Mu Itute Linzwi La Mulimu

Mulimu ki Mañi?

Taba ye i na ni lipuzo ze ne mu kana mu ipuzize mi i bonisa ko mu kona ku bala likalabo mwa Bibele ya mina. Lipaki za Jehova ba ka tabela ku nyakisisa ni mina likalabo ze.

1. Mulimu ki mañi?

Mulimu wa niti ki yena Mubupi wa linto kaufela. Bibele i mu biza kuli ki “Mulena wa kamita,” ili ku talusa kuli haa na makalelo mi haa na ku ba ni mafelelezo. (Sinulo 15:3) Bakeñisa kuli Mulimu ki yena ya lu file bupilo, lu swanela ku lapela feela yena.—Mu bale Sinulo 4:11.

2. Mulimu ki mutu ya cwañi?

Ha ku na mutu ya kile a bona Mulimu kakuli Mulimu ki Moya, ili ku talusa kuli bupilo bwa hae bu ipitezi hahulu ku fita libupiwa kaufela ze pila fa lifasi. (Joani 1:18; 4:24) Tulemeno twa Mulimu twa iponahaza ka lika za bupile. Ka mutala, ha lu nahana ka za mifuta-futa ni buñata-ñata bwa litolwana ni lipalisa, lwa lemuha lilato la Mulimu ni butali bwa hae. Butuna bwa pupo kaufela bu lu taluseza fa kuma maata a Mulimu.—Mu bale Maroma 1:20.

Mane, lwa kona ku ituta tulemeno twa Mulimu to tuñata ku zwelela mwa Bibele. Ka mutala, Bibele i lu bulelela za tabela Mulimu ni za toile, mwa ngela batu, ni mwa ezezanga mwa miinelo ye shutana-shutana.—Mu bale Samu 103:7-10.

3. Kana Mulimu u na ni libizo?

Jesu naa ize: “Ndataa luna ya kwa lihalimu, Libizo la hao a li be le li kenile.” (Mateu 6:9) Mulimu niha na ni malumbatina a mañata, u na ni feela libizo li li liñwi. Mubizezo wa lona wa shutana-shutana ka ku ya ka puo ni puo. Mwa Silozi kamita lu mu bizanga kuli “Jehova.”—Mu bale Isaya 12:2.

Libizo la Mulimu li zwisizwe mwa Libibele ze ñata mi li yolisizwe ka malumbatina a cwale ka Mulena kamba Mulimu. Kono Bibele ha ne i ñoliwa, libizo la Mulimu ne li fumaneha ibatoo ba ha 7,000. Jesu naa zibahalize libizo la Mulimu ka ku itusisa lona ha naa talusanga Linzwi la Mulimu kwa batu. Naa tusize batu ku ziba Mulimu.—Mu bale Joani 17:26.

 4. Kana Jehova wa lu isa pilu?

Jehova wa bonisanga kuli wa lu isa pilu ka ku teeleza kwa litapelo za luna yena muñi. (Samu 65:2) Kana manyando a mañata-ñata a li teñi a bonisa kuli Mulimu ha lu isi pilu? Batu ba bañwi ba bulelanga kuli Mulimu ki yena ya lu nyandisanga kuli a lu like, kono yeo haki niti. Bibele i bulela kuli: “Taba ya kuli Mulimu u ka eza bumaswe i kwahule.”—Jobo 34:10; mu bale Jakobo 1:13.

Mulimu u file batu maata a ku iketela lika ze ba tabela. Lwa itebuha tukuluho ya luna ya ku iketela ku sebeleza Mulimu. (Joshua 24:15) Manyando a atile hahulu kabakala kuli batu ba bañata ba iketelanga ku eza ba bañwi maswe. Jehova wa ikutwanga bumaswe ha bona lika ze cwalo ha li ezahala.—Mu bale Genese 6:5, 6.

Ona cwale-cwale fa, Jehova u ka itusisa Jesu ku feza manyando kaufela ni ba ba a tahisa. Kono ka nako ya cwale, Jehova u na ni mabaka ha tuhelezi manyando ka nakonyana. Taba ya mwa magazini ye tatama i ka talusa libaka Mulimu ha tuhelezi manyando.—Mu bale Isaya 11:4.

5. Mulimu u bata kuli lu ezeñi?

Jehova naa lu bupile ni buikoneli bwa ku mu ziba ni ku mu lata. U bata kuli lu itute niti ka za hae. (1 Timotea 2:4) Haiba lu ituta Bibele, lwa kona ku ziba Mulimu sina Mulikani.—Mu bale Liproverbia 2:4, 5.

Bakeñisa kuli Mulimu u lu file bupilo, lu swanela ku mu lata ku fita mo lu latela mutu ufi kamba ufi. Lwa kona ku bonisa kuli lwa lata Mulimu ka ku ambola ni yena mwa tapelo ni ku eza za lu bulelela. (Liproverbia 15:8) Jehova u lu bulelela ku lata batu ba bañwi.—Mu bale Mareka 12:29, 30; 1 Joani 5:3.

Kuli mu bale litaba ze ñata, mu bone kauhanyo 1 mwa buka ye, ye hatisizwe ki Lipaki za Jehova: Bibele i Lutañi Luli?

[Muvwimbimbi halifwo 17]

Kana Jehova u na ni mabaka ha tuhelezi manyando ka nakonyana?