Mulalelo wa Mulena Ki Nto Mañi?

MULALELO wa Mulena ki nto mañi, mi u ama cwañi batu ba kacenu? Libuka ni lidikishinari li talusa kuli ki sico seo Jesu Kreste ni baapositola ba hae ne ba lalezi pili a si ka fana bupilo bwa hae sina sitabelo. Bakeñisa kuli ki mulalelo wa mafelelezo wa n’a cile Jesu ni balateleli ba hae ba ba sepahala, ba bañwi ba u biza kuli ki Mulalelo wa Mafelelezo. Mi kakuli n’o tomilwe ki Mulena Jesu Kreste ka sibili, kwa swanela ku u biza kuli Mulalelo wa Mulena.

Ka lilimo-limo, ba bañata ba shwezi lika ze ne ba nga ku ba za butokwa. A mañwi kwa mafu ao n’a tusize batu ba bañwi ka nakonyana. Kono ha lu bapanya mafu ao kwa lifu la Jesu Kreste, ku si na taba kuli mafu ao n’a tusize cwañi, ha ku na ni le li kana la butokwa ku fita la Jesu. Hape ha ku si ka ba kale ni lifu le li kile la ama batu ba bañata cwalo mwa pupo kaufela. Ki kabakalañi?

Ka ku alaba puzo yeo ni ku mi tusa ku ziba mo mu amelwa ki Mulalelo wa Mulena, lu mi mema ku bala taba ye tatama.