Mu Latelele Kreste, Mueteleli yo Munde

BATU ba ba latelelanga babusi ba butu hañata ba swabiswanga. Kono batu ba ba latelela zamaiso ya Kreste bona ha ba swabiswangi. Jesu naa ize: “Mu tahe ku na mina kamukana ba ba katezi, ba ba imezwi, mi ni ka mi imulula. Mu itwese coko ya ka, mi mu itute ku na; kakuli ni na ni musa ni pilu ye bunolo, mi mu ka fumanela mioya ya mina pumulo.” (Mat. 11:28, 29) Zamaiso ya Jesu ya imulula mi i tahisa tabo. U iseza hahulu pilu ba ba fokola ni bo mukunyandela, mi u ba kupa kuli ba itwese coko ya hae ye bubebe. Kono ku latelela zamaiso ya Jesu ku kopanyelezañi?

Muapositola Pitrosi naa ñozi kuli: “Kreste ni yena u utwile butuku bakeñisa mina, a mi siyela mutala, kuli mu hate mwa naa hatile.” (1 Pit. 2:21) Ki kabakalañi ha lu tokwa ku latelela mutala wa Kreste? Mu nge kuli mu mwahalaa batu ba ba pululeza mwa sibaka mo ku teilwe limbomba, mi mwa sikwata seo ku na ni feela mutu a li muñwi ya ziba hande mwa ku zamaela a sa hati fa mbomba. Ku si na ku kakanya, mu ka mu latelela ka tokomelo, mwendi mane ka ku hata mwa hatile. Ka ku swana, lu tokwa ku latelela mutala wa Jesu ka tokomelo ilikuli lu to ba ni bupilo bo bunde kwapili. Ku eza cwalo ku lu tokwa kuli lu mu utwe ni ku mamela za lu laezi ni ku swalisana ni batu ba ba mu yemela.

Mu Utwe mi mu Mamele

Kwa mafelelezo a Ngambolo ya fa Lilundu, Jesu naa ize: “Mutu kaufela ya utwa manzwi a ka ao, mi a ya ka ona, ni ka mu likanyisa ni muuna ya na ni ngana, ya yahile ndu ya hae fa licwe; mi pula ya nela, mikokolombwa ya yepeha, ni ñuli ya shelumukela ndu yeo; mi ha i si ka wa, kakuli ne tomilwe fa licwe.”—Mat. 7:24, 25.

Kacwalo Jesu naa bulezi kuli mutu ya utwa manzwi a hae ni ku a mamela u na ni “ngana.” Kana lwa bonisanga kuli lwa ipeya ku utwa luli ka ku latelela mutala wa Kreste, kamba kana lu ketanga feela litaelo ze lu bona kuli li bunolo ku li mamela? Jesu naa ize: ‘Kamita ni ezanga ze tabisa Mulimu.’ (Joa. 8:29) Haike lu likeñi ka mo lu konela kaufela ku likanyisa mutala wo.

Baapositola ne ba tomile mutala o munde wa ku latelela zamaiso ya Kreste. Ka nako ye ñwi Pitrosi naa bulelezi Jesu kuli: “Bona, luna lu tuhezi linto kaufela, mi lu ku latelezi.” (Mare. 10:28) Kaniti, baapositola ne ba nga zamaiso ya Jesu ku ba ya butokwa hahulu kuli mane ba toboha lika za bona ni ku mu latelela.—Mat. 4:18-22.

Mu Swalisane ni ba ba Yemela Kreste

Ha ne ku siyezi nakonyana kuli Jesu a shwe, naa talusize nzila ye ñwi ye lu kona ku latelela ka yona zamaiso ya hae. Naa ize: “Ya amuhela mutu ye ni lumile u amuhela na.” (Joa. 13:20) Mane Jesu naa bulezi kuli bayemeli ba hae ba ba tozizwe ki “banyani” ba hae. (Mat. 25:40) Jesu ha sa zuselizwe kwa lihalimu, “banyani” ba hae ne ba keni mwa sibaka sa hae, sina “mandumeleti a Kreste,” ba ba mema batu ba bañwi kuli ba kutele ku Jehova Mulimu. (2 Makor. 5:18-20) Ku latelela zamaiso ya Kreste ku kopanyeleza ku ipeya kwatasaa “banyani” ba hae.

