Lipuzo ze Zwa Kwa Babali

Satani naa lunduzwi lili kwa lihalimu?—Sin. 12:1-9.

Nihaike kuli buka ya Bibele ya Sinulo ha i talusi lizazi tenyene la naa lunduzwi Satani kwa lihalimu, i talusa likezahalo za ka ku tatamana ze kona ku lu tusa ku akaleza fa naa lundulezwi kwa lihalimu. Ya pili kwa likezahalo zeo ki ku tomiwa kwa Mubuso wa Mesia. Hamulaho wa fo, “ndwa ya lwanwa mwa lihalimu,” ili ye ne i tahisize kuli Satani a bitiwe mi kwa mafelelezo a lundulwa kwa lihalimu.

Mañolo a bonisa kuli 1914 kona silimo se ne li felile “linako za bamacaba” mi Mubuso wa Mesia wa tomiwa. * (Luka 21:24) Ku zwa fo i kaliseza puso yeo, ne ku fitile nako ye kuma kai kuli ndwa mwa lihalimu i tumbuke, ni ku tahisa kuli Satani a lundulwe?

Sinulo 12:4 i li: “Drakoni [Satani] ya yema fapil’a musali ya pepa, kuli i mize mwan’a hae h’a ka pepwa.” Liñolo le, li bonisa kuli Satani naa bata ku sinya Mubuso o ne u sa zo tomwa ka mo ne ku ka konahalela kaufela. Nihaike kuli Jehova naa palelwisize Satani ku peta mulelo wa hae o maswe, Satani naa tundamezi ni ku pihelela ku ikataza kuli a sinye Mubuso wo no sa zo tomwa. Kona libaka “Mikaele ni mangeloi a hae” ha ne ba ngile muhato kapili-pili wa ku zusa ‘Drakoni ni mangeloi a yona’ mwa lihalimu ilikuli Mubuso o ne u sa zo tomwa wo u si ke wa sinyeha. Kacwalo kwa utwahala ku bulela kuli ku lundulwa kwa Satani ne ku ezahezi hamulaho wa nakonyana feela ku zwa fo u tomelwa Mubuso wo ka 1914.

Taba ye ñwi ye lu swanela ku nyakisisa ki zuho ya Bakreste ba ba tozizwe, ili yeo ka ku likana ni bupaki bwa mwa Mañolo, ne i kalile hamulaho wa nakonyana ku zwa fo u tomelwa Mubuso. * (Sin. 20:6) Bakeñisa kuli ha ku na kwa banyani ba Kreste ba ba tozizwe ba ba bulezwi kuli ba tusa Jesu mwa ku lwanisa drakoni ni mangeloi a yona, ndwa ya mwa lihalimu ne i lwanilwe mi Satani ni badimona ba hae ne ba lunduzwi ka nako ye ne i kalisize zuho ya banyani ba Kreste.

Kacwalo he, Bibele ha i patululi lizazi tenyene la naa lunduzwi Satani ni badimona ba hae kwa lihalimu. Kono kwa iponahaza hande kuli kezahalo yeo ne i ezahezi Jesu Kreste ha sa beilwe fa bulena mwa lihalimu ka 1914.

[Litaluso za kwatasi]