Ku Batisisa Likalabo

MUÑOLI YO MUÑWI YA BIZWA STAN GUTHRIE NAA ÑOZI KULI: “Ibato ba kuli mutu kaufela ku na ni sa ziba ka za Jesu. Ku si na taba ni ze lu lumela ka za Jesu, kaufela luna lwa ipuzanga kuli: ‘Muuna yo ki mañi?’”

BATU ba tabela ku ziba ka za Jesu. Libuka ze bulela ka za Jesu se li atile hahulu. Mafilimu a bonisa ka za hae ni ona se a atile hahulu. Niteñi, batu ba bañata ba zwelapili ku buza lipuzo ka za Jesu. Batu ba na ni mibonelo ye shutana-shutana ka za kuli Jesu ne li mañi luli.

Lilimonyana kwamulaho, babihi ba bañwi ba babeli ba makande ne ba itusisize Intaneti ku mema batu ku alaba puzo ye li, “Jesu ne li mañi?” Batu bao ne ba file likalabo ze latelela:

● “Ku bonahala kuli ne li rabbi (muluti) ya naa pilile bupilo bwa hae ka ku bonisa ba bañwi mufelañeke.”

● “Ne li mutu-tu feela ya naa pilile bupilo bo bu ipitezi hahulu.”

● “Ha ku na bupaki bo bu bonisa kuli Jesu naa kile a pila fa lifasi.”

● “Jesu ki Mwanaa Mulimu ya naa kile a pepiwa, ku shwa ni ku zusiwa kwa bafu kuli a kone ku lu pulusa kwa sibi. Wa pila kacenu mi U ka taha fa lifasi hape.”

● “Ni lumela kuli Jesu Kreste ki mwanaa Mulimu a nosi, ki mutu mi hape ki mulimu ka nako ye swana.”

● “Jesu ki litangu la ku tangutela feela banana ba ba sa nonoboka.”

Kwa utwahala kuli mihupulo ye shutana-shutana ye atile hahulu yeo ha i konahali ku sikululwa kaufela yona. Kana ku na ni simbule sa litaba se si sepahala se si kona ku lu tusa ku fumana likalabo kwa lipuzo ze lu na ni zona ka za Jesu? Bahatisi ba magazini ye ba lumela kuli Bibele ki Linzwi la Mulimu ni kuli ki yona feela ye kona ku lu bulelela niti ye tezi ka za Jesu. *—2 Timotea 3:16.

Mwa taba ye tatama, lu ka nyakisisa likalabo za Bibele kwa lipuzo ze buziwanga hahulu ka za Jesu. Yena ka sibili naa bulezi kuli nzila ye libisa kwa puluso i kwaluhile ku “mutu kaufela ya bonisa tumelo ku yena.” (Joani 3:16) Lu mi mema ku nyakisisa likalabo mi hasamulaho mu ikatulele nji mu ka tokwa ku ituta ze ñata ka za Jesu ni mo mu kona ku boniseza tumelo ku yena.

[Litaluso za kwatasi]