Ki Kabakalañi Ku Sebeleza Jehova Ha Ku Swanela Ku Ba Nto Ya Pili Mwa Bupilo Bwa Luna?

“Mulomo wa ka u ka bulela ka mazazi ku sepahala kwa hao, Ni mo ni lamulelezi.”—SAMU 71:15.

NE MU KA ALABA CWAÑI?

Ki kabakalañi Nuwe, Mushe, Jeremia, ni Paulusi ha ne ba sebelelize Jehova ka ku tala?

Ki lika mañi ze ka mi tusa ku iketela ze mu bata ku eza mwa bupilo bwa mina?

Ki kabakalañi ha mu ikatulezi ku sebeleza Jehova ka ku tala?

1, 2. (a) Mutu ha ineela ku Jehova, u bonisañi? (b) Mitala ya bo Nuwe, Mushe, Jeremia, ni Paulusi i kona ku lu tusa cwañi?

HA MU ineela ku Mulimu ni ku ba mulateleli ya kolobelizwe wa Jesu, mu eza katulo ya butokwa hahulu mwa bupilo bwa mina. Ku swana feela inge kuli mu bulelela Jehova kuli: ‘Ni bata kuli wena Jehova u be Mulenaa ka mwa bupilo bwa ka kaufela. Ni mutangaa hao. Ni bata kuli u ni bulelele mo ni swanela ku itusiseza nako ya ka, lika ze ni swanela ku nga ku ba za butokwa, ni mo ni swanela ku itusiseza buikoneli bwa ka ni maluo a ka.’

² Haiba mu Bakreste ba ba kolobelizwe, seo luli ki sona se ne mu sepisize Jehova. Ne mu ezize katulo ye nde luli. Katulo ya mina ne li ye nde mi hape ne li ye butali. Bakeñisa kuli mwa ziba kuli Jehova ki Mulenaa mina, mu itusisa cwañi nako ya mina? Ku nyakisisa mitala ya bo Nuwe, Mushe, Jeremia, ni muapositola Paulusi ku kona ku lu tusa ku ziba hande mo lu kona ku alabela puzo yeo. Batu ba kaufela bona ne ba sebelelize Jehova mo ne ba konela kaufela. Miinelo ya luna kacenu ya swana ni ya bona. Likatulo ze ne ba ezize ne li bonisa lika ze ne ba nga ku ba za butokwa mwa bupilo bwa bona, mi nto yeo i swanela ku lu susueza ku tatubisisa mo lu itusiseza nako ya luna.—Mat. 28:19, 20; 2 Tim. 3:1.

MUUNDA U SI KA TAHA KALE

3. Lifasi le lu pila ku lona li swana cwañi ni la naa pila ku lona Nuwe?

³ Jesu naa bapanyize lifasi la naa pila ku lona Nuwe kwa lifasi la luna. Naa ize, “Sina mwa naa inezi mazazi a Nuwe, nako ya ku ba teñi kwa Mwanaa mutu ni yona i ka ba cwalo. . . Batu ne ba ca, ne ba nwa, baana ne ba nyala, basali ne ba nyaliswa, ku fitela lizazi laa kena Nuwe mwa aleka, mi ne ba si ka lemuha se si siñwi ku fitela Muunda u taha ni ku ba kukisa kaufelaa bona.” (Mat. 24:37-39) Batu ba bañata kacenu ha ba teelezangi kwa litemuso ze ba sweli ku fa batanga ba Mulimu. Ha ba bilaelangi  za kuli lu pila mwa linako za mafelelezo. Sina feela batu ba ne ba pila mwa miteñi ya Nuwe, batu ba bañata ha ba lumeli kuli Mulimu u ka yundisa batu ba ba maswe. Mane ba nga taba yeo ka likesha. (2 Pit. 3:3-7) Nuwe naa itusisize cwañi nako ya hae ku si na taba kuli batu ba ne ba pila mwa nako ya hae ne ba si ka teeleza kwa litemuso za hae?

