Ne ba Ifanile Mwa Naha ya Mexico

Kwa tabisa ku bona ba banca ba bañata ba ba li Lipaki ha ba nolofaza mupilelo wa bona ka mulelo wa ku eza ze ñata mwa bukombwa bwa Sikreste. (Mat. 6:22) Ki licinceho mañi ze ba ezize ba banca bao mwa bupilo bwa bona? Ki miinelo mañi ye taata ye ba kopana ni yona? Kuli lu fumane kalabo, ha lu nyakisiseñi mitala ya ba banca ba bañwi ba ba sebeleza kwa naha ya Mexico.

“NE LU EZIZE LICINCEHO”

Bo Dustin ni bo Jassa ba ne ba pila kwa United States ne ba nyalani mwa kweli ya January, ka silimo sa 2007. Hamulahonyana wa fo, ba leka sisepe ili se ne ba nyolelwanga ku ba ni sona ilikuli ba itusise sona ka silimo si li siñwi. Ne ba fuekile sisepe sa bona bukaufi ni Astoria, mwa tolopo ya Oregon, ili kwa naha ya America, ili tolopo ye buheha ye potolohilwe ki tulundu fo ku melile likota ze ñata ni malundu a kwahezwi ki litwa ili bukaufi ni Liwate la Pacific. Bo Dustin ba bulela kuli: “Sibaka seo kaufela ne si buheha luli!” Bo Dustin ni bo Jassa ne ba ikutwa kuli ne ba nolofalize bupilo bwa bona ni kuli ne ba itingile ku Jehova. Mi mane ne ba bulelanga kuli: “Lu pila mwa sisepe se si eza limita ze 7.9 mwa butelele, lu na ni kasebezinyana ko lu eza, lu kopana mwa puteho ye itusisa puo isili, mi fokuñwi lwa ezanga bupaina bwa ku tusa.” Kono hamulaho wa nako, bo Dustin ni bo Jassa ba lemuha kuli ne ba ipuma ili bona ka ku nahana kuli ne ba nolofalize bupilo bwa bona. Bo Dustin ba bulela kuli: “Mwa sibaka sa ku swalisana ni puteho, ne lu tandanga nako ye ñata kwa ku lukisa sisepe sa luna.  Ne lu ziba kuli haiba ne lu bata ku beya za Jehova mwa sibaka sa pili, ne lu tokwa ku cinca mupilelo wa luna.”

Bo Jassa ba ekeza kuli: “Pili ni si ka nyalwa kale, ne ni pila kwa naha ya Mexico, teñi ko, ne ni kopananga mwa puteho ya Sikuwa. Ne ni ikozi ku ba mwa puteho yeo, mi ne ni tabela ku kutela kwateñi hape.” Ka nako ya ku lapela sina lubasi, bo Dustin ni bo Jassa ne ba tiisanga takazo ya bona ya ku yo sebeleza kwa naha isili ka ku balanga makande a ze ezahezi mwa bupilo bwa mizwale ni likaizeli ba ne ba fumani tabo ya ku sebeleza kwa linaha li sili ko ne ku na ni masimu a naa libelezi ku kutulwa ili ku talusa batu ba ne ba tabela ku teeleza kwa taba ye nde. (Joa. 4:35) Bo Dustin ba bulela kuli: “Ni luna ne lu bata ku ba ni tabo ye swana ni ye ne ba bile ni yona mizwale ni likaizeli bao.” Ha ne ba utwile kwa balikani ba bona ba kwa Mexico kuli ku na ni sikwata se sinca se ne si li mwa butokwi, bo Dustin ni bo Jassa ba cinca mubonelo wa bona. Ba tuhela misebezi ya bona, ba lekisa sisepe sa bona, mi ba tutela kwa Mexico.

“NTO YE NDE YE NE EZAHEZI KU LUNA”

Bo Dustin ni bo Jassa ba yo ina mwa tolopo ya Tecomán ili ye ne bapani ni Liwate la Pacific ili likilomita ze 4,345 ku zwa kwa mboela wa Astoria. Bo Dustin ba bulela kuli: “Ka ku shutana ni ko ne lu zwa ko ne ku fukanga moya o munde, ili ko ne lu ikolanga ku buha malundu, kwanu ko lu tile kwa cisa mi kai ni kai ku cezwi feela likota za malemoni.” Kwa makalelo, bo Dustin ni bakubona ne ba si ka fumana musebezi ko ne ba tutezi. Bakeñisa kuli ne ba si na hande masheleñi, ne ba canga feela laisi ni manawa habeli ka zazi mi ne ba ezanga cwalo ka sunda ni sunda. Bo Jassa ba bulela kuli: “Ka nako ye ne lu si na hande za ku ca, baituti ba luna ba kalisa ku lu tisezanga limango, makonde, lipopo, mane ni masaka a tezi a malemoni!” Nako ha ne i nze i ya, bo Dustin ni bakubona ba fumana musebezi kwa sikolo se ne si fumaneha kwa Taiwan mi ne ba ezanga musebezi wo ka ku itusisa Intaneti bona inze ba li mwa Mexico. Ba itusisanga masheleñi e ba holanga kwa musebezi wo kwa ku leka ze ba tokwa ka zazi.

