണ്‌ ക്രോ​മ​സോം. ഇത്തരം 23 ക്രോ​മ​സോ​മു​കൾ ചേർന്ന്‌ ഒരു ‘പുസ്‌തകം’ ഉണ്ടാകു​ന്നു. ഈ പുസ്‌ത​കത്തെ ജീനോം എന്നാണു വിളി​ക്കു​ന്നത്‌. ഒരു ജീവി​യു​ടെ ജനിത​ക​വി​വ​ര​ങ്ങ​ളു​ടെ ആകെത്തു​ക​യാണ്‌ ജീനോം. b

ജീനോം ഒരു ഭീമൻ പുസ്‌ത​ക​മാ​ണെന്നു പറയാം. അതിന്‌ എത്രമാ​ത്രം വിവരങ്ങൾ ഉൾക്കൊ​ള്ളാ​നാ​കും? ഡിഎൻഎ-യിലെ ഏതാണ്ട്‌ 300 കോടി ബേസ്‌ ജോടി​ക​ളി​ലുള്ള വിവര​ങ്ങ​ളാണ്‌ മനുഷ്യ ജീനോ​മി​ലു​ള്ളത്‌.¹⁹ അതേക്കു​റിച്ച്‌ കൂടുതൽ മനസ്സി​ലാ​ക്കാൻ കുറെ വാല്യ​ങ്ങ​ളുള്ള ഒരു വിജ്ഞാ​ന​കോ​ശം ഭാവന​യിൽ കാണുക. ഓരോ വാല്യ​ത്തി​ലും ആയിര​ത്തി​ലേറെ പേജു​ക​ളുണ്ട്‌. അത്തരം 428 വാല്യ​ങ്ങ​ളിൽ നിറയാൻമാ​ത്രം വിവര​ങ്ങ​ളാണ്‌ ഒരു ജീനോ​മി​ലു​ള്ളത്‌. മറ്റേ പകർപ്പി​ലെ വിവര​ങ്ങ​ളും​കൂ​ടെ ചേർക്കാൻ 428 വാല്യ​ങ്ങൾകൂ​ടി വേണം; അതായത്‌, ഒരൊറ്റ കോശ​ത്തി​ലെ വിവരങ്ങൾ രേഖ​പ്പെ​ടു​ത്തു​ന്ന​തിന്‌ മൊത്തം 856 വാല്യങ്ങൾ! ആ വിവര​ങ്ങ​ളെ​ല്ലാം നിങ്ങൾ ടൈപ്പ്‌ ചെയ്യു​ക​യാ​ണെ​ങ്കി​ലോ? അതു പൂർത്തി​യാ​ക്കാൻ, നിറു​ത്താ​തെ ഏതാണ്ട്‌ 80 വർഷം ടൈപ്പ്‌ ചെയ്യേണ്ടി വരും!

ഇത്ര ശ്രമം​ചെ​യ്‌ത്‌ ആ വിവര​ങ്ങ​ളെ​ല്ലാം ടൈപ്പ്‌ ചെയ്‌താൽത്തന്നെ നിങ്ങളു​ടെ ശരീര​ത്തിന്‌ അതു പ്രയോ​ജ​ന​പ്പെ​ടു​ത്താ​നാ​വില്ല. ശരീര​ത്തി​ലെ 100 ലക്ഷം​കോ​ടി അതിസൂക്ഷ്‌മ കോശ​ങ്ങ​ളിൽ ഓരോ​ന്നി​ലും, നൂറു​ക​ണ​ക്കിന്‌ ഭീമൻ വാല്യങ്ങൾ എങ്ങനെ ഉൾക്കൊ​ള്ളി​ക്കാ​നാണ്‌? ഇത്രയ​ധി​കം വിവരങ്ങൾ ഒരു കോശ​ത്തിൽ ഉൾക്കൊ​ള്ളി​ക്കു​ക​യെ​ന്നത്‌ നമ്മുടെ കഴിവിന്‌ അതീത​മാണ്‌.

തന്മാത്രാ ജീവശാ​സ്‌ത്രം, കമ്പ്യൂട്ടർ സയൻസ്‌ എന്നീ വിഷയ​ങ്ങ​ളി​ലെ ഒരു പ്രൊ​ഫസർ ഇപ്രകാ​രം പറഞ്ഞു: “ഒരു ഗ്രാം ഡിഎൻഎ നിർജ​ലീ​ക​രി​ച്ചെ​ടു​ത്താൽ അതിന്റെ വ്യാപ്‌തം ഏകദേശം ഒരു ഘനസെ​ന്റി​മീ​റ്റർ വരും; അത്രയും ഡിഎൻഎ-യിൽ, ഏതാണ്ട്‌ ഒരു ലക്ഷം​കോ​ടി സിഡി-കളിൽ [കോം​പാ​ക്‌ട്‌ ഡിസ്‌ക്‌] കൊള്ളു​ന്നത്ര വിവരങ്ങൾ ശേഖരി​ക്കാ​നാ​കും.”²⁰ അത്‌ എന്താണ്‌ സൂചി​പ്പി​ക്കു​ന്നത്‌? വിവര​ങ്ങ​ളാൽ അങ്ങേയറ്റം സാന്ദ്ര​മാണ്‌ ഡിഎൻഎ. അനന്യ​മായ ഒരു മനുഷ്യ​ശ​രീ​ര​ത്തി​ന്റെ നിർമി​തിക്ക്‌ ആവശ്യ​മായ നിർദേ​ശ​ങ്ങ​ള​ട​ങ്ങിയ ജീനുകൾ ആണ്‌ ഡിഎൻഎ-യിൽ ഉള്ളത്‌. ഓരോ കോശ​ത്തി​ലും പ്രസ്‌തുത നിർദേ​ശങ്ങൾ മുഴു​വ​നാ​യും അടങ്ങി​യി​രി​ക്കു​ന്നു. ഇന്നത്തെ ലോക​ജ​ന​സം​ഖ്യ​യു​ടെ ഏതാണ്ട്‌ 350 മടങ്ങ്‌ മനുഷ്യ​രെ ഉണ്ടാക്കാൻ ആവശ്യ​മാ​യത്ര നിർദേ​ശങ്ങൾ ഉൾക്കൊ​ള്ളാൻ പര്യാ​പ്‌ത​മാണ്‌ വെറും ഒരു ടീസ്‌പൂൺ ഡിഎൻഎ! അതിനർഥം ഒരു ടീസ്‌പൂ​ണിൽ നേർത്ത പാളി​യാ​യി പറ്റിപ്പി​ടി​ച്ചി​രി​ക്കു​ന്നത്ര ഡിഎൻഎ-പോലും വേണ്ടാ ഇന്നു ഭൂമി​യിൽ ജീവി​ച്ചി​രി​ക്കുന്ന 700 കോടി ആളുകളെ ഉണ്ടാക്കാൻ.²¹

