Buswa bwa Butokwa Ka Ku Fitisisa

BUKAUFI ni mafelelezo a bupilo bwa hae, muapositola Joani wa musupali n’a ñozi kuli: “Ha ku na se si ni tabisa ku fita se, ha ni utwa kuli bana ba ka ba zamaya mwa niti.”—3 Joani 4.

Muapositola ya sepahala n’a ama kwa bana ba hae kwa moya. Kono, bashemi ba bañata b’a kona ku bulela mwa n’a bulelezi muapositola. Ba sebelize ka t’ata ku hulisa bana ba bona “ka ku ba lemusa, ni ka tuto ya Mulena,” mi cwale ba tabela ku bona bana ba bona ba ba hulile ha “ba zamaya mwa niti.” (Maefese 6:4) Mane, ku luta bana nzila ye libisa kwa bupilo bo bu sa feli ki ku ba fa buswa bwa butokwa ka ku fitisisa. Ku cwalo kakuli bulapeli kamba buipeyo bwa silumeli, bo bu kopanyeleza ku pila ka m’o Jehova a batela kuli Bakreste ba pile, “bu filwe sepiso ya bupilo bwa cwale, ni ya bo bu sa taha.”—1 Timotea 4:8.

Jehova, Ndate ya petehile, u nga hahulu ka butokwa bashemi ba ba saba Mulimu ba ba lika ka t’ata ku luta bana ba bona kwa moya. Bana ha ba amuhela tuto yeo, ba fumana tabo ye tuna ha ba nze ba zwelapili ni bashemi ba bona mwa bulapeli bwa niti. Bana ba ba cwalo ha ba nze ba hula, ba ipulukela litaba ze nde ze ba si ke ba libala. Ba bañwi ba hupulanga ka tabo fo ne ba abanezi lwa pili mwa Sikolo sa Bukombwa sa Teokratiki. * Kamba mwendi ba hupulanga fo ne ba konezi lwa pili ku bala liñolo la mwa Bibele mwa bukombwa bwa fa ndu ni ndu inze ba li ni yo muñwi wa bashemi ba bona. Ha ba na ku libala bashemi ba bona ha ne ba ba balela mwa Buka Ya Ka ya Makande a Bibele kamba ya Ku Teeleza ku Muluti Yo Mutuna. * Gabriel u hupula nto ye ñwi ya n’a fitile fa ku tabela: “Ha ne ni li fela wa lilimo z’e ne, boma zazi ni zazi ne ba ni opelelanga ha ba nze ba apeha. Ni sa hupulanga hande hahulu pina cwana ya Mubuso. Hamulaho, pina yeo ne i ni tusize ku bona butokwa bwa sebelezo ya Jehova.” Mwendi ni mina mwa hupula pina ye munati yeo ya bulela Gabriel. Ki pina 157 mwa buka ya Mu Opelele Jehova Milumbeko, mi toho ya taba ya yona i li “Sebeleza Jehova mwa Bunca.”

Pina yeo i kala cwana: “Banana ba lumbeka Mulimu;/Ba huwa ka ku tabela Jesu.” Kaniti, ne ku na ni banana be ne ba bile ni tohonolo ya ku swalisana ni Jesu, mi ne ba kana ba mu tabisize ka muinelo wa bona o katulusa, wa  busepahali. Jesu mane n’a itusisize moya wa banana ba banyinyani wa ku tabela ku lutiwa ku ba mutala o ne ba na ni ku likanyisa balateleli ba hae. (Mateu 18:3, 4) Kacwalo banana ba na ni kalulo ye ba filwe mwa bulapeli bwa Jehova. Mane, manzwi a pina yeo a zwelapili kuli: “Ku Mulimu ba mwa swalisano.”

