Sanda Se Mu Kona ku Sepa

“HAIBA mu amuhela liñolo le li zwa ku mutu yo muñwi le li mi zibisa kuli mu na ni sanda ko kuñwi, mu tokomele. Mwendi ki lisholi ya bata ku mi uzweza.”

Yeo ki temuso ye n’e beilwe fa Intaneti ki ba United States Postal Inspection Service. Kabakalañi? Kakuli batu ba bañata-ñata ne ba amuhezi mañolo a’ bulela kuli, ‘Ku na ni wahabo mina ya timezi, mi u mi siyezi sanda.’ Kacwalo, ba bañata ne ba lumezi mali a fita fa $30 (K143,100.00) kamba mane ku fitelela, ilikuli ba fiwe ‘piho ya za sanda’ ye n’e swanela ku ba zibisa kuli sanda seo ne si li kai ni mo ne ba ka si ngela. Ne ba swabile hahulu. Be ne ba alabile mañolo ao kaufela ne ba amuhezi piho ye swana—mi ne ku si na ya n’a kona ku yola sanda ni se si ka na.

Milelo ye cwalo i sebezanga kabakala takazo ya batu ya ku bata ku yola sanda. Kono Bibele i babaza ba ba fanga lianda ha i bulela kuli: “Mutu yo munde u siyela bana ba hae sanda.” (Liproverbia 13:22) Mane yena Jesu Kreste ka sibili mwa Ngambolo ya hae ya fa Lilundu n’a bulezi manzwi a tumile a latiwa hahulu a’ li: “Mbuyoti ki ya ba ba ishuwa, kakuli ba ka ca [“yola,” NW] sanda sa lifasi.”—Mateu 5:5.

Manzwi a Jesu a lu hupulisa zeo Mulena Davida wa Isilaele wa kwakale n’a buyelezwi ku ñola lilimo-limo kwamulaho kuli: “Ba ba ishuwa ba ka luwa naha [“ba ka yola sanda sa lifasi,” NW], ba ka ikola kozo ye tuna.”—Samu 37:11.

Ku “yola sanda sa lifasi”—ki sepo kwa ku tabisa! Kono kana lwa kona ku kolwa kuli w’o haki mulelo fela o muñwi wa bupumi wa ku tibela batu ku ba ni nto ye ñwi? Ee, lwa kona ku kolwa cwalo. Ka ku ba kuli lifasi ki kalulo ya pupo ya Jehova ye makaza, yena ka ku ba Mubupi ni Muñ’a lona u na ni tukelo ya ku li fa b’a lata kaufela. Ka Mulena Davida, Jehova n’a file Jesu Kreste Mwan’a Hae ya lateha sepiso ya bupolofita ye: “Kupa ku Na, mi ni ka ku fa macaba, ibe sanda sa hao, ni mafelelezo a lifasi, ibe liluwo la hao.” (Samu 2:8) Kabakaleo, muapositola Paulusi n’a talusize Jesu ku ba yena “yo [Mulimu] a beile ku yola sanda sa lika kamukana.” (Maheberu 1:2) Kacwalo lwa kona ku kolwa ka ku tala kuli Jesu ha n’a bulezi kuli ba ba ishuwa “ba ka yola sanda sa lifasi,” n’a bulela niti, mi u na ni m’ata a swanela a ku taleleza sepiso ya hae.—Mateu 28:18.

Kacwalo, puzo ya butokwa ki ya kuli, Sepiso yeo i ka talelezwa cwañi? Kai ni kai ko lu ka talima kacenu, ku bonahala kuli ba ba eza ka bulwani ni baikankabeki ki bona ba  ba kondisa hande lika mi ba ikungela ze ba bata. Ba ba ishuwa bona ba ka siyalelwa ki lifi? Hape lifasi li silafalizwe maswe, mi lifa la lona li feziwa ki batu ba mukwañuli ni batu ba ba sa boneli hule. Kana ku na ni za ku yola ze ka siyala mwa lifasi? Lu mi susueza ku bala taba ye tatama kuli mu fumane kalabo kwa lipuzo zeo ni ze ñwi za butokwa.

[Siswaniso se si fa likepe 3]

Kana mu ka yola sanda sakata?