വളരെ​യേറെ വിവര​സം​ഭ​ര​ണ​ശേ​ഷി​യുള്ള, നന്നേ ചെറിയ ഉപകര​ണങ്ങൾ വികസി​പ്പി​ച്ചെ​ടു​ക്കാൻ മനുഷ്യ​നു കഴിഞ്ഞി​ട്ടു​ണ്ടെ​ങ്കി​ലും അവയ്‌ക്കൊ​ന്നും ഡിഎൻഎ-യുടെ അടു​ത്തെ​ങ്ങും എത്താൻ സാധി​ച്ചി​ട്ടില്ല. എന്നിരു​ന്നാ​ലും ഒരു താരത​മ്യ​ത്തി​നാ​യി നമുക്ക്‌ ഒരു കോം​പാ​ക്‌ട്‌ ഡിസ്‌കി​ന്റെ കാര്യം പരിചി​ന്തി​ക്കാം: അതിന്റെ ആകൃതി​യും തിളങ്ങുന്ന പ്രതല​വും വിദഗ്‌ധ​മായ രൂപകൽപ്പ​ന​യും എല്ലാം നമ്മെ അതിശ​യി​പ്പി​ച്ചേ​ക്കാം. അതു കാണു​മ്പോൾത്തന്നെ നമുക്ക​റി​യാം ബുദ്ധി​വൈ​ഭ​വ​മുള്ള ആരോ അതിനു​പി​ന്നിൽ പ്രവർത്തി​ച്ചി​ട്ടു​ണ്ടെന്ന്‌. ഇനി, അതിൽ വളരെ പ്രയോ​ജ​ന​ക​ര​മായ വിവരങ്ങൾ, അതായത്‌ അതിസ​ങ്കീർണ​മായ ഒരു യന്ത്രം നിർമി​ക്കാ​നും പ്രവർത്തി​പ്പി​ക്കാ​നും കേടു​പോ​ക്കാ​നു​മൊ​ക്കെ​യുള്ള വിശദ​മായ നിർദേ​ശങ്ങൾ, ചിട്ട​യോ​ടെ ഉൾക്കൊ​ള്ളി​ക്കു​ക​യും ചെയ്‌തി​ട്ടു​ണ്ടെ​ങ്കി​ലോ?  ഇത്ര​യേറെ വിവരങ്ങൾ ശേഖരി​ച്ചു​വെ​ച്ചി​ട്ടും ഡിസ്‌കി​ന്റെ ഭാരത്തി​നോ വലുപ്പ​ത്തി​നോ വ്യത്യാ​സം വരുന്നു​മില്ല. വാസ്‌ത​വ​ത്തിൽ, അതാണ്‌ ഡിസ്‌കി​ന്റെ ഏറ്റവും വലിയ സവി​ശേഷത. അതിലെ എഴുത​പ്പെട്ട ആ നിർദേ​ശങ്ങൾ കാണു​മ്പോൾ അതിനു​പി​ന്നിൽ ഒരു ബുദ്ധി​കേ​ന്ദ്രം പ്രവർത്തി​ച്ചി​ട്ടു​ണ്ടെന്നു നിങ്ങൾ ന്യായ​മാ​യും ചിന്തി​ക്കി​ല്ലേ? ഒരു എഴുത്തു​കാ​രൻ ഇല്ലാതെ എങ്ങനെ​യാണ്‌ എന്തെങ്കി​ലും എഴുത​പ്പെ​ടു​ന്നത്‌?

