Ki nzila ifi yekona kumitusa kuikola kubala Bibele ni kutusiwa hahulu ki yona? Munyakisise liakalezo ze 5 zebaitusisize babañata.

Mufumane sibaka sesiswanela. Mulike kufumana sibaka sesikuzize. Muambuke lika zekona kumiyaulula ilikuli muise pilu ku zemubala. Liseli leliswanela ni moya obata zakona kumitusa kuutwisisa zemubala.

Mube ni mubonelo oswanela. Bakeñisa kuli Bibele izwa ku Ndataa luna wa kwa lihalimu, mukatusiwa hahulu haiba muba ni mubonelo wabaanga ni ona mwanana yabata kulutiwa ki mushemi wahae yamulata. Haiba munani mibonelo yefosahalile ka za Bibele, mulike kuambuka mibonelo yeo ilikuli Mulimu amilute.—Samu 25:4.

Mulapele pili musika bala kale. Mwa Bibele kunani mihupulo ya Mulimu, kacwalo lutokwa kutusiwa ki Mulimu kuli luiutwisise. Mulimu usepisa kufa “moya okenile ku babamukupa.” (Luka 11:13) Moya okenile wakona kumitusa kuutwisisa mwanahanela Mulimu. Nako hainze iya, moya wo ukamitusa kuutwisisa “nihaiba zetungile za Mulimu.”—1 Makorinte 2:10.

Mubale ka mulelo wa kuutwisisa. Musike mwabala feela kuli mufeze kapili. Hamubala, munahanisise zemubala. Muipuze lipuzo zecwale ka ze: ‘Ki tulemeno tufi tonilemuha ku mutu yenibala ka zahae? Nikona kusebelisa cwañi litaba ze mwa bupilo bwaka?’

Muitomele likonkwani. Kuli mutusiwe ki zemubala mwa Bibele, muikataze kuituta nto yeñwi yekamitusa mwa bupilo bwamina. Mwakona kuitomela likonkwani zelatelela: ‘Nibata kuituta zeñata ka za Mulimu.’ ‘Nibata kuba mutu yomunde, kuba muuna yomunde, kamba musali yomunde.’ Mi mukete litaba zeñwi za mwa Bibele zekamitusa kupeta likonkwani zeo. a

Liakalezo ze 5 zeo likamitusa kukalisa kubala Bibele. Kono mukona kuezañi kuli muikole hahulu kubala Bibele? Mwa taba yetatama, kunani liakalezo zekona kumitusa kueza cwalo.