4. Nuwe naa itusisize cwañi nako ya hae ha sa filwe musebezi o ipitezi ki Jehova, mi ki kabakalañi?

⁴ Mulimu naa bulelezi Nuwe kuli naa ka yundisa batu ba ba maswe kaufela, mi naa file Nuwe musebezi o ipitezi. Nuwe naa yahile aleka kuli a pilise batu ni lifolofolo. (Gen. 6:13, 14, 22) Nuwe hape naa lemusize batu ka za katulo ya naa ka tahisa Jehova. Muapositola Pitrosi u bulela kuli Nuwe ki “mukutazi wa ku luka,” ili nto ye bonisa kuli Nuwe naa sebelize ka taata kuli a tuse batu ba bañwi ku lemuha butokwa bwa ku mamela litemuso za naa ba file. (Mu bale 2 Pitrosi 2:5.) Kana mu nga kuli Nuwe ni lubasi lwa hae ne ba ka be ba ezize nto ye nde kambe ne ba itusisize nako ya bona kuli ba kalise pisinisi, ku kondisa hahulu ku fita batu ba bañwi, kamba ku luwa lika ze ñata ze nde? Kutokwa! Bakeñisa kuli Nuwe ni lubasi lwa hae ne ba ziba ze ne ka ezahala kwapili, ne ba ambukile nto ifi kamba ifi ye ne ka ba tibela ku eza musebezi wa naa ba file Jehova.

MWANAA MULENA U EZA KETO

5, 6. (a) Ki kabakalañi Mushe ha naa lutilwe “butali kaufela bwa Maegepita”? (b) Ki kabakalañi Mushe ha na si ka iketela ku pila sina mwanaa mulena mwa Egepita?

⁵ Ha lu nyakisiseñi mutala wa Mushe. Mwanaa Faro naa añuzi Mushe, mi Mushe a huliswa sina mwanaa mulena mwa Egepita. Mushe naa lutilwe “butali kaufela bwa Maegepita.” (Lik. 7:22; Ex. 2:9, 10) Maegepita ne ba lutile Mushe ilikuli a itukiseze musebezi wa naa ka fiwa ki Faro. Mushe na ka be a bile mutu yo mutuna luli mwa mubuso o maata ka ku fitisisa ka nako yeo. Na ka be a ipumanezi lika ze ñata ze nde, mi mane na ka kutekiwa hahulu ki batu. Kono kana lika zeo ne li za butokwa ku Mushe?

⁶ Mushe ha naa sa li mwanana, bashemi ba hae ne ba mu lutile ka za Jehova. Kamukwaocwalo, u lukela ku ba ya naa ziba zeo Jehova naa sepisize Abrahama, Isaka, ni Jakobo. Mushe naa na ni tumelo mwa lisepiso zeo. U lukela ku ba ya naa nahanisisize za bupilo bwa hae bwa kwapili ni mwa na ka sepahalela ku Jehova. Ki katulo mañi ya naa ezize Mushe nako ha ne i fitile ya kuli a iketele ku pila sina mwanaa mulena mwa Egepita kamba ku ba mutanga wa Muisilaele? Mushe naa iketezi ku “nyandiswa ni sicaba sa Mulimu ku fita ku ikola minyaka ya libi ye ina nako ye nyinyani.” (Mu bale Maheberu 11:24-26.) Hasamulaho, Mushe naa latelezi zamaiso ya Jehova ya mwa naa ka pilela bupilo bwa hae. (Ex. 3:2, 6-10) Ki kabakalañi Mushe ha naa ezize cwalo? Bakeñisa kuli naa lumela kuli Mulimu naa ka taleleza lisepiso za hae ni kuli lika kaufela za na ka ba ni zona mwa Egepita ne li si ke za ina nako ye telele. Mubonelo wa Mushe ne u nepahezi. Mulimu naa tuha a fa naha ya Egepita likoto ze lishumi. Batanga ba Jehova kaufela ba ba ineezi ba kona ku ituta kwa mutala wa naa tomile Mushe. Ku fita ku ndongwama  likonkwani za mwa lifasi le kamba ku lika ku ipumanela maluo a mañata, ku sebeleza Jehova ku swanela ku ba nto ya pili mwa bupilo bwa luna.

JEREMIA NAA ZIBA ZE NE KA EZAHALA

7. Muinelo wa naa li ku wona Jeremia u swana cwañi ni wa luna?

⁷ Mupolofita Jeremia ni yena naa ziba kuli ku sebeleza Jehova ki nto ya butokwa mwa bupilo bwa hae. Jehova naa ketile Jeremia kuli a be mupolofita wa hae mi naa mu file musebezi o ipitezi. Jeremia naa kutalize kuli Jehova naa ka atula batu ba mwa Jerusalema ni Juda bakeñisa kuli ne ba lapela milimu ya buhata. Muinelo wa naa li ku ona Jeremia wa swana ni wa luna. Jeremia ni yena naa pilile “mwa mazazi a mafelelezo.” (Jer. 23:19, 20, NW) Naa ziba hande kuli muinelo wa na li ku wona ne u si ke wa zwelapili ku ba teñi.

