Kweli ni kweli, lunyolelwanga hahulu kubuha maprogilamu asusueza ni mavidio aboniswanga fa JW Broadcasting. Kono mizwale ni likaizeli baluna babañata mwa Africa bona habakonangi kubuha maprogilamu a fa Intaneti. Libaka ki lifi?

 Libaka zeñata mwa Africa halina hande Intaneti. Mi mwa libaka moi liteñi, mizwale bapalelwa kuitusisa yona bakeñisa kuli inani bunya kamba itula hahulu. Ka mutala, zazi leliñwi, muokameli wa mupotoloho yomuñwi kwa Madagascar naalikile kuikungela Progilamu ya ka Kweli ya JW Broadcasting iliñwi kwa sibaka sa likompyuta, ili ko batu batokwa kulifa kuli baitusise Intaneti. Naalifisizwe pene yefita fa $16 (K350), ili masheleñi amañata hahulu habapanywa kwa masheleñi abakona kufumana batu babañwi mwa sunda iliñwi! a

 Kusina taba ni miinelo yetaata yecwalo, batu babañata-ñata mwa Africa cwale sebakona kuipuhela progilamu ya JW Broadcasting kusina kuitusisa Intaneti. Bakona cwañi kueza cwalo?

 Kuzwa feela ka 2017, batu babapila mwa linaha ze kwa mboela wa lihalaupa la Sahara mwa Africa sebakona kuipuhela progilamu ya JW Broadcasting fa TV fa chaneo ya fa setilaiti. Chaneo ye ibuhiswanga kwa batu mahala zazi ni zazi mwahalaa lizazi kaufela, mi ibuhiswanga sunda kaufela mwa lipuo ze 16.

 Lipaki za Jehova balifanga kampani yeñwi masheleñi kuli bakone kuba ni chaneo fa setilaiti, mi fateñi kubeiwanga litaba zebuhiswanga kwa batu. Setilaiti fokufumaneha chaneo yaluna ikonahalisa kuli batu babapila mwa linaha zebato eza 35 ze kwa mboela wa lihalaupa la Sahara mwa Africa bakone kuipuhela yona. Kweli ni kweli masheleñi afitelela $12,000 (K262,560) alifiwanga kwa kampani yelutusa kuba ni chaneo yeo. Fokuñwi, lutokwanga kulifa masheleñi amañwi hape kuli mikopano yemiñwi ikone kubuhiswa fa chaneo isili ya fa setilaiti ka nako yeisweli kuezahala. Tukiso yeo itusanga kuli mizwale ni likaizeli babañata bakone kuikola mikopano yemituna kamba litukiso zeñwi zeipitezi ka nako yebapotelwa ki muyemeli wa ofisi ya mutai.

 Batu babañata, kukopanyeleza cwalo ni batu babasi Lipaki za Jehova, babuhanga chaneo ya JW ya fa setilaiti fa TV mwa mandu abona. Nihakulicwalo, mizwale ni likaizeli baluna babañata habana masheleñi atokwahala kuli bakone kuitekela liitusiso zekonisa kuli babuhe chaneo ya JW ya fa setilaiti. Kacwalo, kopano ilukisize kuli fa Mandu A Mubuso kube ni lika zetokwahala kuli mizwale ni likaizeli baluna bakone kubuhela Progilamu ya JW Broadcasting ya fa setilaiti kwateñi, mi Mandu A Mubuso afitelela 3,670 anani liitusiso zecwalo. Liitusiso zeo likona kuleka masheleñi afita fa K1,532 haiba mwa Ndu ya Mubuso kunani lika zecwale ka TV kamba projekita, mi masheleñi ao akopanyeleza cwalo ni nzila ya kuliisa kwateñi. Haiba lika zeo haliyo, masheleñi atokwahala kuli lika zeo lilekiwe akona kufita fa K11,596.

 Mizwale ni likaizeli baluna baitumela hahulu kuba ni chaneo ye. Muzwale yomuñwi yali muuna-muhulu mwa puteho kwa Cameroon utalusa kuli: “Na ni lubasi lwaka luitebuha hahulu chaneo yeo sina feela maana yene bafilwe batu ba Mulimu mwa lihalaupa.” Muzwale yabizwa Odebode wa kwa Nigeria, utalusa kuli: “Lubuhanga chaneo ye sina lubasi halaalu ka sunda. Bana baka kamita baikolanga hahulu kubuha chaneo ye. Mane fokuñwi bakupanga kuli lucince chaneo yene lubuha mi lukalise kubuha chaneo ya JW.” Kaizeli yabizwa Rose wa kwa Nigeria ni yena utalusa kuli: “Nitabile hahulu kuli cwale senibuhanga chaneo ya JW ya fa setilaiti mwa sibaka sa kubuha makande ka nako kaufela. Makande ane nibuhanga fa TV naanifilikanyanga luli mi naatahisanga kuli BP yaka ipahame. Kono litaba za fa JW Broadcasting zona ki zende hahulu mi zanitiisanga! Ki yona chaneo yenilata hahulu. Chaneo ye ki mpo yende hahulu yezwa ku Jehova.”

 Muokameli wa mupotoloho yomuñwi kwa Mozambique utalusa kuli Mandu A Mubuso a mwa mupotoloho wahae anani liitusiso zekonisa kuli bahasanyi babuhe chaneo ya fa setilaiti ye. Mizwale ni likaizeli ba mwa liputeho zeitusisa Mandu A Mubuso acwalo bafitanga hora kamba kufitelela pili nako ya mikopano ya puteho isika kwana kale ilikuli babuhe JW Broadcasting fa setilaiti.

 Chaneo ya JW ya fa setilaiti neiitusisizwe kwa kubuhisa lingambolo zeñwi zetuna za fa mukopano wa macaba wa mwa 2019, one uezelizwe mwa Johannesburg, kwa South Africa, mi zeñwi za lingambolo zeo nelifilwe ki muzwale wa mwa Sitopa Sesietelela. Lingambolo zeo kaufela nelibuhisizwe kwa libaka zeñwi ze 9. Muzwale wa libizo la Sphumelele, yaswalisana ni Liluko Lelitalima za Kuhasanya Litaba leli kwa mutai wa South Africa, utalusa kuli: “Kwamulaho, neluitusisanga Intaneti kuli ilutuse kufitisa lingambolo kwa mizwale ni likaizeli mwa libaka zeñwi. Kono kuli taba yeo ikonahale, Intaneti neiswanela kuba hande mi nelutokwa kulifa masheleñi a kuleka data. Nelulemuhile kuli kuitusisa chaneo ya JW ya fa setilaiti nekusa tuli hahulu mi nekusa katazi.”

 Linubu zemufanga za musebezi wa mwa lifasi kaufela litusize kuli mizwale ni likaizeli baluna babañata mwa Africa bakone kubuha progilamu ya JW Broadcasting fa setilaiti. Lwaitumela luli kwa linubu zemufanga ka kuitusisa yeñwi ya linzila zefumaneha fa donate.jw.org.