ഡിഎൻഎ-യെ ഒരു കോം​പാ​ക്‌ട്‌ ഡിസ്‌കി​നോ​ടോ ഒരു പുസ്‌ത​ക​ത്തോ​ടോ ഉപമി​ച്ചാൽ ഒരിക്ക​ലും അതൊരു അതിശ​യോ​ക്തി​യാ​വില്ല. ജീനോ​മി​നെ​ക്കു​റി​ച്ചുള്ള ഒരു പുസ്‌തകം പറയു​ന്നതു ശ്രദ്ധി​ക്കുക: “ജീനോം ഒരു പുസ്‌തകം ആണെന്നു പറയു​ന്നത്‌ ഒരു അലങ്കാ​ര​പ്ര​യോ​ഗം​പോ​ലു​മല്ല; കാരണം, അത്‌ ശരിക്കും ഒരു പുസ്‌ത​ക​മാണ്‌.” എന്നാൽ അത്‌ കോഡ്‌ ഭാഷയി​ലു​ള്ള​താ​ണെ​ന്നു​മാ​ത്രം. ഗ്രന്ഥകാ​രൻ ഇങ്ങനെ കൂട്ടി​ച്ചേർക്കു​ന്നു: “ജീനോ​മി​നെ ‘ബുദ്ധി​വൈ​ഭ​വ​മുള്ള’ പുസ്‌തകം എന്നു വിളി​ക്കാം; കാരണം അനുകൂല സാഹച​ര്യ​ത്തിൽ അതിന്‌ സ്വന്തം പകർപ്പെ​ടു​ക്കാ​നും അതി​ലെ​തന്നെ വിവരങ്ങൾ വായി​ച്ചെ​ടു​ക്കാ​നും കഴിയും.”²² ഡിഎൻഎ-യുടെ മറ്റൊരു സവി​ശേ​ഷ​ത​യി​ലേ​ക്കാണ്‌ അതു വിരൽചൂ​ണ്ടു​ന്നത്‌.

മ്യൂസി​യ​ത്തി​ന്റെ ആ നിശ്ശബ്ദ​ത​യിൽ അങ്ങനെ നിൽക്കു​മ്പോൾ, കോശ​ത്തി​ലെ മർമവും ഇതു​പോ​ലെ നിശ്ചല​മാ​യി​രി​ക്കു​മോ എന്ന്‌ നിങ്ങൾ ചിന്തി​ക്കു​ന്നു. അപ്പോ​ഴാണ്‌ മറ്റൊരു സംഗതി ശ്രദ്ധി​ക്കു​ന്നത്‌. ഡിഎൻഎ-യുടെ ഒരു ഭാഗത്തി​ന്റെ മാതൃക സൂക്ഷി​ച്ചി​ട്ടുള്ള കണ്ണാടി​ക്കൂ​ടി​നു മുകളിൽ ഇങ്ങനെ എഴുതി​വെ​ച്ചി​രി​ക്കു​ന്നു: “പ്രവർത്തനം കാണാൻ ബട്ടൺ അമർത്തുക.” ബട്ടൺ അമർത്തു​മ്പോൾ നറേറ്റർ ഇങ്ങനെ പറയു​ന്നതു കേൾക്കാം: “ഡിഎൻഎ-യ്‌ക്ക്‌ അതി​പ്ര​ധാ​ന​മായ രണ്ടുധർമ​ങ്ങ​ളെ​ങ്കി​ലും ഉണ്ട്‌. ആദ്യ​ത്തേത്‌ പുനരാ​വർത്തനം (replication) ആണ്‌. പുതു​താ​യി ഉണ്ടാകുന്ന ഓരോ കോശ​ത്തി​ലും മാതൃ​കോ​ശ​ത്തി​ലെ ജനിത​ക​വി​വ​ര​ങ്ങ​ളു​ടെ ഒരു സമ്പൂർണ പകർപ്പ്‌ ഉണ്ടായി​രി​ക്കു​ന്ന​തിന്‌ ഡിഎൻഎ-യുടെ പകർപ്പ്‌ ഉണ്ടാ​ക്കേ​ണ്ട​തുണ്ട്‌. അത്‌ എങ്ങനെ നടക്കു​ന്നു​വെന്ന്‌ ദയവായി നിരീ​ക്ഷി​ക്കൂ.”

അതിസ​ങ്കീർണ​മാ​യ ഒരു യന്ത്രം കടന്നു​വ​രു​ന്നത്‌ ഇപ്പോൾ കാണാ​വു​ന്ന​താണ്‌. പരസ്‌പരം ബന്ധിച്ചി​ട്ടുള്ള ഒരു കൂട്ടം റോ​ബോ​ട്ടു​ക​ളാണ്‌ ആ യന്ത്രം. അത്‌ ഡിഎൻഎ-യുടെ അടു​ത്തേക്ക്‌ ചെന്ന്‌ അതുമാ​യി ഘടിപ്പി​ക്ക​പ്പെ​ടു​ന്നു. എന്നിട്ട്‌, റെയിൽപ്പാ​ള​ത്തി​ലൂ​ടെ ഒരു ട്രെയിൻ പോകു​ന്ന​തു​പോ​ലെ അത്‌ ഡിഎൻഎ-യിലൂടെ നീങ്ങുന്നു. എന്താണ്‌ ചെയ്യു​ന്ന​തെന്ന്‌ കൃത്യ​മാ​യി മനസ്സി​ലാ​ക്കാ​നാ​കാ​ത്ത​വി​ധം അൽപ്പം വേഗത്തി​ലാണ്‌ അതു സഞ്ചരി​ക്കു​ന്നത്‌. എന്നാൽ ഒരു കാര്യം നിങ്ങൾക്കു വ്യക്തമാ​യി കാണാ​നാ​കു​ന്നു, ഒരു ഡിഎൻഎ-യുടെ സ്ഥാനത്ത്‌ ഇപ്പോൾ രണ്ടു ഡിഎൻഎ-കളുണ്ട്‌.