8, 9. (a) Ki kabakalañi Mulimu ha naa hakuluzi mubonelo wa Baruki? (b) Lu swanela ku hupulangañi ha lu lela za ku eza mwa bupilo?

⁸ Ki nto mañi ya naa si ka eza Jeremia bakeñisa tumelo ya hae? Naa si ka ndongwama hahulu lika za mwa lifasi lani kakuli naa ziba kuli lifasi leo ne li ka yundiswa. Ku ndongwama lika za mwa lifasi leo ne ku si ke kwa ba ko ku butali. Kono Baruki, muñoli wa Jeremia naa na ni mubonelo o shutana ni wa Jeremia. Ki lona libaka Mulimu ha naa bulelezi Jeremia kuli a hakulule Baruki ka ku mu bulelela kuli: “Bona, se si yahilwe ki na, ni ka si wisa; se ni calile, ni ka si kumula; ku ka ezwa cwalo mwa naha ye kaufela. Kikuli wena u ka ipatela linto ze tuna? U si ke wa ipatela zona, kakuli ni ka tiseza batu kaufela bumaswe, . . . kono ni ka ku fa bupilo bwa hao, ibe mbuya ya hao, mwa mabaka kaufela mo ka ya.”—Jer. 45:4, 5.

⁹ Ha lu zibi hande “linto ze tuna” za naa ipatela Baruki. * Kono lu ziba kuli lika zeo ne li si ke za ina nako ye telele. Ne li ka sinyiwa ka nako yeo Mababilona ne ba ka tula Jerusalema mwa silimo sa 607 pili Kreste a si ka taha kale. Taba yeo i lu lutañi? I lu luta kuli lu swanela ku ba ni milelo ye ka lu tusa kuli lu fumane lika ze lu tokwa mwa bupilo. (Liprov. 6:6-11) Kana ne lu ka eza hande ha ne lu ka itusisa nako luna ye ñata ni maata a luna kwa ku bata lika ze si ke za ina nako ye telele? Ki niti kuli kopano ya Jehova i zwelapili ku lela za ku yaha Mandu A Mubuso, liofisi za mutai, ni ze ñwi cwalo. Kono milelo yeo ya shutana ni milelo ya mwa lifasi kakuli milelo ya mwa kopano ya Jehova i zwisezapili za Mubuso. Kamukwaocwalo, batu ba Jehova ba ba ineezi ha ba lela ku eza lika ze ñwi, ba swanela ku beya Mubuso wa Mulimu mwa sibaka sa pili mwa bupilo bwa bona. Kana mwa ‘bata pili Mubuso ni ku luka kwa Jehova?’—Mat. 6:33.

NAA “LI NGA SINA MATAKALA”

10, 11. (a) Ki lika mañi za naa nga Paulusi ku ba za butokwa pili a si ka ba kale Mukreste? (b) Ki kabakalañi Paulusi ha naa cincize mubonelo wa hae ka za lika za naa nga ku ba za butokwa?

¹⁰ Ha lu nyakisiseñi mutala wa muapositola Paulusi. Pili a si ka ba kale Mukreste, batu kaufela ne ba nga kuli Paulusi naa ka eza musebezi o munde. Paulusi naa lutilwe mulao wa Sijuda ki yo muñwi wa baluti ba ne ba tumile hahulu ka nako yeo. Muprisita yo muhulu wa Sijuda naa sepile Paulusi mi naa mu file musebezi o munde. Mi naa kondisa hande hahulu mwa bulapeli bwa Sijuda ku fita buñata bwa litaka za hae. (Lik. 9:1, 2; 22:3; 26:10; Magal. 1:13, 14) Kono bupilo bwa Paulusi bwa to cinca ha naa zibile kuli Jehova naa hanile sicaba sa Majuda.

¹¹ Kabakaleo, Paulusi naa ziba kuli misebezi ya naa eza mwa bulapeli bwa Sijuda ne si ya butokwa ku Jehova. Sicaba sa Majuda ne si ipilela feela. (Mat. 24:2) Paulusi naa utwisisa milelo ya Mulimu, mi naa ziba kuli ne li tohonolo ye tuna ku yena ku eza  musebezi wa ku kutaza. Mane naa bulezi kuli lika za naa nga ku ba za butokwa pili a si ka ba kale Mukreste ne li swana “sina matakala” kamba manyalala. Paulusi a zwa mwa bulapeli bwa Sijuda mi a itusisa nako ya hae kaufela ya naa li fa lifasi kwa ku kutaza taba ye nde.—Mu bale Mafilipi 3:4-8, 15; Lik. 9:15.

