Mulutiwa Jakobo naabapanyize Bibele kwa siiponi sesi lutusa kuziba mutu yeluli yena mwahali. (Jak. 1:​22-25) Lukona kuitusisa cwañi hande Bibele sina siiponi?

Muibale ka tokomelo. Haiba lukecula feela mwa siiponi, lwakona kupalelwa kulemuha masila oluswanela kuzwisa. Kuli luzibe hande mutu yeluli yena mwahali, luswanela kubalanga Linzwi la Mulimu ka tokomelo.

Muise hahulu pilu ku mina isiñi ku babañwi. Ka linako zeñwi halutalima mwa siiponi lwakona kubona batu basili mwateñi mi lwakona kuisa hahulu pilu kwa ponahalo yabona. Ka nzila yeswana, ni luna lwakona kubala Bibele ni kunahana ka za licinceho zebatokwa kueza babañwi. Kono kueza cwalo hakukoni kulutusa kubelekela fa bufokoli bwaluna.

Mube ni kutwisiso. Haiba luisa hahulu mamelelo kwa lika zelusa tabeli nako kaufela halutalima mwa siiponi, lwakona kuzwafa. Haiba luba ni kutwisiso halubala Linzwi la Mulimu, haluna kulibelela kuli lukaeza zeñata kufita zalibelela Jehova kuli lueze.—Jak. 3:17.