 നറേറ്റർ തുടരു​ന്നു: “ഡിഎൻഎ-യുടെ പുനരാ​വർത്തനം എങ്ങനെ നടക്കുന്നു എന്നതിന്റെ അത്യന്തം ലളിത​മായ ഒരു പ്രവർത്ത​ന​മാ​തൃ​ക​യാണ്‌ നിങ്ങളി​പ്പോൾ കണ്ടത്‌. എൻ​സൈ​മു​കൾ എന്നു വിളി​ക്ക​പ്പെ​ടുന്ന ഒരുകൂ​ട്ടം തന്മാ​ത്രീയ യന്ത്രങ്ങൾ ഡിഎൻഎ-യിലൂടെ സഞ്ചരി​ക്കു​ക​യും ആദ്യം അതിനെ രണ്ടായി പിരി​ക്കു​ക​യും അതിനു​ശേഷം ഓരോ ഇഴയു​ടെ​യും ബേസ്‌ അനു​ക്ര​മ​ത്തി​ന​നു​സ​രിച്ച്‌ പൂരക​മാ​യി പുതി​യൊ​രു ഇഴ ഉണ്ടാക്കു​ക​യും ചെയ്യുന്നു. ഈ പ്രവർത്ത​ന​ത്തി​ന്റെ എല്ലാ ഘട്ടങ്ങളും കാണി​ക്കുക സാധ്യമല്ല. ഉദാഹ​ര​ണ​ത്തിന്‌, പുനരാ​വർത്തന യന്ത്രത്തി​ന്റെ മുമ്പി​ലാ​യി നീങ്ങുന്ന ഒരു സൂക്ഷ്‌മ യന്ത്രം, ഡിഎൻഎ-യുടെ ചുരുൾ അഴി​യേ​ണ്ട​തിന്‌ അതിന്റെ ഒരിഴയെ മുറി​ച്ചു​വി​ടു​ന്നത്‌ കാണി​ക്കാ​നാ​കില്ല. തെറ്റുകൾ കണ്ടുപി​ടിച്ച്‌ തിരു​ത്താ​നും അങ്ങനെ അസാമാ​ന്യ​മാം​വി​ധം കൃത്യത ഉറപ്പു​വ​രു​ത്താ​നു​മാ​യി ഡിഎൻഎ-യെ പല തവണ ‘പ്രൂഫ്‌ വായന’യ്‌ക്ക്‌ വിധേ​യ​മാ​ക്കുന്ന പ്രക്രി​യ​യും കാണി​ക്കുക സാധ്യമല്ല.”​— 16, 17 പേജു​ക​ളി​ലെ ചിത്രം കാണുക.

നറേറ്റർ തുടരു​ന്നു: “ഈ പ്രക്രി​യ​യിൽ വ്യക്തമാ​യി കാണി​ക്കാ​നാ​കു​ന്നത്‌ യന്ത്രത്തി​ന്റെ വേഗമാണ്‌. മാതൃകാ ഡിഎൻഎ-യിലൂടെ സഞ്ചരിച്ച യന്ത്രം ശീഘ്ര​ഗ​തി​യിൽ നീങ്ങു​ന്നത്‌ നിങ്ങൾ ശ്രദ്ധി​ച്ചി​രി​ക്കും. എന്നാൽ യഥാർഥ ഡിഎൻഎ ‘ട്രാക്കി’ലൂടെ നീങ്ങുന്ന എൻ​സൈം​യ​ന്ത്രം സെക്കൻഡിൽ ഏതാണ്ട്‌ 100 പടികൾ അഥവാ ബേസ്‌ ജോടി​കൾ വീതമാണ്‌ പിന്നി​ടു​ന്നത്‌.²³ ഈ ‘ട്രാക്കി’നെ ശരിക്കുള്ള ഒരു റെയിൽപ്പാ​ള​ത്തോട്‌ താരത​മ്യം​ചെ​യ്യു​ക​യാ​ണെ​ങ്കിൽ മണിക്കൂ​റിൽ 80-ലേറെ കിലോ​മീ​റ്റർ വേഗത്തി​ലാ​യി​രി​ക്കും ഈ ‘എഞ്ചിൻ’ നീങ്ങു​ന്നത്‌. ബാക്‌ടീ​രി​യ​കോ​ശ​ത്തി​ലാ​കട്ടെ, ഇതിന്റെ പത്ത്‌ ഇരട്ടി വേഗത്തി​ലാണ്‌ പുനരാ​വർത്തന യന്ത്രത്തി​ന്റെ സഞ്ചാരം! മനുഷ്യ​കോ​ശ​ത്തിൽ, ഇത്തരം നൂറു​ക​ണ​ക്കി​നു യന്ത്രങ്ങ​ളാണ്‌ ഒരേസ​മയം ഡിഎൻഎ ‘ട്രാക്കി’ന്റെ പല ഭാഗങ്ങ​ളിൽ പോയി പണി​യെ​ടു​ക്കു​ന്നത്‌. വെറും എട്ടുമ​ണി​ക്കൂ​റു​കൊണ്ട്‌ ജീനോ​മി​ന്റെ മൊത്തം പകർപ്പ്‌ ഉണ്ടാക്കി​യെ​ടു​ക്കു​ന്നു.”²⁴ (20-ാം പേജിലെ “ വായി​ക്കാ​നും പകർപ്പെ​ടു​ക്കാ​നും കഴിയുന്ന ഒരു തന്മാത്ര” എന്ന ചതുരം കാണുക.)