Bo Dustin ni bo Jassa ba ikutwa cwañi ka za mupilelo wa bona o munca? Bubeli bwa bona ba bulela kuli: “Ku tuta ki nto ye nde ye ne ezahezi ku luna. Bulikani bwa luna ni Jehova ni bulikani bo bu mwahalaa luna bu tiile ku fita mo ne bu inezi kwa makalelo. Zazi ni zazi lu ezanga lika ze ñata hamoho, inge cwalo ku ya hamoho mwa sebelezo ya mwa simu, ku buisana mo lu kona ku tuseza baituti ba luna ba Bibele, ni ku itukiseza hamoho mikopano. Hape lu ikutwa ku lukuluha hahulu ku fita mo ne lu ikutwelanga kwamulaho.” Bo Dustin ni bakubona ba ekeza kuli: “Ka nako ya cwale, lwa utwisisa hande-nde buniti bwa sepiso ye fumaneha kwa Samu 34:8, ye li, ‘Mu lazwe, mi mu ka bona kuli Muñaa Bupilo u na ni sishemo.’”

KI NTO MAÑI YE SUSUEZA BASEBELEZI BA BAÑATA?

Mizwale ni likaizeli ba ba mwa linyalo ni ba ba li makwasha ba ba fitelela 2,900, ili bao buñata bwa bona ba na ni lilimo ze fitelela 20 ni 30, ba tutezi mwa libaka ze shutana-shutana za mwa Mexico kuli ba yo sebeleza ko ku sa na ni butokwi bo butuna bwa bakutazi ba Mubuso. Ki kabakalañi  Lipaki bao kaufela ha ba iketezi ku eza musebezi o taata wo? Ba bañwi mwa sikwata seo ha ne ba buzizwe puzo yeo, ne ba file mabaka a malaalu. Ki mabaka afi e ne ba file?

Libaka la pili: Ku lata Jehova ni batu ba bañwi. Bo Leticia, ba ne ba kolobelizwe inze ba na ni lilimo ze 18, ba bulela kuli: “Ha ne ni ineela ku Jehova, ne ni ziba kuli ku eza cwalo ku talusa ku mu sebeleza ka pilu ya ka kaufela ni ka moya wa ka kaufela. Kamukwaocwalo, kuli ni bonise lilato la ka le lituna ku Jehova, ne ni bata ku itusisa nako ya ka ni maata a ka kwa ku sebeleza Jehova.” (Mare. 12:30) Bo Hermilo, ili ba ba nyezi bo Leticia, ne ba zo sebeleza ko ne ku na ni butokwi bo butuna bwa bakutazi ba Mubuso. Bo Hermilo ba bulela kuli: “Ne ni lemuhile kuli nzila ye nde ka ku fitisisa ye ni kona ku bonisa kuli na lata batu ba bañwi, ki ka ku ba tusa ku ziba za Mulimu. (Mare. 12:31) Kamukwaocwalo, bo Hermilo ba tutela mwa toloponyana ku zwa mwa tolopo ye nde ya Monterrey mo ne ba ikolanga bupilo bo bunde inze ba sebeza mwa panga.

Libaka la bubeli: Kuli ba ikole tabo sakata. Nakonyana hamulaho wa kolobezo ya bona, bo Leticia ni kaizeli ya li paina ya na ni yeloseli, ba ya kwa tolopo ye ne li kwahulenyana, ili ko ne ba yo kutaza ka kweli mukatumbi. Bo Leticia ba bulela kuli: “Ne ni komokile hahulu. Ku bona takazo ye tuna ye ne ba na ni yona batu ya ku teeleza kwa lushango lwa Mubuso ne ku ni tabisize hahulu. Hamulaho wa kweli, ne ni ipulelezi kuli, ‘Wo ki wona musebezi o ni bata ku eza mwa bupilo bwa ka!’” Hamulaho wa ku bona tabo ye ne ba na ni yona mizwale ni likaizeli ba ne ba sebeleza ko ku na ni butokwi bo butuna bwa bakutazi ba Mubuso, kaizeli wa likwasha ya bizwa Essly, ya na ni lilimo ze fitelela hanyinyani 20, naa ikatulezi ku eza musebezi o swana. Ha naa sa li kwa sikolo se si pahami, naa kopani ni Lipaki ba bañata ba ne ba tukufalezwi ili ba ne ba sebeleza ko ne ku na ni butokwi bo butuna. Essly u bulela kuli: “Ku bona mizwale ni likaizeli bao inze ba tabile ne ku ni susuelize kuli ni na ni yo pila bupilo bo bu swana kwapili.” Likaizeli ba bañata ba likanyisize mutala wa Essly. Mane mwa Mexico, likaizeli ba makwasha ba ba fitelela 680 ba sebeleza ko ku na ni butokwi bo butuna. Kaniti luli mizwale ni likaizeli bao ba tomela ba banca ni ba bahulu mutala o munde o ba tokwa ku likanyisa!

