Ki Likamañi Za Butokwa Hahulu mwa Bupilo bwa Mina?

BO KENNY ne ba sebeza kwa kampani ye ñwi ye tumile hahulu, ne ba matisanga mota ya kampani ya simbombo, mi ne ba na ni ndu ye nde mwa komboni ye mwa tolopo ye tuna. Ne ba cuukile hahulu mwa papali ya ku tulanga mwa lifulai, mi ne ba ikola hahulu papali yeo. Kana zeo kaufela ne li ba file tabo? Mutende o muñwi (The Wall Street Journal) u talusa kuli bo Kenny ne ba bulezi kuli: “Se ni na ni lilimo ze 45 cwale, mi ha ni zibi kuli bupilo bwa ka bu ka ba cwañi kwapili . . . Ha ni fumani tabo mwa bupilo.”

Bo Elyn ne ba tandile nako ye telele inze ba itwaeza ilikuli ba be licaziba mwa papali ya ku bapalela fa litwa. Mi mafelelezo ne ba fitile fa ku ba licaziba luli. Ne ba fumani libubo le ne ba bata. Kono hamulaho ne ba ize: “Tabo ye ne ni hupula kuli ne ni ka fumana, i kakai? Ne ni ikutwile fela buinosi. Na lemuha kuli ne ni ka supala, mi ni ko ne ni na ni masheleñi a mañata, ne ni sa boni tuso ya ku pila, haiba ona bo ki bona bo ne bu ka ba fela bupilo bwa ka.”

 Bo Hideo ne ba zibahala hahulu ka bukwala bwa bona bwa ku swanisa mi ne ba ndongwami hahulu za ku swanisa mwa bupilo. Mane ne ba sa lekisangi maswaniso a bona ilikuli kuti a si ke a ata hahulu ku mañi ni mañi. Ha ne ba li bukaufi ni ku shwa inze ba na ni lilimo ze 98, ba fanisa buñata bwa maswaniso ao kwa miziyamu ye ñwi. Ne ba neezi mazazi a bupilo bwa bona kaufela kwa ku swanisa. Kono ne ba si ka fumana tabo ba man’o lemuha kuli ne ba si ke ba kona ku swanisa maswaniso a mande hahulu, a si na fa nyazahala, ni ko ne ba ka lika ba mane.

Batu ba bañwi bona ba tandanga nako ye ñata ku tusa ba bañwi. Mu nge mutala wa munna yo muñwi ya na beleka kwa kampani ye ñwi ye lukisanga mafilimu a fa TV kwa America. Ka ku ba mubakweli wa yo muhulu wa kampani yeo, munna yo na zibahala hahulu ku ba ne ba bapalanga mafilimu mi na pila mwa komboni ye ne kutekeha hahulu. Nako ye ñwi na ile kwa pumulo kwa Cambodia, mi musizana yo muñwi a mu atumela ha na li fa tafule mwa licelo la kwa Phnom Penh. Munna yo a fa musizana yo dola i liñwi ni botela ya sino. Musizana a itebuha hahulu. Kono habusa musizana yo na sa fumaneha fa sibaka se si swana inze a kupelela. Munna yo a lemuha kuli musizana yo n’a tokwa tuso luli, isi ya hañwi fela.

Silimo se ne si latelezi munna yo a cinca musebezi, a tuhela ku beleka kwa kampani ya mafilimu ni ku kalisa ku tusa babotana ba ba pila mwa Cambodia. A toma sikolo fo ne ku fumaneha mandu mane ni lico. Niteñi, munna yo ha pili mwa kozo—niha ikutwa ku ba ni tabo bakeñisa musebezi wa sweli ku eza, u zwafiswa hahulu ki ku bona kuli matata a batu b’a bata ku tusa a sa ekezeha.

Mitala kaufela ya batu ba bane ye lu nyakisisize i bonisa kuli batu bao ne ba na ni lika ze ne ba nga kuli li ka ba fa tabo mwa bupilo. Kono hamulaho wa ku sebeza ka t’ata ka nako ye telele ni ku peta milelo ya bona, ne ba si ka fumana tabo. Mina bo, milelo ya mina ki ifi? Ki likamañi za butokwa hahulu mwa bupilo bwa mina? Kana luli ha mu na ku inyaza kwapili bakeñisa mo mu pilela kacenu?