ഡിഎൻഎ-പുനരാ​വർത്തന യന്ത്രം മെല്ലെ രംഗം വിടുന്നു. പകരം, മറ്റൊരു എൻ​സൈം​യ​ന്ത്രം പ്രത്യ​ക്ഷ​പ്പെ​ടു​ന്നു. അതും ഡിഎൻഎ-യിലൂടെ നീങ്ങു​ന്നു​ണ്ടെ​ങ്കി​ലും ആദ്യ​ത്തേ​തി​ന്റെ അത്ര വേഗത്തി​ലല്ല. ഈ യന്ത്രത്തി​ന്റെ ഒരു ഭാഗത്തു​കൂ​ടി ഡിഎൻഎ കയറി​പ്പോ​കു​ക​യും മറ്റൊരു ഭാഗത്തു​കൂ​ടി ഇറങ്ങി​വ​രു​ക​യും ചെയ്യു​ന്ന​താ​യി നിങ്ങൾക്കു കാണാം. ആ ഡിഎൻഎ-യ്‌ക്ക്‌ പക്ഷേ, മാറ്റ​മൊ​ന്നും സംഭവി​ച്ചി​ട്ടില്ല. എന്നാൽ പുതിയ ഒരു ഇഴ, യന്ത്രത്തി​ന്റെ മറ്റൊരു ഭാഗത്തു​കൂ​ടി, ഒരു വാൽ മുളച്ചു​വ​രു​ന്ന​തു​പോ​ലെ, പുറ​ത്തേക്കു വരുന്നു. എന്താണു സംഭവി​ക്കു​ന്നത്‌?

വീണ്ടും നറേറ്റർ വിശദീ​ക​രി​ക്കു​ന്നു: “ഡിഎൻഎ-യുടെ രണ്ടാമത്തെ ധർമം പകർപ്പെ​ഴുത്ത്‌ (transcription) ആണ്‌. കോശ​മർമ​ത്തി​ന്റെ സുരക്ഷി​ത​ത്വ​ത്തിൽനിന്ന്‌ ഡിഎൻഎ ഒരിക്ക​ലും പുറ​ത്തേക്കു വരുന്നില്ല. അപ്പോൾ എങ്ങനെ​യാണ്‌ അതിലെ ജീനു​ക​ളി​ലുള്ള നിർദേ​ശങ്ങൾ വായിച്ച്‌ ആ വിവരങ്ങൾ പ്രയോ​ജ​ന​പ്പെ​ടു​ത്താ​നാ​കു​ന്നത്‌? ആ നിർദേ​ശ​ങ്ങൾക്ക്‌ അനുസൃ​ത​മാ​യാ​ണ​ല്ലോ നിങ്ങളു​ടെ ശരീര​ത്തി​ന്റെ നിർമാ​ണ​ഘ​ട​ക​ങ്ങ​ളായ പ്രോ​ട്ടീ​നു​കൾ നിർമി​ക്ക​പ്പെ​ടു​ന്നത്‌. എൻ​സൈം​യ​ന്ത്രം ഡിഎൻഎ-യിലൂടെ സഞ്ചരി​ക്കവെ, ഏതു ഭാഗത്തുള്ള ജീനി​നെ​യാണ്‌ കോശ​മർമ​ത്തി​നു വെളി​യിൽനി​ന്നു വരുന്ന രാസസി​ഗ്ന​ലു​കൾ ഉദ്ദീപി​പ്പി​ച്ചി​രി​ക്കു​ന്ന​തെന്ന്‌ കണ്ടെത്തു​ന്നു. തുടർന്ന്‌ ഈ യന്ത്രം, ആർഎൻഎ (റൈ​ബോ​ന്യൂ​ക്ലിക്‌ ആസിഡ്‌) തന്മാത്ര ഉപയോ​ഗിച്ച്‌ ആ ജീനിലെ നിർദേ​ശങ്ങൾ പകർത്തി​യെ​ടു​ക്കു​ന്നു. ആർഎൻഎ, കാഴ്‌ച​യ്‌ക്ക്‌ ഏതാണ്ട്‌ ഡിഎൻഎ-യുടെ ഒരു ഇഴപോ​ലെ​യാ​ണെ​ങ്കി​ലും അതിൽനി​ന്നു വ്യത്യ​സ്‌ത​മാണ്‌. ജീനു​ക​ളി​ലെ നിർദേ​ശങ്ങൾ വഹിച്ചു​കൊ​ണ്ടു​പോ​കു​ക​യാണ്‌ അതിന്റെ ധർമം. എൻ​സൈം​യ​ന്ത്ര​ത്തിൽ ആയിരി​ക്കെ​യാണ്‌ ആവശ്യ​മായ വിവരങ്ങൾ ആർഎൻഎ-യ്‌ക്ക്‌ ലഭിക്കു​ന്നത്‌. തുടർന്ന്‌ അത്‌ കോശ​മർമ​ത്തി​നു പുറത്ത്‌ ഒരു റൈ​ബോ​സോ​മി​ന്റെ  അടു​ത്തേക്കു നീങ്ങു​ക​യും റൈ​ബോ​സോം ആ വിവരങ്ങൾ ഉപയോ​ഗിച്ച്‌ പ്രോ​ട്ടീൻ ഉണ്ടാക്കു​ക​യും ചെയ്യുന്നു.”

