KANA MWA HUPULA?

Kana mu balile ka tokomelo limagazini za cwanoñu fa za Tawala ya Mulibeleli? Ha mu bone nji mwa kona ku alaba lipuzo ze tatama:

Jesu naa ‘kutalize lili kwa mioya ye ne i li mwa tolongo’? (1 Pit. 3:19)

Ku bonahala kuli ha se ku fitile nakonyana ku zwa fa naa zuselizwe kwa bafu, Jesu naa kutalize kwa mioya ye maswe yeo ka za katulo ye swanela ye ka fiwa kwa mioya yeo.—6/15, likepe 23.

Ki miinelo mañi ye milaalu ye kona ku mi tusa ku tatulula butata mwa linyalo la mina la bubeli?

Miinelo yeo ki: mu si ke mwa tuhelela linyalo la mina la pili ku filikanya linyalo la mina la bubeli; mu swalisane hande ni balikani ba ba sa zibi mutu ye mu nyalani ni yena cwale; mu sepe mutu ye mu nyalani ni yena nihaikaba kuli mutu ye ne mu nyalananga ni yena sapili naa si ka sepahala ku mina.—7/1, makepe 9-10.

Jesu u ka atula lili batu kuli ki lingu kamba lipuli? (Mat. 25:32)

Jesu u ka atula batu ba macaba kaufela kuli ki lingu kamba lipuli ha ka taha ka nako ya ñalelwa ye tuna ili hasamulaho wa ku sinyiwa kwa bulapeli bwa buhata.—7/15, likepe 6.

Batu ba ba sa mameli mulao ba ba bulezwi mwa nguli ya buloto ni mufuka ba ka lila ni ku kweca lili meeno a bona? (Mat. 13:36, 41, 42)

Ba ka eza cwalo ka nako ya ñalelwa ye tuna ha se ba lemuhile kuli ha ba koni ku silelezwa kwa sinyeho ye ba tahela.—7/15, likepe 13.

Manzwi a Jesu a bulela za mutanga ya sepahala a talelezwa lili? (Mat. 24:45-47)

Manzwi ao naa si ka talelezwa fa Pentekota ya silimo sa 33 C.E., kono naa talelelizwe hamulaho wa silimo sa 1914. Ka silimo sa 1919, mutanga ya sepahala naa ketilwe kuli a babalele batanga, ili ba ba kopanyeleza Bakreste kaufela ba ba fiwa lico za kwa moya.—7/15, makepe 21-23.

Jesu u fa lili mutanga ya sepahala buikalabelo bwa bubeli, ili ku mu keta kuli a babalele liluwo la hae kaufela?

Jesu u ka eza cwalo kwapili, ka nako ya ñalelwa ye tuna ili fo Bakreste ba ba li mutanga ya sepahala ba ka amuhela mupuzo wa bona kwa lihalimu.—7/15, likepe 25.

Kana Bibele ha i si ka punda mabizo a batu ba bañwi kabakala kuli ne li ba ba maswe kamba kuli ne ba si ba butokwa?

Ha lu swaneli ku nahana cwalo. Bibele ha i si ka punda mabizo a batu ba bañwi ba ne ba li ba bande ni ba ne ba li ba ba maswe. (Ruti 4:1-3; Mat. 26:18) Ku na ni feela ni mangeloi a mabeli a sepahala a pundilwe fa mabizo mwa Bibele.—8/1, likepe 10.

Kwandaa ku tusiwa ki maata a Mulimu, ki lika mañi ze ne tusize Lipaki za Jehova ba 230 ku caula ni ku yo fita kwa mafelelezo a musipili wa bona ku zwa kwa munganda wa tukufazo wa Sachsenhausen?

Nihaike kuli ne ba fokozi hahulu bakeñisa matuku ni ku tokwa hande za ku ca, mizwale bao ne ba zwezipili ku susuezana kuli ba itiise.—8/15, likepe 18.

Ki kabakalañi taba ya kuli Maisilaele ne ba silile Nuka ya Jordani ni ku kena mwa Naha ya Sepiso ha i lu susueza?

Nihaike kuli nuka ne i tezi hahulu, Jehova naa yemisize mezi ao a naa buba ilikuli batu ba hae ba sile. Ku bonahala kuli taba yeo ne i tiisize tumelo ya bona mi ne i ba tusize ku sepa hahulu Mulimu, ni luna lwa kona ku tiiswa ki taba yeo.—9/15, likepe 16.

Lu itutañi kwa taba ya kuli Bibele i bulela za mibala ka ku kuta-kutela?

Bibele ha i bulela za mibala, i bonisa kuli Mulimu wa utwisisa kuli mubala wa kona ku ama maikuto a mutu ni kuli hape mubala wa kona ku lu tusa ku hupula lika ze ñwi.—10/1, makepe 14-15.

Bupolofita bo bu kwa Mika 5:5 bo bu bulela za manduna ni balisana bu talelezwa cwañi kacenu?

Lu utwisisa kuli ‘balisana ba 7 ni manduna ba 8’ ba ba bulezwi kwa liñolo la Mika 5:5 ba swanisezwa ki baana-bahulu ba ba ketilwe mwa puteho, ba ba tiisa batu ba Mulimu kuli ba itukiseze twaniso ye ne polofitilwe ye ka ba tahela kwapili.—11/15, likepe 20.

Ki kabakalañi ha lu tokwa Mulimu?

Mulimu ki yena ya lu fa ketelelo ye nde ye lu tokwa mi hape ki yena ya lu tusa ku tatulula matata e lu kopana ni ona mwa bupilo. U lu sepisa kuli lu ka pila bupilo bo bunde ni kuli lu ka ba ni tabo, mi u ka taleleza lisepiso zeo ze mwa Linzwi la hae.—12/1, makepe 4-6.