Ka mutala o munde wa muzamao wa bona—fa lapa, kwa sikolo, ni kwa libaka ze ñwi—banana ba bañata ba tisize tumbo ku Mulimu ni kwa lubasi lwa bona. Ba na ni mbuyoti ya ku ba ni “bashemi ba Sikreste [ba ba lata niti].” (Deuteronoma 6:7) Bashemi ba ba saba Mulimu ba eza z’a bulela Mulimu, ili y’o ka ku ba Ndate ya lilato, u luta libupiwa za hae ku zamaya mwa nzila ye ba lukela ku zamaya ku yona. Mi ba fumana limbuyoti ze tuna! Ni bona cwale, ha ba luta bana ba banyinyani mwa lubasi lwa bona, ba nyakalalanga hahulu ku ba ni bana ba ba ‘utwa ze ba ba laya’! (Isaya 48:17, 18) Angélica, y’o ha lu bulela cwana u sebeza fa ofisi ya mutai wa Lipaki za Jehova mwa Mexico, u li: “Bashemi ba ka kamita ne ba ikataza ku sebelisa likuka za Bibele. Seo ne si bisize nako ya bwanana bwa ka ku ba ye tabisa hahulu. Ne ni li ya tabile.”

Bakreste ba ba cwalo ba lumela kuli ku babalela buswa bwa mina bwa kwa moya kwa tusa. Mwendi mu mukulwani ya utelwa mwa lubasi lo lu latelela likuka za Bukreste bwa niti. Haiba ku cwalo, pina ye swana i mi susueza kuli: “Ba banca, mu ndongwame ku luka.” Nako i ka taha fo mu ka ikezezanga likatulo, mi kacwalo, ka nako ye “mu sepe Jehova./Za ku bub’ana ha mu li siye.”

Haiba ka mafosisa mu bata za ku bubana pili mwa bupilo, tuto kaufela ye mu filwe i ka ba ya mbango mi mwa kona ku sinya sepo ya mina ya za kwapili. Takazo ya ku bubana ya kona ku mi tahiseza ku lisela ku tokomela. Ba bañwi ba fitile fa ku swalisana ni batu ba ba eza kuli nihaike ba bonahala kutokwa bumaswe, kamba mane ba bonahala ku tabisa, ha ba na taba ni likuka za Sikreste. Seo ne si bonisizwe ki Tara, mubapali fo i tomile vidio ye li Young People Ask—How Can I Make Real Friends? Sina Tara, Mukreste kaufela wa mwanana ya swalisana ni ba ba sa ngi ka butokwa bulapeli bwa niti muta o muñwi u ka lemuha sina mo i bulelela pina kuli ‘batu ba ba maswe ba tokwiwa ku pimiwa.’ Ku tandanga lilimo na lilimo za buikatazo kuli mutu a hulise mikwa ye minde, kono i kona ku sinyiwa ka bubebe.

Ki niti kuli ku pila ka sabo ya ku saba Mulimu haki ko ku bunolo. Kono, sina mo i zwelapili ku bulelela pina kuli, ‘ha mu hupula Mulimu cwale,/Mwa bunca ha mu mu sebeleza,’  mu ka ba ni makalelo a mande a ku kondisa luli kwapili. Mi ‘h’a nze mu hula mu ka ba ni tabo.’ Mu ka fita fa ku utwisisa hahulu kuli ha mu li mwa pabalelo ya Jehova ye lilato, ha ku na nto ye kona ku mi palelwisa ku eza ze lukile ku yena. Yeo ki yona nzila ya ku ba ka yona mutu ya fitile fa buhulu sakata, ya sebeleza Mulimu. Kwand’a seo, ku itebuha ku huliswa ka nzila ya Sikreste ku konahalisa kuli “ni Mulimu a mi fe tumbo.” Ha ku na tohonolo ya kona ku ba ni yona mutu ku fita yeo!—Liproverbia 27:11.

Kacwalo, ba banca, mu no hupula kamita butokwa bwa tuto ye mu fiwa ki Jehova ni bashemi ba mina ba Sikreste. Haike lilato la bona le lituna le ba mi lata ka lona li mi susueze ku eza ze nde ku Jehova. Sina Jesu Kreste ni mutangana ya n’a sepahala Timotea, mu ka tabisa Ndat’a mina wa kwa lihalimu ni bashemi ba mina ba fa lifasi. Mi haiba ni mina kwapili mu ka ba bashemi, mwendi mu ka lumelelana ni Angélica, ya bulezwi kale, y’a li: “Haiba ni ka ba ni mwana, ni ka lika ka t’ata ku kenya lilato la ku lata Jehova mwa pilu ya hae isali kwa bumbututu, kuli lilato leo li be yona ketelelo ya hae mwa bupilo.” Kaniti, nzila ye namile ye libisa kwa bupilo bo bu sa feli ki bona buswa bwa butokwa ka ku fitisisa!

[Litaluso za kwatasi]