ഈ പ്രദർശനം നിങ്ങളെ വിസ്‌മ​യ​ഭ​രി​ത​രാ​ക്കി​യി​രി​ക്കും. ഈ മ്യൂസി​യ​വും അതിലെ യന്ത്രങ്ങൾ രൂപകൽപ്പ​ന​ചെ​യ്‌ത്‌ നിർമി​ച്ച​വ​രു​ടെ ബുദ്ധി​വൈ​ഭ​വ​വും നിങ്ങളിൽ അത്യന്തം മതിപ്പു​ള​വാ​ക്കി​യി​ട്ടുണ്ട്‌ എന്നതിനു സംശയ​മില്ല. എന്നാൽ മനുഷ്യ​കോ​ശ​ത്തിൽ ഒരേ സമയത്ത്‌ നടക്കുന്ന ആയിര​ക്ക​ണ​ക്കി​നു പ്രവർത്ത​ന​ങ്ങ​ളു​ടെ ഒരു പ്രദർശനം നിങ്ങളു​ടെ മുമ്പിൽ കാഴ്‌ച​വെ​ച്ചു​കൊണ്ട്‌ ഈ മ്യൂസി​യ​വും അതിലെ യന്ത്രങ്ങ​ളു​മെ​ല്ലാം പ്രവർത്ത​ന​ക്ഷ​മ​മാ​കു​ന്നെ​ങ്കി​ലോ? ആരെയും അന്ധാളി​പ്പി​ക്കാൻ പോന്ന ഒരു കാഴ്‌ച​യാ​യി​രി​ക്കും അത്‌.

എന്നാൽ ഓർക്കുക, സങ്കീർണ​വും അതിസൂ​ക്ഷ്‌മ​വു​മായ ഈ യന്ത്രങ്ങ​ളു​ടെ പ്രവർത്ത​ന​ങ്ങ​ളെ​ല്ലാം നിങ്ങളു​ടെ ശരീര​ത്തി​ലെ 100 ലക്ഷം​കോ​ടി കോശ​ങ്ങ​ളിൽ ഇപ്പോൾ നടന്നു​കൊ​ണ്ടി​രി​ക്കു​ക​യാണ്‌! നിങ്ങളു​ടെ ഡിഎൻഎ വായി​ക്ക​പ്പെ​ടു​ന്നു; അതിലെ നിർദേ​ശ​ങ്ങൾക്ക​നു​സ​രിച്ച്‌ ശരീര​ത്തി​ലെ ലക്ഷക്കണ​ക്കിന്‌ വ്യത്യസ്‌ത പ്രോ​ട്ടീ​നു​കൾ നിർമി​ക്ക​പ്പെ​ടു​ന്നു. കൂടാതെ, ഡിഎൻഎ-യുടെ പകർപ്പ്‌ ഉണ്ടാക്കി അതിൽ എന്തെങ്കി​ലും പിശകു​കൾ ഉണ്ടോ എന്നറി​യാൻ പ്രൂഫ്‌ വായി​ക്ക​പ്പെ​ടു​ന്നു; അങ്ങനെ, പുതു​താ​യി ഉണ്ടാകുന്ന കോശ​ത്തിൽ നിർദേ​ശ​ങ്ങ​ളു​ടെ ഒരു പുത്തൻ പകർപ്പ്‌ ഉണ്ടായി​രി​ക്കും.

വീണ്ടും ചോദി​ക്കുക, ‘ഈ നിർദേ​ശ​ങ്ങ​ളെ​ല്ലാം എവി​ടെ​നി​ന്നു വന്നു?’ ഒരു അമാനുഷ  എഴുത്തു​കാ​രന്റെ സൃഷ്ടി​യാണ്‌ ഈ ‘പുസ്‌തക’വും അതിൽ രേഖ​പ്പെ​ടു​ത്തി​യി​രി​ക്കുന്ന വിവര​ങ്ങ​ളും എന്ന്‌ ബൈബിൾ പറയുന്നു. ആ നിഗമനം കാലഹ​ര​ണ​പ്പെ​ട്ട​തോ അശാസ്‌ത്രീ​യ​മോ ആണോ?

