Mu Yahela fa Mutomo O Cwañi?

KULI muyaho u ine nako ye telele ku itingile fa mutomo wa ona o tiile. Bibele fokuñwi itusisanga sikuka seo sina swanisezo.

Ka mutala, mupolofita Isaya n’a bulezi kuli Jehova Mulimu ki yena ya “toma mitomo ya lifasi.” (Isaya 51:13) Ona mutomo w’o u kopanyeleza milao ya Mulimu ye sa cinci ye zamaisa hande lifasi ni ku li tiisa mwa sibaka sa lona. (Samu 104:5) Hape Linzwi la Mulimu, yona Bibele, li bulela za “mitomo” fo ba itingile batu. Mitomo yeo ki likatulo, milao, ni litaelo. Haiba mitomo yeo i “sinyiwa” kamba ku shekeshiswa ki ketululo, bumutendasilya, ni mifilifili, kipeto batu ha ba na ku eza lika ka swanelo.—Samu 11:2-6; Liproverbia 29:4.

Hape sikuka se, si ama mutu ni mutu ka butu. Ha n’a ungula Ngambolo ya hae ye zibahala hahulu ya fa Lilundu, Jesu n’a bulezi kuli: “Cwalehe, mutu kaufela ya utwa manzwi a ka ao, mi a ya ka ona, ni ka mu likanyisa ni munna ya na ni ngana, ya yahile ndu ya hae fa licwe; mi pula ya nela, mikokolombwa ya yepeha, ni ñuli ya shelumukela ndu yeo; mi ha i si ka wa, kakuli ne i tomilwe fa licwe. Kono mutu kaufela ya utwa manzwi a ka ao, mi a sa yi ka ona, a ka likanyiswa ni munna wa sikuba, ya yahile ndu ya hae fa mushabati; mi pula ya nela, mikokolombwa ya yepeha, ni mañungwa a fuka, a nata fa ndu yeo, mi ya wa; mi ku wa kwa yona kwa ba sinyehelo ye tuna.”—Mateu 7:24-27.

Bupilo bwa mina mu bu yahela fa mutomo o cwañi? Kana ki fa mushabati wa lituto ze tomile fa mihupulo ya batu, ze kona ku mi wisa? Kamba kana mu bu yahela fa licwe le li tiile la ku utwa manzwi a Jesu Kreste, a ka mi konisa ku banduka mañungwa a swanisezo a mwa bupilo?