Libaka la bulaalu: Ku pila bupilo bo bunde. Hamulaho wa ku feza sikolo, Essly naa sepisizwe kuli naa ka lifelwa masheleñi kuli a ye kwa yunivesiti. Balikani ba hae ba mu susueza kuli a ye kwa yunivesiti ilikuli a yo ndongwama “bupilo bo ne ba nga kuli ki bo bunde,” inge cwalo ku ba ni digrii, ku fumana musebezi o munde, ku ba ni mota, ni ku tamanga misipili ye shutana-shutana. Kono Essly naa si ka latelela ze ne ba bulezi. Essly u li: “Buñata bwa balikani ba ka ba Sikreste ne ba ndongwami bupilo bo bu cwalo, mi ne ni lemuhile kuli ne ba keshebisa likonkwani za kwa moya. Hape ne ni lemuhile kuli balikani ba ka bao ne ba zwafile hahulu bakeñisa miinelo ye taata ye ne ba kopana ni yona ha ne ba nze ba ndongwama hahulu likonkwani za lifasi le. Ka ku ba yo munca, ne ni bata ku sebeleza Jehova ka maata a ka kaufela.”

 Essly naa ezize ka kosinyana ka ne ka mu tusize ku fumana musebezi o ne u mu konisize ku fumana za naa tokwa ha naa nze a eza bupaina. Mi hamulaho a tutela kwa sibaka ko ne ku tokwahala hahulu bahasanyi ba Mubuso. Essly mane a yo ituta lipuo ze ne bulelwa ki Maotomi ni Matlapaneco ili batu ba ne ba pila mwa sibaka seo. Hamulaho wa ku sebeleza mwa libaka za kwahule ka lilimo ze taalu, Essly u li: “Ku sebeleza ko ku na ni butokwi bo butuna ku ni tusize ku ikola bupilo bo bunde ili bo bu tabisa. Sa butokwa ni ku fita, bulikani bwa ka ni Jehova bu tiile.” Bo Phillip ni bakubona bo Racquel, ba ba na ni lilimo ze fitelela hanyinyani 30, ba kwa United States, ni bona ba li: “Miinelo mwa lifasi le i zwelapili ku cinca ka bubebe kuli mane batu ba bañata ba bilaela ka za bupilo bwa bona. Kono ku sebeleza ko ku sa fumaneha batu ba bañata ba ba teeleza kwa lushango lwa mwa Bibele ku lu tusa ku ikola bupilo bo bunde mi kwa tabisa luli!”

MWA KU TIYELA MIINELO YE TAATA

Ki niti kuli haki nto ye bunolo ku sebeleza ko ku na ni butokwi bo butuna bwa bahasanyi ba Mubuso. Butata bo buñwi bwa kona ku kopana ni bona mutu ki bwa mwa ku ipiliseza. Kuli mu tatulule butata bo, mu swanela ku itatela ku yo pila mo ba pilela batu ba kwa sibaka se mu ka yo sebeleza ku sona. Bo Verónica, ba ba li mapaina ba ba yeziseli ba talusa kuli: “Kwa sibaka se siñwi ko ne ni sebeleza, ne ni lukisanga ni ku lekisa lico ze ne sa tuli hahulu. Mi hape kwa sibaka se siñwi ko ne ni sebelezanga, ne ni lekisanga libyana mi hape ne ni ezanga kapisinisi ka ku kuta milili. Ka nako ye, ni ezanga kasebezi ka ku fiyela mwa mandu a batu mi hape ni yo lutanga batu ba ba sa zo ba ni bana kuli ba zibe mo ba kona ku ambolelanga hande ni bana ba bona.”