MU TATUBE LIKA ZE MU NGA KU BA ZA BUTOKWA

12. Ki nto mañi ya naa nga Jesu ku ba ya butokwa hahulu hamulaho wa ku kolobezwa?

¹² Nuwe, Mushe, Jeremia, Paulusi, ni batu ba bañwi ba bañata ne ba itusisize nako ni maata a bona ku sebeleza Jehova. Kaufela bona ki mitala ye minde ye lu swanela ku likanyisa. Batanga ba Jehova ba ba ineezi kaufela ba swanela ku latelela mutala o munde ka ku fitisisa wa Jesu. (1 Pit. 2:21) Jesu ha sa kolobelizwe, naa itusisize bupilo bwa hae kaufela bwa fa lifasi ku kutaza taba ye nde ni ku lumbeka Jehova. Kamukwaocwalo, ku sebeleza Jehova ku swanela ku ba nto ya butokwa ka ku fitisisa mwa bupilo bwa Mukreste ya latelela mutala wa Jesu ni ya nga Jehova ku ba Mulenaa hae. Kana ku sebeleza Jehova ki yona nto ya butokwa mwa bupilo bwa mina? Lu kona ku sebeleza cwañi Jehova ka ku tala mi ka nako ye swana ni ku peta buikalabelo bwa luna bo buñwi?—Mu bale Samu 71:15; 145:2.

13, 14. (a) Bakreste kaufela ba susuezwa ku lapela ka zañi? (b) Ki nto mañi ye ka tahiseza batu ba Mulimu tabo?

¹³ Ka lilimo ze ñata, kopano ya Jehova i zwezipili ku susueza Bakreste ku lapela, ili ku kupa kuli Mulimu a ba tuse ku eza bupaina. Miinelo ya batanga ba bañwi ba Jehova ba ba sepahala, ha i ba konisi ku tanda lihora ze 70 ka kweli mwa musebezi wa ku kutaza. Ha ba swaneli ku ikutwa bumaswe ka za muinelo wa bona wo. (1 Tim. 5:8) Ku cwañi ka za miinelo ya mina? Kana ya mi konisa ku eza bupaina?

¹⁴ Mu nahane ka za tabo ye ne ba bile ni yona batu ba Mulimu ba bañata mwa kweli ya March, silimo se. Mwa kweli yeo, ne ku ezizwe tukiso ye ipitezi ya ku fa kolo kwa mapaina ba ku tusa ku iketela haiba ba bata ku kutaza lihora ze 30 kamba ze 50. (Samu 110:3) Mizwale ni likaizeli ba bañata ne ba ezize bupaina bwa ku tusa mwa kweli yeo. Ni mina mwa kona ku fumana tabo ye tuna! Kana mwa kona ku eza licinceho ze ka mi tusa ku ezanga bupaina bwa ku tusa nako ni nako? Haiba Mukreste ya kolobelizwe a eza bupaina, u ka ba ni tabo zazi ni zazi mi wa kona ku bulela kuli, “Jehova, ni ku sebelelize mo ne ni konela kaufela.”

15. Mukreste wa mukulwani u swanela ku itomela sikonkwani mañi ha sa li kwa sikolo?

¹⁵ Haiba kuli mu Bakreste ba mikulwani ili ba se ba sutelela kwa ku feza sikolo, mwendi mu na ni buikangulo bo bunde mi ha mu na buikalabelo bo buñata. Kana se mu nahanisisize ka za haiba mwa kona ku eza bupaina bwa kamita? Baluti ba mina mwendi ba lumela kuli nzila ye nde ka ku fitisisa ya ku itukiseza bupilo bwa mina bwa kwapili ki ka ku ya kwa likolo ze pahami kamba ku ya kwa liyunivesiti. Baluti ba, ba sepile hahulu kuli mutu u kona ku pila bupilo bo bunde haiba a fumana musebezi o munde o ka mu fumanisa masheleñi. Misebezi ye cwalo ha i na ku ina nako ye telele. Kono haiba mu sebeleza Jehova mwa bupilo bwa mina kaufela, mu ka itusisa nako ya mina hande mi ku eza cwalo ku ka mi tusa kuli mu eze musebezi o ka ina ku ya ku ile. Mu ka likanyisa mutala o munde wa Jesu. Yeo ki katulo ye nde ye ka mi tahiseza tabo mwa bupilo ni ku mi sileleza. Katulo yeo hape i ka bonisa kuli ha mu na ku tuhelela nto ifi kamba ifi ku mi palelwisa ku zwelelapili ku sebeleza Jehova sina mo ne mu mu sepiselize.—Mat. 6:19-21; 1 Tim. 6:9-12.

