La May 24, 2022, nekuezahalile kozi yemaswe hahulu mwa tolopo yenyinyani yebizwa Uvalde, mwa Texas, kwa U.S.A. Kakuya ka piho yene ihatisizwe mwa mutende obizwa The New York Times, “muuna yomuñwi naakunupile litobolo ni kubulaya bana ba sikolo ba 19 ni baluti bababeli . . . fa sikolo sesibizwa Robb Elementary School.”

 Ka bumai, likezo za bukebenga zecwalo liatile hahulu. Mutai wa makande wa USA Today neubihile kuli mwa United States feela, “nekubile ni lipiho ze 249 za kukunupa fa likolo mwa silimo sesifelile—mi hakusika ba ni palo yetuna cwalo kuzwa feela ka silimo sa 1970.”

 Ki kabakalañi likezo zecwalo haliezahala? Lukona kutiyela cwañi likezo zemaswe ze? Kana kunani sepo yakuli bukebenga bukafela? Bibele yalufa likalabo.

•   Bibele italusa nako yelupila ku yona kuli ki “mazazi a mafelelezo” ili fo batu babañata nebakaba “babasina lilato la sipepo” ni “bababuhali,” ili kutalusa kuli nebakaba ni situhu ni bukebenga. Batu bababonisa mikwa yeo nebaka totobela “mwa bumaswe bwabona.” (2 Timotea 3:1-5, 13) Kuli muzibe zeñata, mubale taba ya sikuwa yeli “Did the Bible Predict the Way People Think and Act Today?”

 Batu babañata baipuzanga kuli, ‘Ki kabakalañi Mulimu haasatibelangi likezo zemaswe zecwale ka kukunupa fa likolo kuli lisike zaezahala?’ Kuli mubone kalabo ya Bibele, mubale taba yeli “Ki Kabakalañi Lika ze Maswe ha li Ezahalanga Kwa Batu ba Bande?”

•   “Lika kaufela zeneñozwi kwamulaho neliñolezwi kululuta, kuli . . . ka kuomba-ombiwa ki Mañolo lukone kuba ni sepo.”—Maroma 15:4.

 Likuka za mwa Bibele zakona kumitusa kuitiisa mwa lifasi lelitezi mifilifili le. Kuli muzibe litaba zeñata, mubone magazini ya Muzuhe! yenani toho ya taba yeli “Kana Mifilifili i ka Fela Muta o Muñwi?”

 Kuli mubone liakalezo zebakona kuitusisa bashemi kuli batuse bana babona kusaziyezwa ki makande asabisa, mubale taba ya sikuwa yeli “Disturbing News Reports and Your Children.”

•   “Uka balamulela kwa buhateleli ni kwa mifilifili.”—Samu 72:14.

•   “Bakatula mikwale yabona kuieza malimi a likekele mi bakatula malumo abona kuaeza licekesi. Sicaba hasina kulwanisa sicaba sesiñwi ka mukwale, mi habasana kuituta ndwa.”—Mika 4:3.

 Mulimu ukaeza lika zebasa koni kueza batu. Mubuso wahae wa kwa lihalimu ukasinya lilwaniso kaufela ni kufelisa mifilifili kaufela. Kuli muitute zeñata ka za zeuka peta Mubuso wa Mulimu, mubale taba yeli “Mwa Mubuso wa Mulimu ‘Kozo Ikaekezeha.’”