 Lu swanela ku nyakisisa mo lu ezezanga ha lu bala likelezo za mwa Mañolo ze hatiswanga mwa lihatiso za luna ze tomile fa Bibele. Ha lu ituta Mañolo ni ku fumanehanga kwa mikopano ya puteho, lwa hupuzwanga manzwi a Kreste. (2 Pit. 3:1, 2) Lu kona ku bonisa kuli lwa itumela hahulu lico za kwa moya ze lu fiwa haiba lu li ca kamita. Kono lu swanela ku eza cwañi haiba kelezo ye ñwi i kuta-kutelwa ku ñolwa? Ka mutala Linzwi la Mulimu li eleza Bakreste kuli ba swanela ku nyalela ‘feela ku Mulena.’ (1 Makor. 7:39) Taba yeo se i kuta-kutezwi ku ñolwa mwa Tawala ya Mulibeleli ka lilimo ze fitelela mwanda. Banyani ba Kreste ba bonisa kuli ba lata kuli lu be ni bulikani bo bunde ni Jehova ka ku hatisa lihatiso ze bulela ka za kelezo yeo mane ni likelezo ze ñwi ze tahile ka moya wa Mulimu. Ku tokomela likupuliso zeo ki ye ñwi ya linzila ze lu bonisa ka zona kuli lu latelela Mueteleli wa luna yo munde, yena Jesu Kreste.

Liñolo la Liproverbia 4:18 li bulela kuli: “Nzila ya ba ba lukile i swana sina liseli la lizazi, le li ya li ekezeha, mane ku yo fita fa musihali o mutuna.” Kaniti Jesu ka ku ba mueteleli ha si ka ina feela, kono u zwelapili ku fa liseli. Nzila ye ñwi ye lu kona ku bonisa ka yona kuli lwa swalisana ni “banyani” ba Kreste ki ka ku zamaelela ni kutwisiso ye nca ya Mañolo ye hatisizwe ki “mutanga ya sepahala, ya na ni kutwisiso.”—Mat. 24:45.

Hape lu bonisa kuli lwa ipeya kwatasaa “banyani” ba Kreste ha lu swalisana ni baokameli ba ba ketilwe mwa puteho ya Sikreste. Muapositola Paulusi naa ize: “Mu utwe bazamaisi ba mina, mi mu ipeye kwatasaa bona; kakuli ba tonela mioya ya mina.” (Maheb. 13:17) Ka mutala, eluda u kona ku lu susueza kuli lu tokwa ku banga ni Nako ya ku Lapela Sina Lubasi kamba u kona ku lu fa liakalezo za mo lu kona ku kutaleza hande. Muokameli wa maeto u kona ku lu fa kelezo ya mwa Mañolo ka za mo lu swanela ku pilela sina Bakreste. Ha lu sebelisa likelezo zeo lu bonisa kuli lu latelela Jesu, yena Mueteleli wa luna.

Ka bumai, mwa lifasi ha ku na mueteleli ya kona ku zamaisa hande lika. Kono ku latelela Jesu ya etelela ka lilato kwa katulusa luli! Kamukwaocwalo, ha lu ezeñi ka mo lu konela kaufela kuli lu utwe Mueteleli wa luna ni ku swalisana ni batu ba itusisa kacenu.

[Maswaniso a fa likepe 27]

Kana mwa mamela kelezo ya mwa Mañolo ya kuli mu si ke mwa lwala coko i liñwi ni ya sa lumeli?