16, 17. Ki lipuzo mañi ze ba swanela ku ipuza Bakreste ze ama sebelezo ya bona ku Jehova?

¹⁶ Batanga ba Mulimu ba bañata kacenu ba sebezanga lihora ze ñata kuli ba fumanele mabasi a bona ze tokwahala. Nihakulicwalo ba bañwi ba sebezanga lihora ze ñata ku fita ze ba swanela ku sebeza. (1 Tim. 6:8)  Batu ba ba lekisa lika mwa lifasi kacenu ba lika ka taata ku lu kolwisa kuli lu swanela ku leka nto kaufela ye nca fa musika kakuli kuti ha lu koni ku pila ku sina nto yeo. Kono Bakreste ba niti ha ba lati kuli Satani ni lifasi la hae ba ba ketele lika ze swanela ku ba za butokwa mwa bupilo bwa bona. (1 Joa. 2:15-17) Ku cwañi ka za muinelo wa batu ba ba tuhezi musebezi? Nto ya butokwa ye ba swanela ku eza ki ku itusisa nako ya bona ku eza bupaina ni ku sebeleza Jehova ka ku tala.

¹⁷ Batanga ba Jehova ba ba ineezi kaufela ba kona ku ipuza kuli: Ki nto mañi ye ni nga ku ba ya butokwa ka ku fitisisa mwa bupilo bwa ka? Kana ku sebeleza Jehova ki yona nto ye ni nga ku ba ya butokwa hahulu? Kana na likanyisa Jesu ni ku bonisa kuli na itatela ku itusisa nako ni maata a ka ku sebeleza Mulimu? Kana na teeleza ku Jesu ni ku zwelapili ku mu latelela? Kana na kona ku eza licinceho ze ka ni tusa ku kutazanga ka nako ye ñata kamba ku eza misebezi ye miñwi mwa kopano ya Jehova? Nihaikaba kuli ha ni koni ku eza ze ñata ka nako ye, kana na lika ku fumana linzila ze ka ni tusa ku itusisa nako ni maata a ka ku sebeleza Jehova?

‘KU BA NI TAKAZO NI KU NGA MUHATO’

18, 19. Ki sikamañi se lu swanela ku kupa ku Mulimu, mi ka kabakalañi ku eza cwalo ha ku ka tabisa Jehova?

¹⁸ Kwa tabisa ku bona tukufalelo ye ba na ni yona batu ba Mulimu. Kono batu ba bañwi ba ba kona ku eza bupaina mwendi ha ba na takazo ya ku eza cwalo kamba ba kona ku ikutwa kuli ha ba na buikoneli bwa ku eza cwalo. (Ex. 4:10; Jer. 1:6) Ku cwañi haiba ni mina ki mona mo mu ikutwela? Mu kupe Jehova kuli a mi tuse. Paulusi naa bulezi kuli Jehova u bata ku lu tusa ‘ku ba ni takazo ni ku nga muhato.’ (Mafil. 2:13) Haiba kuli ha mu na takazo ya ku eza ze ñata mwa bukombwa, mu kupe Jehova kuli a mi fe takazo ni buikoneli bo bu ka mi tusa ku eza cwalo.—2 Pit. 3:9, 11.

¹⁹ Nuwe, Mushe, Jeremia, Paulusi, ni Jesu ne ba li baana ba ba sepahala. Ne ba itusisize nako ni maata a bona ku kutaza litemuso za Jehova. Ne ba si ka tuhelela nto ifi kamba ifi ku ba palelwisa ku peta musebezi wa bona. Mafelelezo a lifasi le a fakaufi hahulu. Kamukwaocwalo, kaufela luna ba ba ineezi ku Mulimu lu swanela ku bona teñi kuli lwa sebeza ka taata ilikuli lu likanyise mitala ye minde ye ñozwi mwa Bibele. (Mat. 24:42; 2 Tim. 2:15) Ha lu ka eza cwalo lu ka tabisa Jehova ni ku fumana limbuyoti ze tuna.—Mu bale Malaki 3:10.

[Litaluso za kwatasi]

[Lipuzo za Tuto]

[Siswaniso se si fa likepe 21]

Batu ne ba si ka mamela litemuso za naa ba file Nuwe

[Siswaniso se si fa likepe 24]

Kana mu nahanisisize ka za haiba mwa kona ku eza bupaina bwa kamita?