ഇതേക്കു​റി​ച്ചു ചിന്തി​ക്കുക: ഇപ്പോൾ വിവരിച്ച തരത്തി​ലുള്ള ഒരു മ്യൂസി​യ​മെ​ങ്കി​ലും ഉണ്ടാക്കാൻ മനുഷ്യ​നു സാധി​ക്കു​മോ? അതിനു തുനി​ഞ്ഞാൽ അവർ ആകെ വിഷമി​ച്ചു​പോ​കും. മനുഷ്യ ജീനോ​മി​നെ​യും അതിന്റെ പ്രവർത്ത​ന​ത്തെ​യും കുറിച്ച്‌ ഇതുവരെ കാര്യ​മാ​യി​ട്ടൊ​ന്നും മനസ്സി​ലാ​ക്കാൻ സാധി​ച്ചി​ട്ടില്ല. ജീനു​ക​ളു​ടെ സ്ഥാനം നിർണ​യി​ക്കാ​നും അവയുടെ ധർമം മനസ്സി​ലാ​ക്കാ​നും ശാസ്‌ത്ര​ജ്ഞർക്ക്‌ ഇപ്പോ​ഴും പൂർണ​മാ​യി കഴിഞ്ഞി​ട്ടില്ല. ഡിഎൻഎ തന്തുവി​ന്റെ കുറച്ചു ഭാഗത്തു മാത്രമേ ജീനുകൾ കാണ​പ്പെ​ടു​ന്നു​ള്ളൂ. ജീനുകൾ ഇല്ലാത്ത ബാക്കി ഭാഗങ്ങ​ളു​ടെ പ്രസക്തി എന്തായി​രി​ക്കും? ആ ഭാഗത്തെ ‘ജങ്ക്‌’ ഡിഎൻഎ എന്നാണ്‌ ശാസ്‌ത്രജ്ഞർ വിളി​ച്ചി​രു​ന്നത്‌; എന്നാൽ അടുത്ത​കാ​ലത്ത്‌ അവരുടെ വീക്ഷണ​ത്തിൽ അൽപ്പം ഭേദഗതി വന്നിട്ടുണ്ട്‌. ജീനുകൾ എങ്ങനെ, എത്ര​ത്തോ​ളം ഉപയോ​ഗി​ക്ക​പ്പെ​ടണം എന്നു നിർണ​യി​ക്കു​ന്ന​തിൽ ഈ ഭാഗങ്ങൾക്ക്‌ ഒരു പങ്കുണ്ടാ​യി​രി​ക്കാ​മെന്ന്‌ കരുതു​ന്നു. ഇനി, ശാസ്‌ത്ര​ജ്ഞർക്ക്‌ ഡിഎൻഎ-യുടെ​യും അതിന്റെ പകർപ്പു​ണ്ടാ​ക്കു​ക​യും പ്രൂഫ്‌ വായി​ക്കു​ക​യും ചെയ്യുന്ന യന്ത്രങ്ങ​ളു​ടെ​യും ഒരു പൂർണ മാതൃക ഉണ്ടാക്കാൻ കഴി​ഞ്ഞെ​ന്നു​ത​ന്നെ​യി​രി​ക്കട്ടെ, എന്നാൽപ്പോ​ലും ശരിക്കുള്ള ഒരു ഡിഎൻഎ പ്രവർത്തി​ക്കു​ന്ന​തു​പോ​ലെ അവയെ പ്രവർത്തി​പ്പി​ക്കാൻ അവർക്കു കഴിയു​മോ?

 പ്രശസ്‌ത ശാസ്‌ത്ര​ജ്ഞ​നായ റിച്ചാർഡ്‌ ഫെയ്‌ൻമാൻ തന്റെ മരണത്തി​നു തൊട്ടു​മുമ്പ്‌ പിൻവ​രുന്ന കുറിപ്പ്‌ ബ്ലാക്ക്‌ബോർഡിൽ എഴുതു​ക​യു​ണ്ടാ​യി: “എന്തെങ്കി​ലും എനിക്ക്‌ സൃഷ്ടി​ക്കാൻ കഴിയു​ന്നി​ല്ലെ​ങ്കിൽ അതിനർഥം എനിക്ക്‌ അതു മനസ്സി​ലാ​യി​ട്ടില്ല എന്നാണ്‌.”²⁵ തന്റെ പരിമി​തി​കൾ അംഗീ​ക​രി​ച്ചു​കൊ​ണ്ടുള്ള അദ്ദേഹ​ത്തി​ന്റെ ആ വെളി​പ്പെ​ടു​ത്തൽ മതിപ്പു​ള​വാ​ക്കു​ന്ന​താണ്‌. ഡിഎൻഎ-യുടെ കാര്യ​ത്തിൽ അദ്ദേഹ​ത്തി​ന്റെ പ്രസ്‌താ​വന തികച്ചും ശരിയാണ്‌. പുനരാ​വർത്തന-പകർപ്പെ​ഴുത്ത്‌ യന്ത്രസം​വി​ധാ​ന​ങ്ങ​ളോ​ടെ ഡിഎൻഎ-യെ സൃഷ്ടി​ക്കാൻ ശാസ്‌ത്ര​ജ്ഞർക്ക്‌ സാധി​ക്കില്ല; അവർക്ക്‌ അതു പൂർണ​മാ​യി മനസ്സി​ലാ​ക്കാൻപോ​ലും കഴിയില്ല എന്നതാണ്‌ വാസ്‌തവം. എന്നിട്ടും ഇതൊക്കെ ആകസ്‌മിക സംഭവ​പ​ര​മ്പ​ര​ക​ളി​ലൂ​ടെ ഉണ്ടായ​താ​ണെന്ന്‌ തങ്ങൾക്ക്‌ ഉറപ്പു​ണ്ടെ​ന്നാണ്‌ ചിലരു​ടെ അവകാ​ശ​വാ​ദം. എന്നാൽ നിങ്ങൾ ഇപ്പോൾ പരിചി​ന്തി​ച്ചു​ക​ഴിഞ്ഞ തെളി​വു​കൾ വാസ്‌ത​വ​ത്തിൽ ആ വാദത്തെ പിന്താ​ങ്ങു​ന്നു​ണ്ടോ?