Ku kona ku ba taata hahulu ku twaela lizo ni miezezo ye shutana-shutana ya batu ba ba pila mwa sibaka se mu ka yo sebeleza ku sona. Kona mo ne ku bezi ku bo Phillip ni bo Racquel ha ne ba sebeleza kwa sibaka ko ku bulelwa puo ya Sinahuatl. Bo Philip ba li: “Lizo za luna ni lizo za bona ne li shutanela hahulu kwahule.” Ki nto mañi ye ne ba tusize ku twaela mupilelo wa kwa sibaka seo? Bo Racquel ba li: “Ne lu isize pilu fa lika ze nde ze ne lu lemuhile kwa batu bao inge cwalo mo ne ba swalisanela ni mabasi a bona, mo ne ba belekisanela hande ni ba bañwi, mane ni sishemo se ne ba bonisa ku ba bañwi. Ku pila kwa sibaka seo ni ku sebeza hamoho ni mizwale ni likaizeli ba luna ne ku lu lutile ze ñata.”

MWA KU ITUKISELEZA

Mu kona ku ezañi cwale kuli mu itukiseze ku yo sebeleza kwa libaka ze kwahule ili ko ku tokwahala tuso? Mizwale ni likaizeli ba se ba ezize cwalo ba bulela kuli: Mu si ka tuta kale, mu kalise ku nolofaza mupilelo wa mina ni ku ituta ku kolwa ka ze mu na ni. (Mafil. 4:11, 12) Mu kona ku ezañi hape kuli mu itukiseze? Bo Leticia ba bulela kuli: “Ne ni ambukile ku kena musebezi o ne u ka tokwa kuli ni sebeze kwa kampani i liñwi ka nako ye telele. Ne ni bata kuli ni sebeze kwa kampani ko ne ni ka kona ku tuhela musebezi ka nako ifi kamba ifi, ili fo ne ni ka tokwela kaufela.” Bo Hermilo ba bulela kuli: “Ne ni itutile ku apeha, ku tapisa libyana, ni ku haina.” Bo Verónica ba li: “Ha ne ni sa ina ni bashemi ba ka, banyani ba ka, ni bahulwani ba ka, ne ni itutile misebezi ya fa lapa mi hape ne ni itutile ku apeha lico ze tabusa kono ili ze sa tuli. Hape ne ni itutile ku bulukanga masheleñi.”

Bo Levi ni bo Amelia ba kwa United States ili ba se ba nyalani ka lilimo ze 8 ba talusa kuli ku kupanga ze ba tokwa luli mwa tapelo ne ku ba tusize ku itukiseza ku yo sebeleza kwa naha ya Mexico. Bo Levi ba li: “Ne lu ezize lipalo kuli lu zibe masheleñi e ne lu ka tokwa kuli lu yo sebeleza kwa naha i sili ka silimo mi kihona lu kupa Jehova mwa tapelo kuli a lu tuse ku fumana masheleñi ao.” Mwa likwelinyana feela, bo Levi ni bakubona ne ba konile ku kwanisa masheleñi ao e ne ba kupile mwa tapelo, mi ba tuta ku si na ku zina-zina. Bo Levi ba bulela kuli: “Jehova naa alabile tapelo ya luna, mi cwale se ne lu tokwa feela ne li ku tuta kuli lu yo sebeleza kwa naha i sili. Bo Amelia ba ekeza kuli: “Ne lu nahana kuli lu ka sebeleza kwanu silimo si li siñwi feela, kono se lu bile kwanu ka lilimo ze 7, mi ha lu nahani za ku kuta! Ku pila kwanu ku lu tusa ku bona mwa lu tuseza Jehova. Mi zazi ni zazi lu iponelanga bunde bwa Jehova.”

Bo Adam ni bakubona bo Jennifer ba ba zwa kwa United States ili ba ba sebeleza mwa sibaka se si itusisa puo ya sikuwa mwa Mexico, ni bona ne ba tusizwe hahulu hamulaho wa ku kupa ze ne ba tokwa luli ku Mulimu. Ba lu susueza kuli: “Mu si ke mwa nahana kuli ha mu na ku yo kopana ni miinelo ye taata. Mu kupe Mulimu kuli a mi tuse ku yo sebeleza kwa naha isili, mi mu nge muhato wa ku tutela kwa sibaka seo. Mu nolofaze mupilelo wa mina, mu ñolele kwa mutai o mwa naha ye mu tabela ku yo sebeleza ku yona, mi hamulaho wa ku nyakisisa miinelo kaufela ye mu ka yo kopana ni yona kwa sibaka seo, mu tute!” * Haiba mu eza cwalo, mu ka yo ikola bupilo bo bu tabisa ni ku tiisa bulikani bwa mina ni Jehova.

[Litaluso za kwatasi]