MU SUTELELE KU MULIMU

“Ki Ufi Mulao wa Pili Kwa Milao Kaufela?”

Lu kona ku ezañi kuli lu tabise Mulimu? Kana ku na ni na ni milao ye miñata-ñata ye lu lukela ku latelela? Batili. Ka ku ya ka Jesu Kreste yena Mwanaa Mulimu, za tokwa Mulimu ku luna li kona ku taluswa feela ka linzwi li li liñwi.—Mu bale Mareka 12:28-31.

Pili mu nyakisise libaka Jesu ha naa bulezi manzwi e lu balile fahalimu. Naa sweli ku luta mwa tempele ka la Nisani 11, ili mazazinyana pili a si ka shwa kale. Lila za hae ne li mu buzize lipuzo ze ñata kakuli ne li bata kuli a eze mafosisa. Nako kaufela ha ne ba mu buzanga lipuzo, naa ba alabanga ka nzila ye kolwisa. Mi ka nako yeo ne ba buzize Jesu puzo ye, ya kuli: “Ki ufi mulao wa pili kwa milao kaufela?”—Timana 28.

Yeo ne li puzo ye taata. Kakuli Majuda ba bañwi ne ba kananisananga ka za kuli ki ufi mulao wa pili kamba wa butokwa ka ku fitisisa kwa Milao ye ne fitelela 600 ya naa filwe Mushe. Ku bonahala kuli Majuda ba bañwi ne ba lumela kuli milao kaufela ne li ya butokwa ni kuli ne ku fosahalile ku nahana kuli milao ye miñwi ne li ya butokwa hahulu ku fita ye miñwi. Jesu naa ka alaba cwañi puzo yeo?

Mwa kalabo ya hae, Jesu naa bulezi ka za milao ye mibeli isiñi feela u li muñwi. Sapili, naa bulezi kuli: “U lukela ku lata Jehova Mulimu wa hao ka pilu ya hao kaufela, ka moyo wa hao kaufela, ka munahano wa hao kaufela, ni ka maata a hao kaufela.” (Timana 30; Deuteronoma 6:5) Manzwi a kuli “pilu,” “munahano,” “moyo,” ni “maata” a swalisana. * Taluso fo kikuli: Mutu u swanela ku lata Jehova ka buikoneli bwa hae kaufela, ka maata a hae kaufela ni ka lika za na ni zona kaufela. Buka ye ñwi ye bulela za litaba za mwa Bibele i talusa taba yeo cwana kuli: “Mulimu u swanela ku latiwa ka kutala.” Kamukwaocwalo, haiba mwa lata Mulimu, mu ka lika ka zazi ni zazi ku eza ka mo mu konela kaufela kuli mu mu tabise.—1 Joani 5:3.

Sa bubeli, Jesu naa bulezi kuli: “U lukela ku lata wahenu mo u itatela.” (Timana 31; Livitike 19:18) Lilato la ku lata Mulimu ni la ku lata batu ba bañwi li swalisana hahulu. Lu lata batu ba bañwi bakeñisa kuli lu lata Mulimu. (1 Joani 4:20, 21) Haiba lwa lata batu ba bañwi sina mo lu itatela, u zibe lu ka ba eza hande sina mo ne lu ka batela kuli ni bona ba lu ezeze. (Mateu 7:12) Ha lu eza cwalo, lu bonisa kuli lwa lata Mulimu ya bupile batu bao ni luna ka siswaniso sa hae.—Genese 1:26.

Ki kabakalañi litaelo za ku lata Mulimu ni batu ba bañwi ha li li za butokwa? Jesu naa bulezi kuli: “Ha ku na taelo ye ñwi ye tuna ku fita zeo.” (Timana 31) Mwa taba ye ñwi ye swana ni yeo Jesu naa bulezi kuli milao ye miñwi kaufela i tomile fa litaelo ze peli zeo.—Mateu 22:40.

Ku tabisa Mulimu ha ki nto ye taata hahulu. Za tokwa Mulimu ku luna li kona ku taluswa feela ka linzwi li li liñwi lona la lilato. Ku zwelela feela kwamulaho ko, Mulimu u tokwanga kuli batanga ba hae ba mu late mi u ka zwelapili ku ba tokwa ku eza cwalo kamita. Kono lilato ha li koni ku boniswa feela ka maikuto ni ka lipulelo, li swanela ku boniswa ni ka likezo. (1 Joani 3:18) Mwa kona ku ituta mwa ku boniseza lilato ku Jehova, yena Mulimu ya “lilato.”—1 Joani 4:8.

Litaba za mwa Bibele ze akalelizwe ku baliwa mwa March

Mareka 9–Luka 6

[Litaluso za kwatasi]

[Manzwi a fa likepe 13]

Lika kaufela za tokwa Jehova kwa balapeli ba hae, li kona ku taluswa feela ka linzwi li li liñwi, lona la lilato