തെളി​വു​ക​ളെ​ല്ലാം മറ്റൊരു ദിശയി​ലേക്കു വിരൽചൂ​ണ്ടു​ന്നു​വെ​ന്നാണ്‌ ചില അഭിജ്ഞ​രു​ടെ പക്ഷം. ഉദാഹ​ര​ണ​ത്തിന്‌, ഡിഎൻഎ-യുടെ പിരി​യൻഗോ​വണി ഘടന കണ്ടുപി​ടി​ക്കു​ന്ന​തിൽ ഒരു പങ്കുവ​ഹിച്ച ഫ്രാൻസിസ്‌ ക്രിക്ക്‌ എന്ന ശാസ്‌ത്രജ്ഞൻ പറയു​ന്നത്‌ ഈ തന്മാത്ര അങ്ങേയറ്റം ക്രമീ​കൃ​ത​മാ​ണെന്ന വസ്‌തുത കണക്കി​ലെ​ടു​ക്കു​മ്പോൾ ആകസ്‌മിക സംഭവ​ങ്ങ​ളി​ലൂ​ടെ അതുണ്ടാ​കാൻ ഇടയി​ല്ലെ​ന്നാണ്‌. ഭൂമി​യിൽ ജീവനു തുടക്ക​മി​ടു​ന്ന​തി​നാ​യി ബുദ്ധി​വൈ​ഭ​വ​മുള്ള ഭൗമേ​ത​ര​ജീ​വി​കൾ ഡിഎൻഎ ഇവി​ടേക്ക്‌ അയച്ചി​രി​ക്കാം എന്ന്‌ അദ്ദേഹം പറയുന്നു.²⁶

50 വർഷക്കാ​ലം നിരീ​ശ്വ​ര​വാ​ദത്തെ പിന്താ​ങ്ങി​യി​രുന്ന പ്രശസ്‌ത തത്ത്വചി​ന്ത​ക​നായ ആന്റണി ഫ്‌ളൂ അടുത്ത​കാ​ലത്ത്‌ തന്റെ ചിന്താ​ഗ​തി​യിൽ പാടേ മാറ്റം​വ​രു​ത്തി. ജീവന്റെ സൃഷ്ടി​ക്കു​പി​ന്നിൽ ഏതോ ഒരു ബുദ്ധി​കേ​ന്ദ്രം പ്രവർത്തി​ച്ചി​ട്ടു​ണ്ടാ​ക​ണ​മെന്ന്‌ 81-ാം വയസ്സിൽ അദ്ദേഹം അംഗീ​ക​രി​ച്ചു​തു​ടങ്ങി. എന്തായി​രു​ന്നു ആ മാറ്റത്തി​നു കാരണം? ഡിഎൻഎ-യെക്കു​റി​ച്ചുള്ള അദ്ദേഹ​ത്തി​ന്റെ പഠനം. അദ്ദേഹ​ത്തി​ന്റെ ഈ പുതിയ ചിന്താ​ഗതി മറ്റു ശാസ്‌ത്രജ്ഞർ പുച്ഛിച്ചു തള്ളി​യേ​ക്കു​മോ എന്നു ചോദി​ച്ച​പ്പോൾ അദ്ദേഹം ഇങ്ങനെ പറഞ്ഞതാ​യി റിപ്പോർട്ടു​ചെ​യ്യ​പ്പെ​ട്ടി​രി​ക്കു​ന്നു: “അതു വളരെ ഖേദക​ര​മാണ്‌. തെളി​വു​കൾ നമ്മെ നയിക്കു​ന്നത്‌ ഏതു ദിശയി​ലേ​ക്കാ​യാ​ലും, ആ വഴിയേ പോകുക എന്ന . . . തത്ത്വത്തിന്‌ ജീവി​ത​ത്തിൽ ഞാൻ എന്നും മൂല്യം​കൽപ്പി​ച്ചി​ട്ടുണ്ട്‌.”²⁷

നിങ്ങൾ എന്തു വിചാ​രി​ക്കു​ന്നു? തെളി​വു​കൾ ഏതു ദിശയി​ലേ​ക്കാണ്‌ വിരൽചൂ​ണ്ടു​ന്നത്‌? ഒരു ഫാക്‌ട​റി​യു​ടെ കേന്ദ്ര​ഭാ​ഗ​ത്തുള്ള മുറി​യിൽ നിങ്ങൾ ഒരു കമ്പ്യൂട്ടർ കാണു​ന്നു​വെ​ന്നി​രി​ക്കട്ടെ. ഫാക്‌ട​റി​യു​ടെ എല്ലാ പ്രവർത്ത​ന​ങ്ങ​ളെ​യും നിയ​ന്ത്രി​ക്കുന്ന സങ്കീർണ​മായ ഒരു മാസ്റ്റർ പ്രോ​ഗ്രാം ഈ കമ്പ്യൂ​ട്ട​റി​ലുണ്ട്‌. അതു മാത്ര​മോ? ആ പ്രോ​ഗ്രാം, ഫാക്‌ട​റി​യി​ലെ ഓരോ യന്ത്രവും നിർമി​ക്കാ​നും കേടു​പോ​ക്കാ​നും ആവശ്യ​മായ നിർദേ​ശങ്ങൾ നിരന്തരം അയയ്‌ക്കു​ക​യും കൂടാതെ സ്വന്തം പകർപ്പ്‌ ഉണ്ടാക്കി അവയുടെ പ്രൂഫ്‌ വായി​ക്കു​ക​യും ചെയ്യുന്നു! ഇതു കാണുന്ന നിങ്ങൾ ഏതു നിഗമ​ന​ത്തിൽ എത്തും? ആ കമ്പ്യൂ​ട്ട​റും അതിലെ പ്രോ​ഗ്രാ​മും തനിയെ ഉണ്ടായ​താ​ണെ​ന്നോ, അതോ ചിട്ട​യോ​ടെ കാര്യ​ങ്ങൾചെ​യ്യുന്ന ഒരു ബുദ്ധി​കേ​ന്ദ്രം അതിന്റെ പിന്നിൽ പ്രവർത്തി​ച്ചു​വെ​ന്നോ? തെളി​വു​കൾ നൽകുന്ന ഉത്തരം വളരെ വ്യക്തമാണ്‌.